ەگەمەن ەلىمىزدە قۇتقارۋشىلارعا قۇرمەت كورسەتىپ, وزدەرىنە جۇكتەلگەن مىندەتتى ورىنداۋ كەزىندە قازا تاپقان ماماندىق يەلىرىنىڭ رۋحىنا تاعزىم ەتۋ ءۇشىن اقتوبە قالاسىندا قولادان ەسكەرتكىش قويىلدى.
قۇتقارۋشىلار ساياباعىندا ورناتىلعان ەسكەرتكىش-مونۋمەنتتىڭ جالپى بيىكتىگى 4,7 مەتر. ونىڭ تۇعىرىنا «تاۋەلسىز قازاق ەلىنىڭ قۇتقارۋشىلارىنا تاعزىم» دەگەن قاستەرلى سوزدەر لاتىن تىلىندە جازىلعان. قاۋىپ-قاتەرى مەن جاۋاپكەرشىلىگى مول ماماندىق يەلەرىنە قويىلعان ەسكەرتكىش اقتوبە وبلىسىنىڭ ازاماتتىق قورعانىس ۇيىمدارى مەن ارداگەرلەر كەڭەسىنىڭ باستاماسى بويىنشا بوي كوتەرگەن. ونىڭ قارجىلىق شىعىنىڭ قۇتقارۋشىلاردىڭ جانكەشتى ەڭبەكتەرىنە اركەز قۇرمەتپەن قارايتىن مەتسەنانت-كاسىپكەرلەر تولەگەن.
ەسكەرتكىشتىڭ اشىلۋ راسىمىنە قاتىسۋشىلار كاسىبي مىندەتتەرى مەن پارىزدارىن ورىنداۋ كەزىندە قۇتقارۋشىلاردىڭ رۋحىنا باس ءيىپ, ءبىر مينۋت ءۇنسىز تۇردى. سودان سوڭ اقتوبە قالاسىندا №6555 اسكەري ءبولىمنىڭ جاۋىنگەرلەرى بىرنەشە دۇركىن اسپانعا وق جاۋدىرىپ, قۇرمەت پەن تاعزىم بەلگىسىن كورسەتتى.
