رەسپۋبليكالىق قوعامدىق قابىلداۋ بولمەسىنە كەلگەن ارداگەر جۋرناليستەر وراز ءجۇنىس پەن تۇگەل مادەنوۆ تەرميندەر مەن اتاۋ سوزدەرگە قاتىستى ماسەلەنى كوتەردى. ولاردىڭ ايتۋىنشا, قولدانىستاعى قاپتاما, زەرتتەمە, وراما سىندى كەيبىر اتاۋ سوزدەر مەن تەرميندەر قازاق ءتىلىنىڭ زاڭدىلىعىنا قايشى. وراز ءجۇنىس بىرنەشە جىل جوو-دا قازاق تىلىنەن ساباق بەرگەنىن, ءتىل ماسەلەسى وتە نازىك ماسەلە ەكەنىن ايتتى. ارداگەر جۋرناليستەردىڭ ءوز ۇسىنىستارى دا جوق ەمەس. دارحان قىدىرالى ازاماتتاردىڭ تىلەگى رەسپۋبليكالىق تەرمينولوگيالىق كوميسسياعا تاپسىرىلاتىنىن, Nur Otan پارتياسى ساياسي كەڭەسى بيۋروسى باقىلاۋدا ۇستايتىنىن جەتكىزدى.
ودان كەيىن اۋدان اكىمدىگىندە حاتشى, مەكتەپ ديرەكتورى بولىپ قىزمەت ەتكەن قادىلبەك جاعىپاروۆ الپىسقا تارتا ءان شىعارعانىن, ولەڭدەر جازعانىن ايتا كەلە, اندەرىن نوتاعا ءتۇسىرىپ بەرۋ مۇمكىندىكتەرى تۋرالى ءسوز قوزعادى. «الپىسقا جۋىق ءان جازدىم. ونىڭ ارقايسىسىن نوتاعا ءتۇسىرۋ ءۇشىن قوماقتى قارجى كەرەك. وسى ورايدا اندەرىمدى نوتاعا ءتۇسىرىپ بەرۋگە مۇمكىندىك جاساساڭىز دەگەن تىلەگىم بار. ولاردى جاقىندا جارىق كورەتىن كىتابىما قوسسام, بالالارىما مۇرا بولىپ قالسا دەگەن ارمانىم بار», دەدى. زەينەتكەردىڭ تىلەگى نۇر-سۇلتان قالالىق فيلارمونياسىنا جولداناتىن بولدى.
قىتايدان ورالعان قانداسىمىز قايرات قاسىمبەك باعدارلامالاردى قازاق تىلىنە اۋدارۋمەن اينالىسادى ەكەن. ول بۇگىنگى قابىلداۋعا IT تەحنولوگيالارى ارقىلى قازاق ءتىلىن تۇركىتىلدەس حالىقتاردىڭ ورتاق تىلىنە اينالدىرۋ ۇسىنىسىمەن كەلگەن. ونىڭ ايتۋىنشا, ارنايى دىبىستىق اۋدارماشى-باعدارلامالار ارقىلى قاراپايىم قولدانۋشىعا ىڭعايلى ءارى ءتىلىمىزدىڭ ءورىسىن كەڭەيتەتىن مۇمكىندىك بار. دارحان قىدىرالى مەملەكەت باسشىسىنىڭ قازاق ءتىلى تەك مەملەكەتتىك ءتىل ەمەس, ەلىمىزدەگى وزگە ۇلتتاردىڭ دا قولداناتىن ءتىلى ەكەنىن ايتا كەلىپ, ازاماتتىڭ ماسەلەسى ءتىل كوميتەتىنە جولداناتىنىن مالىمدەدى.
Nur Otan پارتياسى ساياسي كەڭەسى بيۋروسىنىڭ مۇشەسى دارحان قىدىرالى ازاماتتاردىڭ قازاق ءتىلى, مادەنيەتى, رۋحانياتىنا قاتىستى ماسەلەلەرمەن قابىلداۋعا كەلۋى حالىقتىڭ Nur Otan پارتياسىن ارىز-تىلەكتەرىنە شەشىم تاباتىن ورىن رەتىندە كورەتىنىن دالەلدەيدى دەيدى. بۇگىن تىڭدالعان تىلەك-تالاپتار ءتيىستى مەكەمەلەرگە جولداناتىنىن, جاۋاپسىز قالمايتىنىن ايتتى.
