جيىندا ءسوز سويلەگەن كاسىپكەردىڭ ءبىرى «قالجان-قۇرىلىس» جشس ديرەكتورىنىڭ ورىنباسارى قۋانىش ءشۇيىشوۆ كاسىپورىندا بولعان وقيعاعا قاتىستى جانايقايىن جەتكىزىپ, پروكۋراتۋرادان اراشا سۇراعان. ايتۋىنشا, ماڭعىستاۋ وبلىسى ەكولوگيا دەپارتامەنتى اتالعان كاسىپورىندى ەكولوگيالىق تالاپتاردى ورىنداماعانى ءۇشىن سوتقا بەرىپ, ليتسەنزياسىنان ايىرۋدى تالاپ ەتكەن.
- «قالجان-قۇرىلىس» ايتارلىقتاي ەشتەڭەنى بۇلدىرگەن جوق, ايتىلعان ەسكەرتۋدى قابىلداپ, كەمشىلىكتى جويدىق. ليتسەنزيادان ايىرىپ جۇمىستى توقتاتسا, قانشاما ادام جۇمىسسىز قالادى, دەدى كاسىپكەر ءوز سوزىندە.
كوپ ۇزاماي بۇل ماسەلە بويىنشا ۋاكىلەتتى ورگان تەز ارادا جاۋاپ بەردى. ماڭعىستاۋ وبلىسى ەكولوگيا دەپارتامەنتى وبلىستىق پروكۋراتۋرانىڭ تاپسىرماسىنا سايكەس «قالجان-قۇرىلىس» جشس-نە قاراستى پوليگوندا تەكسەرىس جۇرگىزىلگەندىگىن جانە قر ەكولوگيالىق زاڭنامالاردىڭ ورەسكەل بۇزىلعاندىعىن راستادى.
ناتيجەسىندە كاسىپورىنعا قر اكىمشىلىك قۇقىق بۇزۋشىلىق تۋرالى كودەكسىنىڭ ءۇش بابىمەن, اتاپ اتاپ ايتقاندا 328, 332 جانە 334 باپتارىنا سايكەس ايىپپۇل سالىنعان.
سونداي-اق ەكولوگيا دەپارتامەنتى تاراپىنان كاسىپورىننىڭ ەكولوگيالىق قۇجاتتارىن سۇراتۋ جانە پوليگون قىزمەتىن توقتاتۋ جونىندە سوتقا تالاپ-ارىز بەرىلگەن. جاقىن كۇندەرى تالاپ-ارىز ازاماتتىق تارتىپتە سوتتا قارالاتىن بولادى.
