سەمينارعا اقمولا, قاراعاندى, قوستاناي, سولتۇستىك قازاقستان وبلىستارىنىڭ جانە نۇر-سۇلتان قالاسىنىڭ باس مەملەكەتتىك ەڭبەك ينسپەكتورلارى, يندۋستريا جانە جاڭا تەحنولوگيالار مينيسترلىگى ونەركاسىپتىك دامۋ جانە ونەركاسىپتىك قاۋىپسىزدىك كوميتەتىنىڭ, دەنساۋلىق ساقتاۋ مينيسترلىگىنىڭ, كاسىپوداقتار فەدەراتسياسىنىڭ, «اتامەكەن» ۇكپ, «ەقرعزي» رمكك, «قازمۇنايگاز» ۇك» اق, «قازاقستان تەمىر جولى» اق, «قازاتومونەركاسىپ» ۇاك» اق جانە «BI Group» حولدينگىنىڭ وكىلدەرى قاتىستى.
«قاۋىپسىز ەڭبەك جاعدايلارىن قامتاماسىز ەتۋ – بۇل ەڭبەك جانە حالىقتى الەۋمەتتىك قورعاۋ مينيسترلىگىنىڭ ماڭىزدى باسىمدىقتارىنىڭ ءبىرى. اعىمداعى جىلى «قاۋىپسىز جۇمىس» اقپاراتتىق ناۋقانى اياسىندا ءبىز «اتامەكەن» ۇكپ, كاسىپوداقتار فەدەراتسياسى جانە مۇددەلى مەملەكەتتىك ورگاندار وكىلدەرىنىڭ قاتىسۋىمەن وڭىرلەردە 4 كلاستەرلىك سەمينار وتكىزۋدى جوسپارلاپ وتىرمىز. قىزمەتكەرلەرگە قولايلى ەڭبەك جاعدايلارىن جاساۋعا باعىتتالعان بىرلەسكەن كۇش-جىگەرىمىز عانا كاسىبي قاۋىپتەردى ازايتا الادى», دەدى تولەگەن وسپانقۇلوۆ ءىس-شارانىڭ اشىلۋىندا.
سەميناردا ءسوز سويلەگەن باس مەملەكەتتىك ەڭبەك ينسپەكتورى زياندى ەڭبەك جاعدايلارى بار جۇمىس ورىندارىنىڭ سانىن ازايتۋدىڭ ماڭىزىن اتاپ ءوتتى. بۇگىندە زياندى جانە قاۋىپتى ەڭبەك جاعدايلارىندا قازاقستاننىڭ 497 مىڭ قىزمەتكەرى جۇمىس ىستەيدى, ولار ءۇشىن جۇمىس بەرۋشىلەر قىزمەتكەردىڭ تابىسىنان 5% مولشەرىندە مىندەتتى كاسىپتىك زەينەتاقى جارنالارىن اۋداراتىنىن اتاپ ءوتتى.
«ستاتيستيكا جونىندەگى ۋاكىلەتتى ورگاننىڭ مالىمەتتەرى بويىنشا, 2018 جىلى ساۋالداماعا قاتىسقان كاسىپورىنداردىڭ 1,6 ميلليون قىزمەتكەرىنىڭ 373 مىڭى نەمەسە تورتتەن ءبىرى زياندى جانە قاۋىپتى ەڭبەك جاعدايلارىندا جۇمىسپەن قامتىلعان. بىلتىر 676 مىڭ جۇمىسشى زياندى ەڭبەك جاعدايىنداعى جۇمىسى ءۇشىن ءارتۇرلى وتەماقى الدى. بۇل ءۇشىن جۇمىس بەرۋشىلەرگە 116,3 ملرد تەڭگە ءبولىندى, بۇل 2017 جىلمەن سالىستىرعاندا 8%-عا كوپ», دەدى ول.
ءوز كەزەگىندە قازاقستان كاسىپوداقتار فەدەراتسياسى الەۋمەتتىك-ەكونوميكالىق قاتىناستار جانە الەۋمەتتىك سەرىكتەستىك كوميتەتىنىڭ توراعاسى گۇلنار جۇماگەلديەۆا قاتىسۋشىلارعا رەسپۋبليكا كاسىپورىندارىندا جۇرگىزىلىپ جاتقان الەۋمەتتىك باقىلاۋ تۋرالى ايتىپ بەردى.
«اتامەكەن» ۇكپ ادامي كاپيتالدى دامىتۋ جانە الەۋمەتتىك كاسىپكەرلىك ساياساتى كوميتەتىنىڭ توراعاسى تالعات دوسكەنوۆ «اتامەكەن» ۇكپ-نىڭ قاۋىپسىز ەڭبەك جاعدايلارىن جاقسارتۋ جونىندەگى ۇسىنىستارىن جەتكىزدى.
يندۋستريا جانە جاڭا تەحنولوگيالار مينيسترلىگى ونەركاسىپتىك دامۋ جانە ونەركاسىپتىك قاۋىپسىزدىك كوميتەتى توراعاسىنىڭ ورىنباسارى نىعمەدجان ماقاجانوۆ سەمينار قاتىسۋشىلارىنا قاۋىپتى وندىرىستىك نىساندارداعى ونەركاسىپتىك قاۋىپسىزدىك سالاسىنداعى مەملەكەتتىك باقىلاۋدى قامتاماسىز ەتۋ تۋرالى حابارلادى.
ءىس-شارانى قورىتىندىلاي كەلە, تولەگەن وسپانقۇلوۆ قاۋىپسىزدىك پەن ەڭبەكتى قورعاۋدى ۇيىمداستىرۋ بويىنشا ءتيىستى ناقتى ۇسىنىمدار بەردى.
ەستەرىڭىزگە سالا كەتەيىك, ەڭبەك جانە حالىقتى الەۋمەتتىك قورعاۋ مينيسترلىگى 2019 جىلدى «ەڭبەك قاۋىپسىزدىگى جانە ەڭبەكتى قورعاۋ جىلى» دەپ جاريالاعان بولاتىن. وسىعان بايلانىستى رەسپۋبليكادا اتالعان تاقىرىپقا ارنالعان بىرنەشە ءىس-شارا وتكىزىلەدى. بۇل سەمينار سونىڭ ءبىرى. نەگىزگى ماقساتى – وندىرىستە قاۋىپسىز ەڭبەك جاعدايلارىن قامتاماسىز ەتۋ بويىنشا مەملەكەتتىك ورگانداردىڭ, بيزنەستىڭ جانە قوعامدىق ۇيىمداردىڭ كۇش-جىگەرىن بىرىكتىرۋ.
