حالىق پەن بيلىك اراسىندا ديالوگ ورناتۋ ماسەلەلەرى تالقىلانعان ءىس-شارانى پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى جانە ەۋرازيالىق ينتەگراتسيا ينستيتۋتى ۇيىمداستىردى. جيىنعا پرەزيدەنت كومەكشىسى – پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى ايدا بالاەۆا, ۇلتتىق قوعامدىق سەنىم كەڭەسىنىڭ مۇشەلەرى ەرلان سايروۆ پەن مۇرات ابەنوۆ, سونداي-اق وبلىستار, نۇر-سۇلتان, الماتى جانە شىمكەنت قالالارى اكىمدىكتەرى اپپارات باسشىلارىنىڭ ورىنباسارلارى, باس پروكۋراتۋرا وكىلدەرى, بەلگىلى ساياساتتانۋشىلار مەن بلوگەرلەر قاتىستى.
باسقوسۋدا پرەزيدەنت كومەكشىسى ايدا بالاەۆا ءسوز الىپ, مەملەكەت باسشىسىنىڭ جولداۋدا كورسەتكەن مەملەكەتتىك تۇراقتىلىقتى ساقتاۋ باعىتىنداعى اتقارىلىپ جاتقان جۇمىستارعا توقتالدى.
– پرەزيدەنت قاسىم-جومارت توقاەۆ بيلىك پەن قوعام اراسىندا تۇراقتى ديالوگ قۇرۋعا باسا ءمان بەرىپ وتىر. جولداۋداعى «حالىق ۇنىنە قۇلاق اساتىن مەملەكەت» تۇجىرىمداماسى حالىقپەن تىعىز قارىم-قاتىناس ورناتۋدى, ازاماتتاردىڭ تالاپ-تىلەگىن نازارعا الىپ, شەشىمىن تابۋدى كوزدەيدى. پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى وسى ماقساتتا قۇرىلدى. بۇگىندە بۇل ءبولىم وتىنىشتەردى ساپالى قاراۋ جۇمىسىن جۇيەلەۋدى قولعا الدى. ءۇش ايدا ەلىمىزدىڭ ءۇش وڭىرىنە بارىپ, ايماقتارداعى ازاماتتاردى قابىلداۋ شارالارىنداعى ىلگەرىلەۋشىلىكتى بايقادىم. بىراق وسى باعىتتاعى جۇمىستى ءالى دە جەتىلدىرە ءتۇسۋ كەرەك. ويتكەنى بىزگە تۇسكەن وتىنىشتەردىڭ اۋقىمدى بولىگى – وڭىرلەرگە تيەسىلى. ءبىراز ماسەلەنىڭ نازاردان تىس قالۋى حالىق پەن ورتالىق مەملەكەتتىك جانە جەرگىلىكتى اتقارۋشى ورگانداردىڭ اراسىندا ءتيىستى دەڭگەيدە بايلانىس جوقتىعىن اڭعارتادى. قازىر ازاماتتار جەرگىلىكتى ورىنداردا قارالاتىن ماسەلەلەرىمەن پرەزيدەنتكە جۇگىنىپ جاتىر. نۇر-سۇلتان قالاسىنا الىستاعى اۋىل-ايماقتاردان ءوز جاقتارىندا دا قاراستىرۋعا بولاتىن ارىز-شاعىمدارىن ايتىپ, ابىگەر بولىپ ارنايى كەلەتىندەر دە بار, – دەدى ا.بالاەۆا.
وسى رەتتە پرەزيدەنت كومەكشىسى ماسەلەلەردى جۇيەلى شەشۋ ءۇشىن ازاماتتاردىڭ ۇنىنە عانا قۇلاق اسپاي, مەملەكەتتىك ورگاندار دا ءبىر-ءبىرىن تىڭداي ءبىلۋى كەرەك ەكەنىن ايتتى. سەبەبى مەملەكەتتىك ورگانداردىڭ ءبىر-بىرىنە سىلتەۋىمەن حالىقتىڭ تالاپ-تىلەگىنە دەر كەزىندە ءمان بەرىلمەي, ماسەلەلەر قوردالانىپ قالادى. وسىنداي ولقىلىقتاردى رەتكە كەلتىرۋ ءۇشىن پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى ارنايى جوبالىق كەڭسە اشقان ەكەن.
– مەملەكەتتىك ورگانداردىڭ جۇمىسىنىڭ ساپاسىن ارتتىرۋ ءۇشىن ءبىز وتىنىشتەردىڭ 90 پايىزىن پرەزيدەنت اكىمشىلىگىنىڭ باقىلاۋىنا الدىق. بۇل جۇمىستى ۇيىمداستىرۋ اياسىندا ءبولىم مەملەكەتتىك ورگانداردىڭ جاۋاپتارى مەن ءوتىنىش بەرۋشىلەردىڭ پىكىرلەرىن تالداۋ مەن ساپاسىنا ەرەكشە نازار اۋدارادى. ءتىپتى تەرىس جاۋاپتىڭ ءوزى, مەنىڭ ويىمشا, ازاماتتىڭ كۇمانىن سەيىلتۋ ءۇشىن نەگىزدى تۇردە جەتكىزىلۋى كەرەك. بولىمدە قۇرىلعان جوبالىق كەڭسە اياسىندا مەملەكەتتىك ورگاندار دەڭگەيىندەگى جۇيەلىك پروبلەمالاردى انىقتاۋ ماقساتىندا وتىنىشتەرگە تالداۋ جۇرگىزىلىپ جاتىر. ءبىز نەگىزسىز نەمەسە ورىنسىز بەرىلگەن جاۋاپتاردىڭ بارلىعىن ورتالىق جانە جەرگىلىكتى اتقارۋشى ورگانداردىڭ وزدەرىنە قايتارىپ جاتىرمىز. وسىلايشا ءارتۇرلى مەملەكەتتىك ورگان قىزمەتكەرلەرىنىڭ بىلىكتىلىك دەڭگەيى دە انىقتالادى. ەگەر ءبىر سۇراق كەلسە, جاۋاپ لايىقتى بولۋى كەرەك. الدىمەن مەملەكەتتىك ورگاندار ءبىر-ءبىرىن تىڭداي ءبىلۋى ءتيىس. ءبىر-ءبىرىمىزدى ەستىگەن بويدا ادامداردىڭ ءۇنى دە قۇلاعىمىزعا جەتەدى. وتىنىشتەردى قاراۋ كەزىندە ارتىق بيۋروكراتيالىق كەدەرگىلەر مەن راسىمدەردى جويۋ, ۆەدومستۆوارالىق ىنتىماقتاستىقتىڭ تىكەلەي ارنالارىن قۇرۋ جانە اتقارۋشى ءتارتىپتىڭ ساپاسىن قامتاماسىز ەتۋدىڭ ماڭىزى زور. قازىر ۇكىمەت, مينيسترلىكتەر, بارلىق مەملەكەتتىك ورگاندار, ونىڭ ىشىندە اۋىلدىق, اۋداندىق دەڭگەيلەرگە دەيىن ازاماتتاردىڭ سۇراعىنا تىكەلەي جاۋاپ بەرەتىن ادامدار انىقتالدى. ءبىز ءوزارا تىعىز قارىم-قاتىناستا بولۋىمىز كەرەك. ءاربىر ۇندەۋ ءتيىمدى قارالۋى ءتيىس, – دەدى پرەزيدەنت كومەكشىسى.
جيىندا ۇلتتىق قوعامدىق سەنىم كەڭەسىنىڭ مۇشەلەرى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ازاماتتىق قوعامدى قالىپتاستىرۋداعى ءرولى تۋرالى ايتىپ بەردى. ەرلان سايروۆ بۇل تۇجىرىمدامانى جاڭا ءداۋىردىڭ باستاۋىندا تۇرعان باسىم باعىت رەتىندە اتاپ, ەلدىڭ تۇراقتىلىعى ساياسي جانە ەكونوميكالىق دامۋمەن عانا ەمەس, وسىنداي ازاماتتىق جاۋاپكەرشىلىكتى كۇشەيتۋ فاكتورلارىمەن نىعاياتىنىن العا تارتتى.
ال مۇرات ابەنوۆ شەنەۋنىكتەر شىن مانىندە جالدامالى مەنەدجەرلەر ەكەنىن, حالىققا قىزمەت ەتەتىنىن ۇمىتپاۋى كەرەك ەكەنىن ەسكە سالدى. ول اشىقتىق ماسەلەسىنە توقتالىپ, ازاماتتار قاي سالاعا قاراجاتتىڭ قالاي جۇمسالىپ جاتقانىن ايقىن ءارى تۇسىنىكتى تۇردە كورە الۋى كەرەك ەكەنىن ايتتى.
سونىمەن قاتار وتىرىستا باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ وكىلى اسحات يبراەۆ بايانداما جاسادى. ونىڭ ايتۋىنشا, مەملەكەتتىك ورگاندارعا 1,7 ملن ءوتىنىش تۇسكەن. ونىڭ ىشىندە 236,2 مىڭ ءوتىنىش جەر ماسەلەلەرىنە قاتىستى بولعان. بۇعان قوسا, تۇرعىن ءۇي-كوممۋنالدىق شارۋاشىلىق ماسەلەلەرى جونىندە 120,5 مىڭ ءوتىنىش, ەڭبەك جانە الەۋمەتتىك قورعاۋ بويىنشا 129,7 مىڭ تالاپ-تىلەك
تۇسكەن.
