«ەگەمەننىڭ» 90, 95 جىلدىق مەرەيلەرىن اتاپ ءوتىپ, وعان ارىپتەستەرىممەن بىرگە قاتىستىم. باسىلىمنىڭ سەگىز قاباتتى جاڭا عيماراتىنا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ كەلىپ, بارشا ۇجىم مۇشەلەرىن 90 جىلدىقپەن قىزۋ قۇتتىقتاعانىن ۇمىتپايمىز. ەندى مىنە, ەل گازەتىنىڭ جاسى 100-گە كەلەدى. ءبىر عاسىر. وسى جىلدارى ونىڭ ءار سانى سايىن قازاق حالقىنىڭ تاعدىرىنا, ءتىلى مەن دىنىنە, جەرى مەن سۋىنا, كەلەشەگىنە بايلانىستى قاداۋ-قاداۋ كۇردەلى ماسەلەلەردىڭ كوتەرىلگەنى ايان. قاي كەزدە بولماسىن باسىلىم پرەزيدەنت تاپسىرماسىمەن تياناعى كەلتىرىلگەن تابىستى ىستەرگە بايىپتى كوزقاراس ۇستانۋىمەن, ەلباسىنىڭ سىندارلى ساياساتىن حالىققا قالتقىسىز جەتكىزۋىمەن بيىك ءارى قۇندى. قازىرگى كەزدە «قازاقستان-2050» ستراتەگياسىن, «ماڭگىلىك ەل» ۇلتتىق يدەياسى, «نۇرلى جول – بولاشاققا باستار جول» جولداۋىنان تۋىنداعى ۇلىلىقتار گازەت بەتىندە جارقىراي ءتۇستى.
باسىلىم تىزگىنىن حالقىمىزدىڭ ماڭدايى جارقىراعان مارعاسقا ۇلدارى ۇستادى. ولاردىڭ قاتارىندا قازاق دەگەن قاسيەتتى ۇلتتىڭ ارقالى ازاماتتارى سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابيت مۇسىرەپوۆ, شەرحان مۇرتازا, ءابىش كەكىلباەۆ جانە تاۋەلسىزدىگىمىزدىڭ العاشقى تاريحي ساتتەرى مەن جاقسىلىعىن تۇڭعىش پرەزيدەنتپەن بىرگە جەر شارىن اينالعان, بۇگىندە حالىق قالاۋلىسى ساۋىتبەك ابدراحمانوۆ تا بار. بۇگىنگى تولقىن سول باستامالاردى جاڭاشا قىرىنان جارقىراتا تۇسكەنى دە قۋانتادى. گازەتتىڭ باسقارما توراعاسى دارحان قىدىرالى باستاعان ۇجىم ەلدىك پەن بىرلىكتىڭ ءۇنى بولعان «ەگەمەننىڭ» ءار سانىن قازاق حالقىنا ەڭ جاقىن تۋعان جەر, تۋعان وتان ەكەنىن مويىنداتاتىن دۇنيەلەردى بەرىپ كەلەدى. وسىلايشا ءار سانىن قولعا العان سايىن وقىرمانعا, ۇرپاققا وي سالاتىن ماقالالار مەن زەرتتەۋلەردى قىزىعا وقيمىن. دەمەك كوك بايراقتىڭ استىنا توپتاسقان الاش ءسوزىنىڭ قۇدىرەتى بيىكتەپ, ەرتەڭگى كۇنىمىزدىڭ كوكجيەگىن كەڭەيتەتىنى كامىل. بىزگە باسقا نە كەرەك؟!
باس باسىلىمدى وقىرماندار «ەل گازەتى» دەپ اتاپ كەتكەن. ورىندى بەرىلگەن باعا. ءجۇز جىلدىق تاريحىندا «ەگەمەن قازاقستان» حالقىمەن بىرگە تىنىستادى. جەتىستىگىن پاش ەتتى. كەمشىلىككە ەلىمەن بىرگە قابىرعاسى قايىستى. وسىنىڭ ءبارىن گازەت ۇجىمىنىڭ جۇدىرىقتاي جۇرەك سۇزگىلەرىنەن وتكىزگەنى قانداي عانيبەت.
اپتاسىنا بەس مارتە وقىرمانمەن قاۋىشاتىن باسىلىمعا ويى مەن قالامى جۇيرىك كاسىبي جۋرناليستەر عانا شىداس بەرەدى. العاش ءدام-تۇز بۇيىرىپ, الماتى وبلىسىنداعى مەنشىكتى ءتىلشى قىزمەتىنە كىرىسكەندە ءوز باسىمنان ونى مەن دە وتكەردىم. جانە وسى ۇجىمداعى جۇمىستىڭ قاۋىرت ءارى جاۋاپكەرشىلىگى جوعارىلىعىنا قاراماستان دوستىق پەيىل, ۇلكەننىڭ ۇلاعاتى, كىشىنىڭ قۇرمەتى ورنىمەن ەكەندىگى كوزگە ۇرىپ تۇردى. سوندىقتان بولار, جەتى جىلعا جۋىق قىزمەتىم كوزدى اشىپ-جۇمعانشا تەز ءوتىپ كەتكەندەي بولادى.
جۇمىسقا قابىلدانعاننان كەيىن كوبىنە گازەت باسشىسىنىڭ ورىنباسارى بولعان, مارقۇم ەرجۇمان سمايىل, باس رەداكتور جانبولات اۋپباەۆپەن, جاۋاپتى حاتشى جانات ەلشىبەكوۆپەن ءجيى حابارلاسىپ, اتقارىلاتىن, جازىلاتىن ماسەلەلەر جايلى تاپسىرما الامىز. جارىقتىق ەراعانىڭ (ەرجۇمان) اڭگىمەسى قىسقا ءارى نۇسقا بولاتىن. شىركىن, ەلىمىزدەگى بار جاڭالىقتى كومپيۋتەرشە باسىندا ۇستايتىن ەدى عوي. ءبارىن شاعىپ, نە جازاسىڭ, اۋقىمى قانداي ەكەنىن الدىڭا جايىپ سالاتىن. جانبولات پەن جانات تا ناقتىلىقتى ۇناتادى. مىنە, وسىلايشا «ەگەمەندىكتەردىڭ» قامقورلىعىن كوردىم. سەنىم بىلدىرگەننەن كەيىن قالاي عانا قاناتتانبايسىڭ؟ الماتى بولىمشەسىن باسقاراتىن قازاقتىڭ قابىرعالى اقىنى قورعانبەك امانجول «كۇمىسجان بايجان, باقتيار تايجان, گازەتتىڭ بەتىن بەرمەيدى, كەلدى بۇلار قايدان؟» دەپ ءازىل شىعاردى. ەڭبەگىمىزدى ۇكىلەگەن وسىنداي ارىپتەستىك نيەت-پەيىل جاراسىم تاباتىن.
قانشا جەردەن ءوزىم بىلەم, وسى جەتىستىككە ءوز قابىلەت-قارىمىممەن جەتتىم دەگەنمەن جىبەك جىپتەي بولسا دا ارىپتەستەردىڭ قامقورلىعى, جاناشىرلىعى سەزىلدى. ارينە ونى ۇمىتۋ مۇمكىن ەمەس. استاناعا بارعان سايىن ۇجىمنىڭ وسىنداي نيەتى مەن پەيىلىنە بولەندىم. گازەتتىڭ قادىرمەندى قارياسى, قالامى جۇردەك ارىپتەسىم قازاقستاننىڭ قۇرمەتتى ءجۋرناليسى قايسار ءالىم «كۇمىسجاننىڭ قولىن بايلاپ قويسا دا جازا بەرەدى» دەگەنىن از-كەم ەڭبەگىمە بەرىلگەن اعالىق, ارىپتەستىك تىلەگى دەپ قابىلدادىم. ارىپتەستەرىم جۇماگۇل سولتى, گۇلزەينەپ سادىرقىزى, ايناش ەسالى, باقىت بالعارينا تاعى باسقالارى وتباسىنداعى اياۋلى انا, اجە بولۋمەن قاتار جاۋاپكەرشىلىگى ءزىل باتپان اۋىر كاسىپتەرىنە ادال بولىپ, قازاق قىزى دەگەن اتقا لايىق بەينەتتەرىنىڭ زەينەتىن كورىپ, عۇمىر كەشۋدە.
گازەتتىڭ تاريحى تىم تەرەڭدە. ول – قازاق ەلىنىڭ, قازاق ۇلتىنىڭ تاريحى.
«ەگەمەننىڭ» سارعايعان بەتتەرىندە تالاي ۇلىلاردىڭ تەرەڭ ويى مەن ۇشقىر پىكىرىنىڭ, ەلى مەن جەرىنە دەگەن پەرزەنتتىك ماحابباتىنىڭ اتويلاپ جاتقانى شىندىق. سولاردىڭ قاتارىندا مەنىڭ دە قولتاڭبامنىڭ قالعانىن ەسىمە السام, تاعدىرىما ريزا بولامىن.
قالام قارىمىنا سۇيەنگەن ءجۋرناليستىڭ باقىتى مەن باعى جازعان-سىزعانى. ول – ۇشقىر حابار, تۇششىمدى رەپورتاج, جاقسى ماقالا, تەرەڭ زەرتتەۋ, وچەرك, تاعىسىن-تاعىلار. ۋاقىتىڭدى سوعان ارنايسىڭ. قانداي مەرەكە, جيىنداردا بولسىن, ءوزىڭدى, ويىڭدى سەرگەك ۇستايسىڭ. بىلاي ايتساق, بايگەگە قوساتىن سايگ ۇلىكتەي بابىڭدا جۇرگەندەيسىڭ.
ەڭبەكتىڭ زەينەتىن كورۋ دە ءبىر باقىت. بىراق قالامىڭ اق قاعازدى اڭساپ تۇرادى. سوسىن ۇستەل باسىنا وتىراسىڭ. مىنا ومىرگە, تاعدىرىڭا دەگەن ادامدىق پەيىلىڭ وسىلاي ارناسىنان اسىپ جاتادى. سوعان مىڭ شۇكىر.
كۇمىسجان بايجان,
«ەگەمەننىڭ» ارداگەرى, قازاقستاننىڭ مادەنيەت قايراتكەرى, الماتى وبلىسىنىڭ قۇرمەتتى ازاماتى
