كەشەننىڭ ءوندىرىس تەحنولوگياسى ءتىرى سالماعى 200-250 كەلى تارتاتىن بۇقاشىقتاردى ساتىپ الىپ, ودان ءارى 9-10 اي ىشىندە 500-550 كەلى سالماققا دەيىن سەمىرتۋگە نەگىزدەلگەن. بورداقىعا بايلانعان مالعا ازىق تاراتۋ جۇمىسى تولىق اۆتوماتتاندىرىلعان. كەشەن 45 ادامدى تۇراقتى جۇمىسپەن قامتىپ وتىر.
- وتكەن جىلدىڭ جەلتوقسان ايىندا وبلىستىق ينۆەستورلىق كەڭەسىندە مال بورداقىلاۋعا ارنالعان مامانداندىرىلعان اشىق الاڭ سالۋ تۋرالى جوبا بەكىتىلگەن بولاتىن. ءبىر جىلعا جەتپەيتىن ۋاقىت ارالىعىندا «استىق يندۋسترياسى» اگروحولدينگىنىڭ قۇرىلىمدىق بولىمشەسى «ەت يندۋسترياسى» سەرىكتەستىگى كەشەن قۇرىلىسىن ساپالى اياقتاپ, پايدالانۋعا بەرىپ وتىر. بۇل كەشەن ءوڭىر ەكونوميكاسىنا زور ۇلەسىن قوسىپ قانا قويماي, جەرگىلىكتى تۇرعىندارىنا جاڭا جۇمىس ورنىن دا اشتى. قازىرگى 5 مىڭ باس – بۇل ءبىرىنشى كەزەڭى عانا. كەشەن تولىق قۋاتىمەن جۇمىس ىستەگەندە 20 مىڭ باسقا دەيىن مال بورداقىلاناتىن بولادى, - دەدى كەشەننىڭ اشىلۋ سالتاناتىنا ارنايى كەلگەن ءوڭىر باسشىسى عالي ەسقاليەۆ.
«ەت يندۋسترياسى» جشس اگروحولدينگىنىڭ باس اكتسيونەرى مۇقان نايىمبەتوۆ «الداعى ۋاقىتتا اگروحولدينگ قوسىمشا 7,5 ملرد تەڭگە قاراجاتتى ينۆەستيتسيالاۋ جانە مال بورداقىلاۋ الاڭىنىڭ قۋاتتىلىعىن 20 مىڭ ءىرى قارا مالىنا جەتكىزۋدى كوزدەپ وتىرعانىن» ايتادى. بۇل – وسى كومپانيا قولعا العان قوستاناي وبلىسىنداعى كەشەننەن كەيىنگى ەكىنشى ءىرى ورتالىق.
وڭىردەگى ەت ءوندىرىسىنىڭ قۋاتىن ەسەلەپ ارتتىراتىن جاڭا جوبانىڭ اشىلۋ سالتاناتىنان كەيىن اۋىل شارۋاشىلىق ونىمدەرىنىڭ جارمەڭكەسى ۇيىمداستىرىلدى. جارمەڭكەدە باۋ-باقشا داقىلدارى, كوكونىستەر قولجەتىمدى باعا دا ساتىلىپ, اۋىل شارۋاشىلىعى سالاسىندا ەلەۋلى ەڭبەك ەتىپ جۇرگەن قىزمەتكەرلەر ماراپاتقا يە بولدى.
باتىس قازاقستان
