كۇن تارتىبىندە 2019 وقۋ جىلىنداعى قارۋلى كۇشتەر قىزمەتىنىڭ قورىتىندىلارى قارالدى.
مينيسترگە اسكەرلەردىڭ جاۋىنگەرلىك جانە جۇمىلدىرۋ ازىرلىگى, جەدەل, جاۋىنگەرلىك جانە جۇمىلدىرۋ دايىندىعى, سونداي-اق قارۋلى كۇشتەردى دامىتۋدىڭ جاي-كۇيىن تالداۋ ناتيجەلەرى باياندالدى.
قورعانىس ءمينيسترىنىڭ ءبىرىنشى ورىنباسارى – قارۋلى كۇشتەردىڭ باس شتاب باستىعى گەنەرال-مايور مۇرات بەكتانوۆ جانە قورعانىس ءمينيسترىنىڭ ورىنباسارى باۋىرجان تورتاەۆ بايانداما جاسادى.
گەنەرال-مايور مۇرات بەكتانوۆتىڭ ايتۋىنشا, 2019 جىلى قارۋلى كۇشتەردە جوسپارلانعان بارلىق ءىس-شارا تولىق دەڭگەيدە ورىندالدى. جىل بويى بولىمشەلەر 20-دان استام حالىقارالىق, 2 تۇرارالىق وقۋ-جاتتىعۋعا قاتىستى. قۇرلىق اسكەرلەرىندە جاۋىنگەرلىك دايارلىققا قاتىستى 7000-نان استام وقۋ-جاتتىعۋ وتكىزىلدى. بۇل وقۋ-جاتتىعۋلار ءار ەلدىڭ اسكەر توپتارىنىڭ ءوزارا ءىس-قيمىلىنىڭ جوعارى دەڭگەيگە جەتۋى مەن جەكە قۇرامنىڭ جاۋىنگەرلىك دايارلىعىنىڭ ارتۋىنا ىقپال ەتتى.
قۇرىلىمدىق بولىمشەلەرگە جاۋاپتىلار اسكەر قىزمەتىنىڭ جاي-كۇيىنە جانە اسكەري بولىمدەر مەن مەكەمەلەردىڭ ديۆەرسياعا قارسى قاۋىپسىزدىگىنە, سونداي-اق اسكەري تارتىپكە تالداۋدى تانىستىردى. تالقىلاۋ بارىسىندا اسكەري قىزمەتشىلەردىڭ وتباسىمەن جۇمىس ىستەۋ جانە جاستاردى اسكەري-پاتريوتتىق تاربيەلەۋ سالاسىنداعى قىزمەتتەر نازاردان تىس قالمادى.
الداعى وقۋ جىلىندا جاڭا گەوساياسي جاعدايلاردا قاۋىپسىزدىككە تونەتىن قاۋىپ-قاتەرلەردىڭ كورسەتىلۋىن كەپىلدىكپەن قامتاماسىز ەتەتىن قارۋلى كۇشتەردىڭ بەينەسىن جەتىلدىرۋ جونىندەگى جۇمىس جالعاستىرىلادى.
مينيستر جەكە اسكەر ءتۇرىن دامىتۋ, سونداي-اق اسكەردى كەشەندى قايتا جاراقتاندىرۋ قاجەتتىلىگىن اتاپ ءوتتى.
كەڭەيتىلگەن القا وتىرىسى سوڭىندا 2019 جىلعى جاۋىنگەرلىك سايىستاردىڭ جەڭىمپازدارى ماراپاتتالدى. اسكەر ءتۇرى اراسىنان – قۇرلىق اسكەرى, وڭىرلىك قولباسشىلىقتار مەن اسكەر تەكتەرى اراسىندا «وڭتۇستىك» جانە «شىعىس» وڭىرلىك قولباسشىلىقتارى, دەسانتتى-شابۋىلداۋشى اسكەرلەرى ۇزدىكتەر قاتارىنان كورىندى.
