جۋىردا ۇقك شەكارا قىزمەتى اكادەمياسىنىڭ ۇجىمى مەن الماتى قالاسىنداعى «جاڭا عاسىر» №175 گيمنازياسىنىڭ اكىمشىلىگى بىرلەسە وتىرىپ, اسكەري پاتريوتتىق تاربيەنىڭ ءرولىن كۇشەيتۋ ءۇشىن گيمنازيادا «جاس شەكاراشى» مامانداندىرىلعان سىنىبىن اشتى.
بۇگىندە اتالعان سىنىپقا 5 سىنىپتا وقيتىن 25 بالا قابىلداندى. ءوز ەركىمەن قابىلدانعان وقۋشىلاردى بۇدان كەيىن شەكاراشى كۋرسانتتار قامقورلىعىنا الىپ, العاشقى اسكەري دايىندىق ساباقتارىن كەستەگە ساي جۇرگىزىپ وتىراتىن بولادى. شەكارا قىزمەتى اكادەمياسىنىڭ وفيتسەرى,
مايور رۇستەم سەيسەمبەكوۆتىڭ ايتۋىنشا, «جاس شەكاراشى» مامانداندىرىلعان سىنىبىنا سايدىڭ تاسىنداي ىرىكتەلگەن, دەنە پىشىندەرى نىق, تۇلا بويى سىمباتتى, سوزدەرى ناقتى, اسكەري كيىمدەرى وزدەرىنە قۇيىپ قويعانداي وقۋشىلار الىندى. ەندى جاس شەكاراشىلارعا اكادەميانىڭ 4-كۋرس كۋرسانتتارى اپتاسىنا ءۇش رەت العاشقى اسكەري دايىندىق ساباقتارىن جۇرگىزەدى.
بۇل سىنىپقا 4-سىنىپتى بىتىرگەن وقۋشى جايدان-جاي قابىلدانا سالمايدى. ارنايى مەديتسينالىق تەكسەرۋدەن ءوتىپ, ءتيىستى انىقتامالارىن تاپسىرادى. باستاۋىش سىنىپتا قالاي وقىعانى دا ەسكەرىلەدى. بەلگىلەنگەن پاندەردەن سىناق تاپسىرا العاندار عانا وقيدى. ودان بولەك ىرىكتەۋ كوميسسياسىنىڭ ساپالى جۇمىسىن قامتاماسىز ەتۋ ءۇشىن مامانداندىرىلعان سىنىپقا ىرىكتەۋ وتكىزۋ جانە دايىنداۋ بويىنشا جۇمىس جوسپارى بەكىتىلگەن. شارا بارىسىندا مامانداندىرىلعان سىنىپقا قابىلدانعان وقۋشىلار بارشا ۇستازدار مەن وقۋشىلار الدىندا انت قابىلداپ, العاشقى اسكەري ساباقتارىنا دايىندىقتارىن كورسەتتى. گيمنازيا ۇجىمىنىڭ الدىندا انت بەردى. ەندى كىشكەنتاي جاس شەكاراشىلار شەكاراشى اعالارىنىڭ ۇيرەتكەن اسكەري ساباقتارىن جەتىك مەڭگەرىپ, گيمنازيا باعدارلاماسىن جاقسى وقىپ, وزىنە جۇكتەلگەن جاۋاپتى مىندەتتى دەر كەزىندە ورىنداۋعا تىرىساتىن بولادى. ءىس-شارا كەزىندە 4-كۋرس كۋرسانتتارى قويان-قولتىق ۇرىس تاسىلدەرىن كورسەتىپ, قارۋمەن ورىندالاتىن اسكەري دەفيلەنى كوپشىلىك نازارىنا ۇسىنسا, اكادەميانىڭ ۇرلەمەلى اسكەري وركەسترىنىڭ ۇجىمى بىرنەشە شىعارمانى ناقىشىنا كەلتىرە ورىندادى. ال گيمنازيا ۇجىمىنىڭ اتىنان «ەركە نۇر» بي ءانسامبلىنىڭ ونەرپازدارى بي بيلەپ, گيمنازيا تريوسى اۋەلەتە ءان شىرقادى. گيمنازيا ديرەكتورى گاۋھار مانەكەەۆا قاتىسۋشىلاردى وسكەلەڭ ۇرپاقتى وتانشىلدىققا تاربيەلەيتىن «جاس شەكاراشى» مامانداندىرىلعان سىنىبىنىڭ قۇرىلۋىمەن قۇتتىقتاپ, ۇلتتىق رۋحتى قالىپتاستىرىپ, ەل تاريحىن تەرەڭ زەرتتەۋدىڭ ماڭىزىن اتاپ ءوتتى. ديرەكتوردىڭ تاربيە ءىسى جونىندەگى ورىنباسارى اينۇر تۇرسىنوۆا «جاس شەكاراشى» مامانداندىرىلعان سىنىبىنىڭ بولاشاعى زور, گيمنازيا وقۋشىلارىن تاربيەلەۋدە ماڭىزدى قادام ەكەنىن جەتكىزدى. وسى رەتتە ەلباسى تاپسىرماسىمەن اتالعان سىنىپ قالاداعى ەڭ ۇزدىك دەپ تانىلعان گيمنازيادا دەر كەزىندە اشىلىپ وتىرعانىن تىلگە تيەك ەتتى.
جانات جابىربەكوۆ,
ۇقك شەكارا قىزمەتى اكادەمياسىنىڭ ءباسپاسوز حاتشىسى
