تالدىقورعان قالاسىندا جۇرتشىلىقپەن كەزدەسكەن مەملەكەت باسشىسىنىڭ كومەكشىسى «نۇر وتان» پارتياسىنىڭ وبلىستىق فيليالىندا قوعامدىق قابىلداۋ وتكىزدى.
–كەز كەلگەن ماسەلەنىڭ دۇرىس شەشىمىن تاۋىپ, تۇرعىندارعا ءتيىمدى بولۋىنا مەملەكەتتىك بيلىك پەن قوعامدىق ۇيىمدار بىرلەسكەندە عانا قول جەتكىزە الامىز. ول ءۇشىن كەمشىن ءتۇسىپ, ولقى سوعىپ جاتقان ماسەلەلەردى اشىپ جەتكىزۋ – بارشانىڭ باستى مىندەتى. ياعني, ءاربىر تۇرعىن مەملەكەتتىڭ دۇرىس دامۋىنا جاريالىلىقپەن, اشىقتىقپەن ۇلەس قوسا الادى. ەلىمىزدە وسى باعىتتاعى شارالار قولعا الىنىپ, ءاربىر وڭىردە قوعامدىق كەڭەستەردىڭ جۇمىسى جاندانۋدا. ەڭ باستىسى, بيلىك پەن قوعامدىق ۇيىمدار بىرلەسە, كەڭەسە قادام باسقاندا عانا جاقسى ناتيجەگە قول جەتكىزەتىنىن ۇمىتپاۋىمىز كەرەك. مەنىڭ بۇگىنگى ساپارىم دا وسىعان نەگىزدەلگەن, – دەدى قوعامدىق قابىلداۋ بارىسىندا ايدا عالىمقىزى.
جەتىسۋ تۇرعىندارى وزدەرىن الاڭداتقان ماسەلەلەردى اشىق ايتىپ, تولعاندىرعان ساۋالدارعا جاۋاپ ىزدەدى. پرەزيدەنتتىڭ كومەكشىسى – پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى مەڭگەرۋشىسىنىڭ قوعامدىق قابىلداۋىندا كوتەرىلگەن ماسەلەلەر بىرنەشە باعىتتى قامتىدى. ايتىلعان پىكىرلەردى سالماقتاي كەلگەندە, وڭىردە جەكە وتباسىلىق جاعدايدان باستاپ, كۇللى جۇرتشىلىقتى الاڭداتقان بىرقاتار وزەكتى ماسەلەلەر بارى ايتىلدى. اسىرەسە قابىلداۋعا جازىلعان اۋىل تۇرعىندارى رەسپۋبليكالىق, وبلىستىق دەڭگەيدەگى اۆتوجول بويىندا كىسى ءولىمىنىڭ ءجيى ورىن الاتىنىنا الاڭداۋشىلىق ءبىلدىردى. ال قالا ماڭى تۇرعىندارى قورشاعان ورتانى لاستاعان كاسىپورىنداردىڭ بەيقامدىعىنا نارازىلىق ءبىلدىرىپ, جەرگىلىكتى اتقارۋشى بيلىكتىڭ دارمەنسىزدىگىنە شاعىمداندى.
سونداي-اق قوعامدىق قابىلداۋ كەزىندە تۇرعىندار اۋدان ورتالىقتارىنداعى نەگىزگى كوشەلەردىڭ ءالى كۇنگە دەيىن اسفالتتالماعانىنا نالىپ, مەديتسينالىق قىزمەت كورسەتۋ ىسىندە ولقىلىقتارعا جول بەرىلەتىندىگىن دە جاسىرمادى. نەگىزىنەن اۋىلدىق وڭىردەن كەلگەن تۇرعىندار زەينەتكەرلەردى ەمدەۋدىڭ جولدارىن جۇيەلەندىرۋ كەرەكتىگىن, كارىز جۇيەلەرىنەن شىققان جاعىمسىز ءيىستىڭ كورشىلەردى مازالايتىنىن, جۇگەرى وسىرۋشىلەرگە بەرىلەتىن سۋبسيديانىڭ تەك ءونىم العان سوڭ عانا قولعا تيەتىنىن, اۋىلشارۋاشىلىق تەحنيكاسىن ليزينگپەن الۋدىڭ تيىمسىزدىگىن ايتسا, شاعىمدانۋشىلاردىڭ ءبىر توبى كسرو كەزىندە جيناق كىتاپشاسىندا جيناقتالعان سومالاردىڭ قايتارىلماي قالعانىن, قىلمىستىق ءىستى تەرگەۋدى قولعا العان تەرگەۋشىلەردىڭ ءجيى اۋىساتىنىن, سول ارقىلى شاعىمدانۋشى ارىزىنىڭ اياقسىز قالاتىنىن جايىپ سالدى.
بۇقارا تاراپىنان ايتىلعان ماسەلەلەردى ساراپتاي كەلە, ايماق تۇرعىندارىن الاڭداتقان بىرنەشە جاعداي سىن تەزىنە الىندى. ولاردىڭ قاتارىندا وبلىس بويىنشا جۇمىسسىزدىقتىڭ ستاتيستيكالىق كورسەتكىشى ناقتى دەرەكتەرمەن سايكەسپەيتىنىن, مۇگەدەك بالالاردىڭ ءبىلىم الۋىنا بەرىلەتىن كومەكتەر مەن مۇمكىندىكتەردىڭ جۇيەلەنبەگەنى جايىندا سۇراقتار وتكىر تۇر ەكەن. باسپانا كەزەگىنە قاتىستى داۋ-دامايدىڭ كوپتىگى مەن كوپ بالالى انالاردىڭ جانايقايى دا كەزدەسۋدە نازاردان تىس قالمادى.
قوعامدىق قابىلداۋعا كەلگەن 106 ادامنىڭ ارىز-ارمانىن مۇقيات تىڭداعان ايدا عالىمقىزى جەرگىلىكتى جەردە شەشىلەتىن ماسەلەلەرگە جاۋاپتى لاۋازىمدى شەنەۋنىكتەردى سىنعا الىپ, تۇرعىندار ءوتىنىشىنىڭ بارلىعى پرەزيدەنت اكىمشىلىگىنە جەتكىزىلەتىنىن ايتتى.
–تۇرعىندار تاراپىنان ايتىلعان تىلەكتەر مەن تالاپتار پروتوكولعا كىرگىزىلدى. سوعان بايلانىستى بارلىق ماسەلەلەردى قاجەتتى دەڭگەيدە قاراستىراتىن سالالاردىڭ باسشىلارىنا جەتكىزەمىن. ايتىلعان بارلىق ماسەلە زاڭ اياسىندا شەشىلەدى دەپ سەنەمىن, – دەدى قوعامدىق قابىلداۋدى قورىتىندىلاعان سوزىندە قازاقستان رەسپۋبليكاسى پرەزيدەنتىنىڭ كومەكشىسى – پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى ا.بالاەۆا.
الماتى وبلىسى
