بوكس • 16 قاراشا، 2019

بوكس: الماتى مەن ماسكەۋدىڭ جاس ورەندەرى تەڭ ءتۇستى

47 رەتكورسەتىلدى

«الماتىداعى ماسكەۋ كۇندەرى» مادەني باعدارلاما اياسىندا الاتاۋ باۋرايىنداعى اسەم شاھاردا ورنالاسقان «الماتى ارەنا» سپورت كەشەنىندە تاماشا سپورتتىق شارا ۇيىمداستىرىلدى. اتاپ ايتساق، بوكستان جوعارىدا اتالعان قوس قالانىڭ جاسوسپىرىمدەر قۇراماسى ماتچتىق كەزدەسۋ وتكىزدى.

ايتۋلى جارىستا 2004-2005 جىلدارى تۋعان بالعىن بىلعارى قولعاپ شەبەرلەرى باق سىنادى. ولار 12 سالماق دارەجەسى بويىنشا وتكەن سايىستا مىقتىلاردى انىقتادى. قاتىسۋشى كوماندالاردىڭ ساپىندا جاس بولسا دا، ءبىراز بەلەستى باعىندىرىپ ۇلگەرگەن سايىپقىرانداردىڭ از ەمەس ەكەن. ماسەلەن، ماسكەۋ قۇراماسى ءوز جاس ەرەكشەلىكتەرى بويىنشا ەۋروپا جانە رەسەي بىرىنشىلىكتەرىندە جۇلدە العان جاس ورەندەردەن جاساقتالدى. الماتى كومانداسى دا وسال ەمەس. قالاداعى №10  بالالار مەن جاسوسپىرىمدەر سپورت مەكتەبى تۇلەكتەرىنىڭ ءتۇرلى دەڭگەيلى دودالاردا جۇلدە الىپ جۇرگەنىن جانكۇيەرلەر جاقسى بىلەدى. 

  • ­وسىنداي جارىستار وتكىزۋ ەكى جاققا دا ءتيىمدى. ويتكەنى، ءبىر-بىرىنە ۇقسامايتىن مۇلدە بولەك بوكس مەكتەپتەرىنىڭ تۇلەكتەرى ءوزارا كۇش سىناسۋ ارقىلى مول تاجىريبە جيادى. ءوز ارتىقشىلىقتارىن اڭعارىپ، كەمشىلىكتەرىن بايقايدى. ونىڭ ۇستىنە، بۇل ­– كوماندالىق باسەكە. ياعني، شارشى الاڭعا شىققان ءاربىر سپورتشى يىعىنا قانداي جاۋاپكەرشىلىكتىڭ ارتىلعانىن انىق سەزىنەدى. ەگەر ول ۇتىلسا، كومانداسىنىڭ جالپى ەسەپتە جەڭىسكە جەتۋىنە كەسىرى تيەتىنىن جاقسى بىلەدى. سپورتشى سول سەزىم جانە سول رۋحپەن ايقاس الاڭىنا «بەس قارۋىن اسىنىپ»شىعادى. وسى جايتتىڭ بارلىعى دا جاستاردى جىگەرلەندىرەدى. نامىسىن قامشىلايدى. ءبىر سوزبەن ايتساق، بۇل ­­– ۇلكەن تاجىريبە مەكتەبى. دەسەك تە ءبىز وسى ءبىر عانا شارامەن شەكتەلىپ قالماۋىمىز كەرەك. ءاربىر جاقسى ءداستۇرى جالعاسىن تابۋعا ءتيىس. سوندىقتان دا مەن قالا سپورتىنىڭ باسشىسى رەتىندە جۋىردا رەسەي استاناسىنا ىسساپارعا بارۋدى جوسپارلاپ وتىرمىن. سول جاقتا ماسكەۋ قالاسى سپورتى دەپارتامەنتىنىڭ جەتەكشىلەرىمەن كەزدەسىپ، سپورتتىڭ بىرنەشە ءتۇرى بويىنشا ماتچتىق كەزدەسۋلەر وتكىزۋدى داستۇرگە اينالدىرۋدى ۇسىنعىم كەلەدى. وسىنداي باسەكەلەردىڭ قوس تاراپقا دا بەرەرى كوپ، ­– دەيدى الماتى قالاسى سپورت باسقارماسىنىڭ باستىعى رۇستەم بايسەيىتوۆ.

ال شارشى الاڭداعى سايىستارعا كەلەر بولساق، ءوز سالماق دارەجەلەرىندە الماتىلىق مەيىرجان كاربوز (46 كيلو)، ۆلاديسلاۆ ۆايتسەل (48 كەلى)، نۇرعالي كەنگەسباەۆ (52 كيلو)، ءالي كەمەنباەۆ (60 كيلو)، ابىلاي سمان (63 كيلو) جانە ەراسىل اليەۆ (75 كيلو) جەڭىسكە جەتسە، ماسكەۋلىكتەر اراسىنان انتون اۆديەنكو (50 كيلو)، بوريس ەروشكين (54 كيلو)، دانيل موۆا (57 كيلو)، ياروسلاۆ شيحوۆ (66 كيلو)، تەيمۋر تاگيەۆ (70 كيلو) جانە ۆاديم پانوۆتىڭ (80 كيلو) مەرەيى ۇستەم بولدى. ناتيجەسىندە بۇل ماتچتىق كەزدەسۋ تەڭ اياقتالدى. ەسەپ – 6:6. 

ءسوز ورايى كەلگەندە، الماتىدا وتكەن ايتۋلى جارىستىڭ ۇيىمداستىرىلۋ دەڭگەيى جوعارى بولعانىن ايتا كەتۋگە ءتيىسپىز. بالعىن بىلعارى قولعاپ شەبەرلەرىنىڭ باسەكەسىن تاماشالاۋ ءۇشىن بولات نۇرپەيىسوۆ، بوريس تسحۆيراشۆيلي، ەدۋارد گابدۋلوۆ، حاميت باراەۆ، ۆيكتور دەميانەنكو، تۇرسىنعالي ەدىلوۆ، بولات مانكەنوۆ، كارىمجان ءابدىراحمانوۆ، سەرىكجان ەشماعامبەتوۆ سىندى بوكس ارداگەرلەرى «الماتى ارەناعا» ارنايى ات باسىن بۇردى.

 سۋرەتتى تۇسىرگەن سەرجان جيرەنباي  

سوڭعى جاڭالىقتار

جاڭعىرعان جامبىل ءوڭىرى

ايماقتار • بۇگىن، 06:58

باعا QR كودتار ارقىلى بەرىلەدى

مەديتسينا • بۇگىن، 06:53

رۋحاني راۋىشتەگى تارتۋ

ايماقتار • بۇگىن، 06:52

تۇرار تاعدىرىنىڭ تاعىلىمى مول

رۋحانيات • بۇگىن، 06:32

ورىنبور جانە قازاق زيالىلارى

رۋحانيات • بۇگىن، 06:30

ەل ەرتەڭى – جالىندى جاستار

پرەزيدەنت • بۇگىن، 06:16

اۋىر اتلەتتەر كاتارعا اتتانادى

اۋىر اتلەتيكا • كەشە

كوپبالالىلارعا كومەك

ايماقتار • كەشە

كۇلكى كەرۋەنى № 22

رۋحانيات • كەشە

ۇقساس جاڭالىقتار