پارسى ەلىندە قازاق بالۋاندارى يران, رەسەي جانە كۋبا قۇرامالارىمەن ءبىر توپتا ونەر كورسەتەدى. اتالعان كوماندالاردىڭ بارلىعى دا ازۋلى ەكەنى ەش كۇمان تۋعىزباسا كەرەك. وسى ءسوزىمىز دالەلدى بولۋ ءۇشىن الىسقا بارماي-اق, ۇستىمىزدەگى جىلدىڭ قىركۇيەك ايىندا نۇر-سۇلتاندا وتكەن الەم چەمپيوناتىنىڭ ناتيجەسىنە كوز جۇگىرتسەك تە جەتكىلىكتى. ماسەلەن, بۇگىندە كۇرەس الەمىنىڭ كوشباسشى كومانداسى سانالاتىن رەسەي قۇراماسى قازاقستاننىڭ استاناسىندا دا الدىنا جان سالعان جوق. ولار ەكى التىن مەن ءۇش كۇمىس مەدالدى ولجالادى. اتالعان مەملەكەتتىڭ وكىلدەرى اراسىنان ءابۋيازيد مانتسيگوۆ (72 كيلو) پەن مۇسا ەۆلوەۆ (97 كيلو) تەڭدەسسىز دەپ تانىلسا, سەرگەي ەمەلين (60 كيلو), ستەپان مارانيان (63 كيلو) جانە ارتەم سۋركوۆ (67 كيلو) ەكىنشى ورىندى يەلەندى. الايدا وسى كورسەتكىشكە رەسەيلىكتەردىڭ كوڭىلى تولدى دەپ ايتا المايمىز. سەبەبى بىلتىر بۋداپەشتە وتكەن دۇنيەجۇزىلىك دودادا كورشى ەلدىڭ التى بىردەي بالۋانى التىن تۇعىرعا كوتەرىلگەنى ەسىمىزدە. وسى سەكىلدى تولاعاي تابىستارعا رەسەيدىڭ گرەك-ريم كۇرەسى شەبەرلەرى تالاي مارتە قول جەتكىزگەنىنە سان ميلليون جانكۇيەر كۋا.
يران بالۋاندارىنىڭ دا تابىسى تامساندىرادى. نۇر-سۇلتاندا ولار ءۇش قولانى قورجىنعا سالدى. بۇل جۇلدەلەردىڭ يەگەرلەرى – ءالي رەزا نەجاتي (60 كيلو), مۇحامەدالي گەراەي (77 كيلو) جانە سايد ءابدۆالي (82 كيلو). ءيا, الەم چەمپيوناتتارىندا پارسى ەلىنىڭ ءانۇرانى تىم سيرەك شىرقالىپ جۇرگەنى راس. ەسەسىنە ولار جۇلدەگەرلەر ساناتىنان ءجيى كورىنۋدە. ەگەر ستاتيستيكالىق مالىمەتتەرگە جۇگىنسەك, سوڭعى 10 جىلدا ايتۋلى جارىستا جەڭىپ العان جۇلدەلەر سانى جاعىنان يراندىقتار تەك رەسەي مەن ۆەنگريا قۇرامالارىنان قالىپ كەلەدى. ال وزگە كوماندالاردىڭ بارلىعىنان ولار وق بويى وزىق. ونىڭ ۇستىنە, الەم كۋبوگى تەگەراندا وتەتىنىن دە ەستەن شىعارمايىق. سول سەبەپتى دە ءوز ەلىندە, ءوز جەرىندە جالاۋى جەلبىرەيتىن جارىس جانكۇيەرلەرىن قۋانتۋ ءۇشىن يراندىق اپايتوستەردىڭ ارقايسىسى جاندارىن سالىپ ايقاساتىنى انىق.
كۋبا جايىندا ايتار بولساق, ولاردىڭ دا باعىندىرعان بەلەستەرى وتە زور. ۇلتتىق قۇراما ساپىندا ميحاين لوپەس پەن يسماەل بوررەروداي جۇلدىزدارى بار بوستاندىق ارالى ەلى بالۋاندارى دا باس جۇلدە الۋدى كوزدەپ وتىر. اسا اۋىر سالماقتاعى الىپتاردىڭ بارلىعىن جىعىپ جۇرگەن لوپەستىڭ اتاعىنان ات ۇركەدى. ول – وليمپيا ويىندارىنىڭ ءۇش جانە الەم چەمپيوناتىنىڭ بەس دۇركىن چەمپيونى. پانامەريكا ويىندارىن بەس مارتە ۇتىپ, قۇرلىق بىرىنشىلىگىندە توعىز رەت دارا شىقتى. ەگەر ول 2020 جىلى توكيودا الاۋى تۇتاناتىن وليمپيادادا توپ جارسا, وندا ايتۋلى سپورتشىنىڭ ەسىمى جەكپە-جەك ونەرىندەگى تەڭدەسسىز تۇلعا رەتىندە تاريحتا قالاتىنى داۋسىز. ولاي دەۋگە نەگىز, جەر جاھاندا وليمپيا ويىندارىنىڭ ەڭ بيىك ساتىسىنا ءتورت مارتە كوتەرىلگەن بىردە-ءبىر بالۋان جوق. ال قارسى كەلگەندەردىڭ بارلىعىن قوعاداي جاپىرىپ جۇرگەن 40 جاستاعى ميحاين لوپەستىڭ سول بەلەستى باعىندىرۋعا مۇمكىندىگى زور.
بيىلعى الەم چەمپيوناتىندا كۋبا ءبىر التىن جانە ءبىر كۇمىس مەدالدى ەنشىلەدى. 67 كيلو سالماقتا ايگىلى يسماەل بوررەروعا تەڭ كەلەر ەشكىم تابىلمادى. اسا اۋىر سالماقتا كۇش سىناسۋعا ءتيىس ميحاين لوپەس بوزكىلەمگە شىقپادى. ول ءوز ورنىن ءوزىنىڭ ءىزباسارى وسكار پينوعا بوساتتى. 25 جاستاعى جالىنداپ تۇرعان جاس جولبارىس باپكەرلەردىڭ دە, باسقالاردىڭ دا سەنىمىن اقتادى. نۇر-سۇلتاندا پينو كۇمىس مەدالدى موينىنا ءىلدى.
مىنە, تەگەرانداعى الەم كۋبوگىنىڭ توپتىق سايىسىندا قازاقستان قۇراماسى وسىنداي ازۋلى كوماندالارمەن كۇش سىناسادى. بايراقتى باسەكەدە ءبىز ءوز ورەندەرىمىزگە زور سەنىم ارتامىز. بۇعان دەيىن دە ءبىزدىڭ بالۋاندار ايتۋلى دودادا بىرنەشە رەت باق سىناعان. بىراق ەشۋاقىتتا جۇلدە العان ەمەسپىز. بالكىم, وسى جولى سول ولقىلىقتىڭ ورنى تولار.
نەگىزى بيىلعى الەم چەمپيوناتىندا قازاقستاننىڭ گرەك-ريم كۇرەسى شەبەرلەرى جامان كۇرەسكەن جوق. ءيا, ءوز ەلىمىزدە جالاۋى جەلبىرەگەن جارىستا باس جۇلدەنىڭ بۇيىرماعانى راس. وزەكتى ورتەگەن وكىنىش سول. دەسەك تە قۋانىپ, شاتتانعان كەزدەرىمىز دە بولدى. تورتكۇل دۇنيەنىڭ تەڭدەسسىزدەرى باس قوسقان ءدۇبىرلى دودادا قازاقتىڭ ءۇش بىردەي ورەنى جەڭىس تۇعىرىنا كوتەرىلگەندە ەرەكشە كۇي كەشتىك. جان الىسىپ, جان بەرىسكەن باسەكەلەر بارىسىندا تالاي مىقتىنى جولىنان ىعىستىرعان قورلان جاقانشا (55 كيلو) كۇمىسپەن كۇپتەلسە, مەيرامبەك ايناعۇلوۆ (60 كيلو) پەن الماس كەبىسباەۆ (63 كيلو) قولاعا قول سوزدى. قازاقتىڭ ءور مىنەزدى ۇلدارى وليمپيا ويىندارى مەن الەم چەمپيوناتتارىندا سان مارتە دارالانعان دۇلدۇلدەردى تىزە بۇكتىرگەنىن كورگەندە, كوڭىلىمىز كادىمگىدەي مارقايدى. سونداي كەرەمەتتەردىڭ كۋاسى بولعان ساتتەردە بارشا الاش جۇرتى بورىكتەرىن اسپانعا اتىپ قۋانعانى دا كۇنى كەشەگىدەي كوز الدىمىزدا.
كەلەسى توپتا وزبەكستان, گرۋزيا, جاپونيا جانە ۆەنگريا قۇرامالارى شەبەرلىك بايقاسادى. بۇل مەملەكەتتەردىڭ دە بالۋاندىق ونەردە جەڭىسپەن ورىلگەن باي داستۇرلەرى بار. وعان ەشكىم ءشۇبا كەلتىرە المايدى. نۇر-سۇلتانداعى دودادا جەڭىپ العان جۇلدەلەر سانى جاعىنان گرۋزيندەر مەن جاپوندار جالپى كوماندالىق ەسەپتە تەك رەسەيدى عانا العا جىبەرىپ, ەكىنشى جانە ءۇشىنشى ورىندى ءوزارا ءبولىستى. ولار قوس التىن مەن جالقى كۇمىستى قانجىعالارىنا بايلادى. ماجارستاننىڭ بالۋاندارى جۇلدەلەردىڭ تولىق جيىنتىعىنا يەلىك ەتتى. ياعني, ءبىر التىن, ءبىر كۇمىس جانە ءبىر قولا مەدال الدى. وزبەكتەر دە ءۇش جۇلدەنى قورجىنعا سالدى. «الا تاقيالى» اعايىندارىمىز ءبىر كۇمىس پەن قوس قولانى ەنشىلەدى.
تەگەرانداعى جارىستىڭ توپتىق باسەكەلەرى 28 قاراشادا وتەدى. ءبىزدىڭ جىگىتتەر العاشىندا كۋبا قۇراماسىمەن كۇش سىناسسا, ودان كەيىن رەسەي جانە يران بالۋاندارىمەن باسەكەگە تۇسەدى. 29 قاراشادا الەم كۋبوگىنىڭ جەڭىمپازى مەن جۇلدەگەرلەرى انىقتالادى.
