تورتكۇل دۇنيە جانكۇيەرلەرى كوز تىككەن جەكپە-جەكتە «كانەلو» لاقاپ ەسىمىن يەلەنگەن 29 جاستاعى مەكسيكانىڭ سايىپقىرانى ساۋل الۆارەس نوكاۋتپەن جەڭىسكە جەتتى. 12 راۋندقا جوسپارلانعان ايقاستىڭ 11 راۋندىندا الۆارەس العاش سول, كەيىن وڭ قولىمەن اۋىر سوققى جۇمساپ, رەسەيلىك بوكسشىنى نوكاۋتقا جىبەردى. جەكپە-جەك باسىندا سەرگەي كوۆالەۆ جوعارى دەڭگەيدە جۇدىرىقتاسىپ, قارسىلاسىن ءبىراز قورعانۋعا ءماجبۇر ەتكەن بولاتىن. بىراق راۋند وتكەن سايىن باسىمدىقتى ءوز قولىنا العان مەكسيكالىق جەكپە-جەك سوڭىندا ءوز دەگەنىنە جەتتى.
WBO نۇسقاسى بويىنشا الەم چەمپيونى اتانعان ساۋل الۆارەس ءتورت سالماق دارەجەسىندە جەڭىسكە جەتكەن ساناۋلى بوكسشىلاردىڭ قاتارىنا ەندى. 56-شى كەزدەسۋىن جەڭىسپەن اياقتاعان «كانەلو» بۇل جەكپە-جەكتە 35 ميلليون اقش دوللارى كولەمىندە گونورار الدى. ال سەرگەي كوۆالەۆ جەڭىلسە دە 12 ميلليون دوللار پايدا تاپتى.
سونداي-اق اتالعان بوكس كەشىندە ورتا سالماقتاعى قازاقستاننىڭ ورەنى مەيىرىم نۇرسۇلتانوۆ تا شارشى الاڭعا شىعىپ, مەكسيكالىق قارسىلاسى كريستيان وليۆاستان ۇپاي سانى بويىنشا باسىم ءتۇستى. وليۆاس قازاقستاندىق بوكس جانكۇيەرلەرىنە جاقسى تانىس. وسى جىلدىڭ 13 ساۋىرىندە ول ورتا سالماقتاعى تاعى ءبىر وتانداسىمىز جانىبەك الىمحان ۇلىمەن WBC Continental Americas تيتۋلى جانە ەكىنشى دارەجەلى WBO Global بەلبەۋى ءۇشىن جۇدىرىقتاسىپ, قانداسىمىزعا ۇپاي سانىمەن ەسە جىبەرگەن بولاتىن.
27 جاستاعى وليۆاس بۇل جولى مەيىرىم نۇرسۇلتانوۆپەن WBC تۇجىرىمى بويىنشا اقش-تىڭ چەمپيوندىق بەلبەۋى ءۇشىن ايقاس وتكىزدى. ءار راۋندتى ءوز پايداسىنا جازعان قازاقستاندىق بوكسشى 10 راۋندقا جوسپارلانعان جەكپە-جەكتە تورەشىلەردىڭ ءبىراۋىزدى شەشىمىمەن جەڭىسكە جەتتى. WBC (USNBC) نۇسقاسىنىڭ بەلبەۋىن يەلەنگەن قانداسىمىز 12,5 مىڭ اقش دوللارىن يەمدەندى. ونىڭ قارسىلاسى جەرلەسىمىزدەن 500 دوللارداي كەم الدى.
سونىمەن قاتار وتكەن سەنبى كۇنى رەسەيدىڭ ەكاتەرينبۋرگ قالاسىندا كاسىپقوي بوكس كەشى ءوتتى. ءبىرىنشى اۋىر سالماقتاعى قازاقستاندىق يسا اقبەرباەۆ رەسەيلىك ەۆگەني تيششەنكومەن اۋىر سالماقتاعى WBO Inter-Continental بەلبەۋى ءۇشىن جەكپە-جەك وتكىزدى.
رەسەيلىك بوكسشى ريو وليمپياداسىنىڭ فينالىندا وتانداسىمىز ۆاسيلي لەۆيتتەن باسىم تۇسكەن بولاتىن. كەزدەسۋدىڭ اقىر سوڭى داۋ-دامايعا ۇلاسىپ, تورەشىلەر ادىلەتسىز شەشىم شىعارعانى جايىنداعى اڭگىمە ءالى كۇنگە دەيىن وربۋدە. اقبەرباەۆ پەن تيششەنكو جۇدىرىقتاسادى دەگەندە لەۆيت جىبەرگەن ەسەنى يسا قايتارادى دەپ ۇمىتتەنگەن بولاتىنبىز. بىراق 2 جىلدىق ۇزىلىستەن سوڭ رينگكە قايتا ورالعان وتانداسىمىز جانكۇيەرلەردىڭ ءۇمىتىن اقتاي المادى. 10 راۋندقا جوسپارلانعان ايقاستىڭ التىنشى راۋندىنان كەيىن قازاقستاندىق بوكسشىنىڭ باپكەرى جەكپە-جەكتى جالعاستىرۋدان باس تارتتى. سونداي-اق 5 راۋندتا اقبەرباەۆ ءبىر رەت نوكداۋنعا تۇسكەن بولاتىن.
كاسىپقوي بوكستاعى جەتىنشى جەڭىسىنە قول جەتكىزگەن ەۆگەني تيششەنكو كەزەكتى رەت WBO Inter-Continental بەلبەۋىن ءساتتى قورعادى.
