18 قاراشادا ساعات تۇنگى ەكى شاماسىندا اتىراۋ وبلىستىق بالالار اۋرۋحاناسىنىڭ قابىلداۋ بولىمىنە 4 جاسار بالا ءتۇستى. العاشقى بەلگىلەرى ونىڭ جاعدايى اۋىر ەكەنىن ايقىندادى. بالانىڭ تاماق, وڭەش جولدارى بىتەلىپ, تاماق ءجۇرۋى توقتاعان. ونىڭ وڭەشىنە 100 تەڭگەلىك مونەتا تۇرىپ قالعانى انىقتالدى. اۋرۋحانانىڭ كەزەكشىلىكتەگى دارىگەرلەرى ەندوسكوپيست ەربول تولەگەنوۆتى جۇمىسقا شاقىرتقان. جۇمىس ورنىنا كەلگەن مامان جەدەل تۇردە ەندوسكوپيالىق قۇرىلعى كومەگىمەن الگى مونەتانى شىعارىپ الدى.
تۇنگى ەكىلەر شاماسىندا جۇمىستان تەلەفون شالدى. جاعدايدى تۇسىنگەن بويدا دەرەۋ اۋرۋحاناعا كەلدىم. ءجۇز تەڭگەلىك مونەتانىڭ ديامەترى كىشكەنتاي بالا تۇرماق, ۇلكەن ادامنىڭ وڭەشىن بىتەپ تاستاي الادى. بىراق اتا-اناسىنىڭ دەر كەزىندە حابارلاسقانىنىڭ, ءبىزدىڭ مامانداردىڭ ءتيىستى شارالاردى جۇزەگە اسىرعانىنىڭ ارقاسىندا بالانى امان الىپ قالدىق. قازىر بالانىڭ جاعدايى جاقسى, دەدى دارىگەر ەربول تولەگەنوۆ.
بالامنىڭ تيىندى قاي كەزدە جۇتىپ قويعانىن بىلمەيمىن, ءبىر بىلەتىنىم بەت الپەتى وزگەرىپ, جاعدايى ناشارلاي باستاعاندا جەدەل جاردەم شاقىردىم. ودان كەيىن, جەدەل جاردەم اۋرۋحاناعا اپاردى. ايتەۋىر امان الىپ قالدى بالامدى. سول سەبەپتى دەرەۋ كەلگەن جەدەل جاردەم قىزمەتكەرلەرىنە دە, ءتيىستى ەم-دومىن جاساعان بالالار اۋرۋحاناسى دارىگەرلەرىنە دە العىسىم شەكسىز, دەيدى بالانىڭ اناسى.
