وسى جاڭالىقپەن فەيسبۋك الەۋمەتتىك جەلىسىندە بولىسكەن اقتوبە وبلىسىنىڭ اكىمى وڭداسىن ورازالين: «بۇگىن ارحەولوگتاردان اقجولتاي حابار كەلدى. تەمىر اۋدانىنىڭ تاسقوپا ەلدى مەكەنىنىڭ ماڭىنان ب.ز.د. V عاسىردا التىن كيىممەن جەرلەنگەن سارمات كوسەمىنىڭ قورعانى تابىلدى. كەزەكتى «التىن كيىمدى كونە ەسكەرتكىش» – اقتوبە ءوڭىرىنىڭ عانا ەمەس, ءبۇتىن قازاق ەلىنىڭ تاريحىندا ەرەكشە ورىن الاتىن تاريحي قۇندىلىق.
كەشەگى ەسىك قالاسىنان, شىعىس پەن اتىراۋدان تابىلعان كونە ەسكەرتكىشتەردىڭ جالعاسى بۇگىن اقتوبە جەرىنەن دە كورىنىس بەردى. بۇل دەگەنىمىز سول زاماندا قازاق جەرىن مەكەندەگەن بابالارىمىز وركەنيەتتىڭ جوعارى ساتىسىندا ءومىر سۇرگەندىگىن كورسەتەدى. «بۇل قويناۋى قۇتتى, تاريحى تەرەڭدە جاتقان اقتوبە وڭىرىنەن تابىلعان قۇندىلىقتاردىڭ باستاماسى عانا دەپ بىلەمىن. مۇنداي تاريحي جادىگەرلەر ءالى دە كوپتەپ تابىلىپ, دۇنيە ءجۇزىنىڭ الدىندا قازاق ەلىنىڭ مارتەبەسىن كوتەرەدى دەپ سەنەمىن», دەپ جازدى.
ايتا كەتەيىك, جوعارىدا اتالعان اۋماقتاعى قازبا جۇمىستارىن ءا.مارعۇلان اتىنداعى ارحەولوگيا ينستيتۋتىنىڭ قىزمەتكەرلەرى جۇرگىزگەن. قازبا جۇمىستارى كەزىندە تابىلعان قابىردەگى ادامنىڭ كيىمى التىنمەن جالاتىلعان. قابىردە جىلقى دا كومىلگەن, ونىڭ ەر-تۇرمان ابزەلدەرى دە باعالى مەتالمەن قاپتالعان.
