وزبەكستانىڭ 24 جاستاعى ورەنىنىڭ ەسىمى قازاقستاندىق جانكۇيەرلەرگە دە جاقسى تانىس. ول ءتۇرلى جارىستاردا ءبىزدىڭ جانىبەك ءالىمحان ۇلى, ەرىك ءالجانوۆ, بەكزات نۇرداۋلەتوۆتەرمەن جۇدىرىقتاسىپ, بارلىعىنان دا باسىم تۇسكەن بولاتىن.
75 جانە 81 كيلو سالماق دارەجەلەرىندە كۇش سىناسقان بەكتەمير مەليكۋزيەۆ 2015 جانە 2017 جىلدارى ازيا چەمپيونى اتاندى. ءدال سول جىلدارى دوحا مەن گامبۋرگتە وتكەن الەم بىرىنشىلىكتەرىندە جۇلدەگەرلەر ساناتىنان كورىندى. 2016 جىلى ريو وليمپياداسىنىڭ اقتىق سىنىنا دەيىن القىنباي جەتىپ, شەشۋشى تۇستا كۋبالىق ارلەن لوپەسكە ەسە جىبەردى. ناتيجەسىندە كۇمىس مەدالدى يەلەندى.
ۇستىمىزدەگى جىلدىڭ 13 ماۋسىمىندا كاسىپقوي رينگە شىعىپ, تۇساۋكەسەر كەزدەسۋىندە ارگەنتينالىق مارتين فيدەل ريوستى التىنشى راۋندتا ايقىن باسىمدىقپەن ۇتتى. ودان كەيىن مەكسيكالىق ريكاردو ادريان لۋنا مەن امەريكالىق كلەي كوللاردتى دا ۇرىپ جىقتى.
