ءىس-شارا اياسىندا «جاس سارباز» بالالار ستۋدياسىنىڭ 130 تاربيەلەنۋشىسى سالتاناتتى تۇردە انت قابىلدادى.
ولار كوپشىلىك الدىندا قازاقستان رەسپۋبليكاسىنىڭ اتا زاڭى مەن باسقا دا زاڭدارىن قاتاڭ ساقتاۋعا, پاتريوتتىق رۋحتى بيىك قويىپ, وتاندى قورعاۋعا, ونىڭ مۇددەلەرىنىڭ ەرجۇرەك ءارى باتىل قورعاۋشىسى بولۋعا ۋادە بەردى.
شاكىرتتەرگە قازاقستان رەسپۋبليكاسى قارۋلى كۇشتەرى باس شتابى باستىعىنىڭ ورىنباسارى گەنەرال-مايور مۇحامەدجان قادىرجان ۇلى تالاسوۆ «جاس سارباز» ۇيىمىنىڭ تاربيەلەنۋشىسى ەكەندىگىن راستايتىن كۋالىكتى تابىس ەتتى.
«سىزدەردى بۇگىنگى «جاس سارباز» قاتارىنا قوسىلۋىمەن قۇتتىقتايمىن! سىزدەرگە دەنساۋلىق جانە وقۋدا تابىس تىلەيمىن! ءبىزدىڭ وتانىمىز – قازاقستان رەسپۋبليكاسىنىڭ لايىقتى ازاماتتارى جانە پاتريوتتارى بولىڭىزدار! ەلباسى ايتقانداي ء«وز وتانىندى ىستىق ءسۇيىپ, قادىر-قاسيەتىن ەشقاشان تۇسىرمە, قازاقستاندى ءوز جۇرەگىندە ماقتانىشپەن الىپ جۇرىڭدەر!», دەپ مۇحامەدجان قادىرجان ۇلى شاكىرتتەردى قۇتتىقتادى.
بۇگىنگى كۇنى ەلىمىزدە 6 198 اسكەري-پاتريوتتىق باعىتتاعى وسىنداي سىنىپتار مەن كلۋبتار جۇمىس ىستەيدى. وعان 179 224 تاربيەلەنۋشى مۇشە. انت قابىلداۋ ءراسىمى جاستاردى اسكەري-پاتريوتتىق تاربيە بەرۋدە جان-جاقتى دامىتۋعا, جوبالاردى ىسكە اسىرۋعا, اسكەري-پاتريوتتىق ءىس-شارالارعا قاتىسۋعا باعىتتالعان ىنتىماقتاستىقتى ورناتۋعا ارنالادى. ءىس-شارانىڭ ماقساتى – وسكەلەڭ ۇرپاققا اسكەري-پاتريوتتىق تاربيە بەرۋ, ولارعا وتانعا دەگەن سۇيىسپەنشىلىك سەزىمىن وياتۋ.
