رەسەي فەدەراتسياسىنىڭ كورمە قازاقستان رەسپۋبليكاسىنداعى ەلشىلىگى مەن قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ قولداۋىمەن وتكىزىلىپ وتىر. سپورت پەن كوركەم ونەردى ءبىر ارناعا توعىستىرعان جوبا حالىقارالىق «كرافت-پاۆلوۆ» زاماناۋي ونەردى قولداۋ قايىرىمدىلىق قورى جانە يمپەراتورلىق پراۆوسلاۆيەلىك پالەستينالىق قوعامنىڭ ۇيىمداستىرۋىمەن جۇزەگە استى. كورمەگە قويىلعان كارتينالاردىڭ نەگىزگى جەلىسى جەر بەتىندەگى ميللياردتاعان ادام قىزىعا كورەتىن فۋتبولدىڭ جارقىن الەمىنە قۇرىلعان.
ءىس-شارانىڭ اشىلۋ سالتاناتىندا ءسوز العان ۇلتتىق مۋزەيدىڭ ديرەكتورى ارىستانبەك مۇحامەدي ۇلى: «بۇل – ەكى جىل بويى بەلسەندى تۇردە جۇزەگە اسىرىلىپ كەلە جاتقان, قازاقستان مەن رەسەي فەدەراتسياسىنىڭ اراسىنداعى دوستىق قارىم-قاتىناستى كورسەتىپ, ەكى ەلدىڭ مادەني بايلانىستارىن ارتتىرا تۇسەتىن جوبا. «ونەردەگى دوپ» كورمەسى العاش رەت 2018 جىلى ماسكەۋدە فۋتبولدان الەم چەمپيوناتى ءوتىپ جاتقان ۋاقىتتا ۇيىمداستىرىلىپ, ۇلكەن جەتىستىككە جەتىپ, تانىمال بولعان ەدى. كورمەدەگى كەرەمەت تۋىندىلار فۋتبولدان الەم چەمپيوناتى كەزىندەگى ساۋلەلى ساتتەردى ەسكە سالادى», دەدى.
ەكسپوزيتسيادا رەسەيلىك جانە شەتەلدىك تانىمال سۋرەتشىلەردىڭ فۋتبول الەمىنە, ونىڭ گۋمانيستىك قۇندىلىقتارىنا ارنالعان 100-دەن استام تۋىندىسى ۇسىنىلدى.
پارلامەنت ءماجىلىسىنىڭ ۆيتسە-سپيكەرى ۆلاديمير بوجكو: «قازاقستان مەن رەسەي اراسىندا مادەني بايلانىس جوعارى دەڭگەيدە ەكەنىن اتاپ وتكەن ءجون. قارىم-قاتىناستىڭ بۇل ءتۇرى ەكى ەل اراسىنداعى ستراتەگيالىق بايلانىسقا وڭ ىقپال ەتىپ, ءبىر-ءبىرىمىزدىڭ جەتىستىگىمىزگە ورتاقتاسىپ, حالىقتار اراسىندا ءوزارا تۇسىنىستىك ورناتادى. بۇل شارا رەسەي فەدەراتسياسى وتكىزگەن الەم چەمپيوناتىنا ارنالادى. اتالعان ءدۇبىرلى چەمپيونات كەزىندە ۇيقىسىز تۇندەر, ءتۇرلى تىلەكتەر, قولداۋلار مەن زور ەڭبەك بولدى. بۇل كورمەنىڭ الداعى ۋاقىتتا وزگە ەلدەردە كەڭىنەن ناسيحاتتالىپ, ۇلكەن جەتىستىكتەرگە قول جەتكىزۋىنە تىلەكتەسپىن», دەپ جىلى لەبىزىن جەتكىزدى.
«ونەردەگى دوپ» كورمەسى العاش رەت FIFA-2018 فۋتبولدان الەم چەمپيوناتى ءوتىپ جاتقان ۋاقىتتا ۇيىمداستىرىلىپ, حالىقارالىق رەزونانس تۋدىردى. «جول كارتاسى» پاريج, بەيجىڭ, موناكو, جەنەۆا, بەرلين, لوندون, سەۋل, باكۋ جانە ت.ب. ارقىلى وتەتىن ارت-كورمەنىڭ الەمدىك تۋرنەسى نۇر-سۇلتاننان باستاۋ الدى. «ونەردەگى دوپ» ارت-كورمەسىن 2020 جىلعى جازدا فۋتبولدان ەۆرو-2020 ماتچتارى وتەتىن ۋاقىتتا سانكت-پەتەربۋرگتەگى «مانەجدە» وتكىزۋ جوسپارلانۋدا. حالىقارالىق ارت-تۋرنەنىڭ مارەلىك نۇكتەسى فۋتبولدان كەلەسى 2022 جىلعى الەم چەمپيوناتىنىڭ قارساڭىندا دوحادا (قاتار) بولماق.
جوبانىڭ ۇيىمداستىرۋشىلارى ەلەنا كرافت پەن ەلەنا اگاپوۆا حالىقارالىق اتالعان ارت-جوبانىڭ قازاق جەرىندە وتۋىنە قولداۋ كورسەتكەنى ءۇشىن قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆكە ەرەكشە العىسىن ءبىلدىردى. «ونەردەگى دوپ» جوباسىنىڭ ۇيىمداستىرۋشىلارى سونىمەن قاتار قازاقستان رەسپۋبليكاسى مادەنيەت جانە سپورت مينيسترلىگىنىڭ, قازاقستان رەسپۋبليكاسى ۇلتتىق مۋزەيىنىڭ, قازاقستان فۋتبول فەدەراتسياسىنىڭ باسشىلىقتارىنا ريزاشىلىقتارىن ءبىلدىردى.
