وسىنداي مازمۇنى تولىمدى, اسەرى ايتا قالارلىق كەزدەسۋ تسەلينوگراد اۋدانىنىڭ ورتالىعى – اقمولدا وتكىزىلدى. «ەگەمەننىڭ» وتكەن تاريحىن قامتيتىن كورمە ۇيىمداستىرىلىپتى. وسى گازەتتە قىزمەت ەتكەن قالامگەرلەردىڭ ءار جىلدارى جارىق كورگەن جيناقتارى دا مەنمۇندالاپ تۇر. جەرگىلىكتى ونەرپازدار ارقانىڭ ءتورت الىبى – بالۋان شولاق, اقان سەرى, ءبىرجان سال, ۇكىلى ىبىراي اندەرىن شىرقادى. انمەن اجارلانعان كەزدەسۋگە «Egemen Qazaqstan» گازەتىنىڭ جاۋاپتى حاتشىسى سامات مۇسا, «ەگەمەن قازاقستاننىڭ» ارداگەرى باقبەرگەن امالبەك قاتىستى.
– اعا گازەت قازىر ەل تاۋەلسىزدىگىن بەكەمدەپ, ىرگەسىن بەكىتۋگە ايرىقشا اتسالىسىپ وتىر, – دەدى اۋدان اكىمى مالعاجدار تاتكەەۆ وقىرماندارمەن كەزدەسۋدى اشقان سوزىندە. – نازار سالىپ قاراساڭىزدار, باسىلىمداعى ءار ماتەريالدان ەلدىكتى كوكسەگەن ويدى اڭعارار ەدىڭىزدەر. ماعان, اسىرەسە, جۇرتشىلىقتى جاقسى ىستەرگە باعىتتايتىن, جاقسىلىقتى ناسيحاتتايتىن, ەلدىككە ۇيىتقى بولاتىن سالماقتى ءسوزى ۇنايدى. اعا گازەت دەپ ەمەس, الاشتىڭ قامىن ويلاعان اقساقال كەيپىندەگى, اۋزى ءۋالى, ءسوزى ءباتۋالى اتا گازەت دەپ ايتار ەدىم. شىنىندا دا, اقىلمان اتانىڭ جاسىنا جەتىپ وتىر عوي. عۇمىرلى بولسىن.
جۇزدەسۋگە كەلگەن جۋرناليستەر قاۋىمى ءجۇز جىلدىق جىلنامادان ەستەلىكتەر ايتىستى. باسىلىمعا ءار جىلدارى باسشى بولعان يگى جاقسىلاردىڭ شىعارماشىلىق قىزمەتى مەن ۇلت ءۇشىن ەڭبەك ەتكەن قياپات جۇمىستارى كولدەنەڭ تارتىلدى. بۇل تۋرالى تاريح ءپانىنىڭ مۇعالىمى سەرىك قانافين, تسەلينوگراد اۋداندىق اكىمدىگىنىڭ قىزمەتكەرى ديدار ورالبەك ءوز لەبىزدەرىن ءبىلدىردى.
باسىلىم بەتىندە مەملەكەتتىك, ۇلتتىق ماڭىزى بار ماسەلەلەردىڭ ورىندى ءارى وتكىر كوتەرىلۋى دە گازەت وقىرماندارىنىڭ كوڭىلىنەن شىعىپ وتىرعاندىعىن اڭعارۋعا بولادى. وسى ورايدا كەزدەسۋ بارىسىندا كەلەلى ماسەلەلەر كوتەرىلدى. تاراتىپ ايتساق, تاقىرىپ اياسى بىلايشا ورىستەمەك.
– قازاق ءتىلىنىڭ قۋاتىن, كوركەمدىگىن ءبىز وسى گازەتتەن ۇيرەنەمىز. كەيدە كوپ قولدانىلا بەرمەيتىن ارحايزم سوزدەر دە كەزدەسىپ جاتادى. كەيبىرەۋلەر دۇرىس ۇقپاعانىمەن, قازاقتىڭ بار ءسوزى ءوز بوياۋىمەن جازىلعانى دۇرىس. ايتپەسە ءتىلىمىز جۇتاڭ, جاداعاي قالىپتا قالادى. ءتىلىمىزدى ءتىرىلتىپ وتىرعان وسى باسىلىم, – دەدى گازەت وقىرمانى سەرىك قانافين.
شورتاندى اۋدانىندا دا «ەگەمەننىڭ» تويى گازەت وقىرماندارىن ءبىر سەرپىلتىپ تاستاعان اسەرلى كەشكە اينالدى. جينالعان قاۋىم مەرەكەگە ارنايى ۇيىمداستىرىلعان «Egemen Qazaqstan» تاقىرىبىنداعى كورمەنى تاماشالادى. جۇزدەسۋ بارىسىندا وقىرماندار اعا گازەت كوتەرىپ وتىرعان قاداۋ-قاداۋ تاقىرىپتار توڭىرەگىندە وزدەرىنىڭ كوكىرەكتەرىندە جۇرگەن ءنارلى سوزدەرىن تىلگە تيەك ەتتى.
– ءبىزدىڭ اۋداندا اتتوبەلىندەي عانا جەرگىلىكتى ۇلت وكىلدەرى بار, – دەدى اۋداندىق ىشكى ساياسات ءبولىمىنىڭ باسشىسى ساۋلە قاسەنوۆا. – گازەت بىزگە رۋحاني ازىق بولىپ وتىر. مەن, اسىرەسە, تۇلعالار تاقىرىبىمەن بەرىلەتىن الاشتىڭ جاقسى-جايساڭدارىنىڭ ونەگەلى ءومىرى مەن ۇلتقا سىڭىرگەن ەڭبەگى جايلى ءسۇيسىنىپ وقيمىن. گازەتتى تۇراقتى وقىعان ادام كوپ جايعا قانىق بولاتىندىعى ايدان انىق.
وسىنداي كەزدەسۋ قيانداعى جارقايىڭ اۋدانىندا دا وتكىزىلدى. جۋرناليستەرمەن جۇزدەسۋگە اۋدانداعى زيالى قاۋىم, اعا گازەتتىڭ تۇراقتى وقىرماندارى جينالدى.
– اعىنان جارىلىپ اق سويلەيتىن اعا گازەتتىڭ تويى ءبىز ءۇشىن دە قۋانىش,–دەدى اۋدان اكىمى مۇرات بالپان. – بۇل توي جالعىز گازەتتىڭ عانا تويى ەمەس, بارلىق وقىرماندار ءۇشىن اق تۇيەنىڭ قارنى جارىلعان ۇلى توي. ءوزىمىز كۇن سايىن گازەتتى قالت جىبەرمەيمىز. باسىلىمنىڭ بۇگىنگى بەينەسى كوپ كوڭىلىنەن شىعۋدا. بەزەندىرىلۋى دە كوركەم. قازىرگى نارىق زامانىندا گازەت
تاۋار ەسەبىندە. ەگەر وندا وقىرلىق ماتەريال بولماسا, وقىرماننىڭ قولىنا كوركەمدەلىپ, بەزەندىرىلىپ تيمەسە, جازىلىمى دا ولقى بولار ەدى.
كەزدەسۋ بارىسىندا ۇستازدار قاۋىمى «Egemen Qazaqstan» گازەتىنىڭ ءبىلىم سالاسىن تەرەڭنەن قاۋزاپ جازىپ جاتقاندىعىن, ونىڭ وزدەرىنىڭ كۇندەلىكتى شارۋاسىنا سەپتىگىن تيگىزەتىندىگىن ايتىپ, ريزاشىلىق لەبىزدەرىن ءبىلدىردى. زامانا تىنىسىن تامىرشىداي تاپ باسىپ وتىرعان ۇستازداردىڭ ايتۋىنا قاراعاندا, بۇل كۇندە بەل الىپ تۇرعان الەۋمەتتىك جەلىلەردىڭ قايسىبىرىندە جاريالانعان دۇنيەلەردىڭ كوبى ادام سەنبەيتىن جايلار. اقيقات ءسوز, ادال ءسوز ارلى گازەتتە. ارلى گازەت – ءجۇز جىلدىق تاريحى بار «Egemen Qazaqstan» گازەتى.
كوكشەلىك وقىرماندار كوپشىلىك ءسۇيىپ وقيتىن باسىلىمنىڭ باعاسى سالماقتى سوزىندە ەكەندىگىن سانالارىمەن ءتۇيسىنىپ وتىر. جاقسىلىققا جاقىن تۇراتىن جۇرتشىلىق ءجۇز جىلدىق توي ەل ءۇشىن سىڭىرىلەر ەڭبەكتىڭ تاعى ءبىر جارقىن باستاۋى, اسقاق بەلەسى دەسەدى. «بەلەستەن بەلەسكە بەلى تالماي جەتە بەرسىن, ەل گازەتى – «ەگەمەن»!» دەپ اق تىلەكتەرىن جولداپ قالدى.
اقمولا وبلىسى
