بۇگىندە كوپتەگەن شەتەلدە كونستيتۋتسيالىق جانە باسقا دا زاڭنامالىق دەڭگەيدە ءتۇرلى ۇلتتىق, ەتنوستىق ازشىلىقتاردى قورعاۋدى قامتاماسىز ەتۋگە, سونداي-اق ولاردىڭ وزىندىك جانە جەكە ەرەكشەلىكتەرىن ساقتاۋعا باعىتتالعان بەلسەندى ءىس-شارالار جۇزەگە اسىرىلۋدا. مۇنداي باستامالاردىڭ ماقساتى – حالىقارالىق نورمالار مەن ستاندارتتاردىڭ ىقپالىمەن قالىپتاسقان ءاربىر ەلدە از ۇلتتاردىڭ ءومىر ءسۇرۋىنىڭ ينستيتۋتسيونالدىق جاعدايلارىن قامتاماسىز ەتۋ, مەملەكەت پەن قوعامنىڭ دەموكراتيالىق ينستيتۋتتارىنىڭ جۇيەسىن جەتىلدىرۋ. وسى تاقىرىپ كەڭىنەن تالقىلانعان القالى جيىندا «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ قازاقستان قازىرگى تاڭدا شەتەلدەردە تۇراتىن قازاقتارعا قانداي قولداۋ كورسەتىپ جاتقانىن ايتىپ بەردى.
– ءبىزدىڭ ۇيىم ارناۋلى جول كارتاسىن جانە قوردىڭ دامۋ جوسپارىن ازىرلەپ, بەكىتتى. جوسپارعا سايكەس بىرقاتار قىزمەت ءتۇرى انىقتالدى. ولار – شەتەلدەردە قازاقتاردى قولداۋ جانە ەرىكتى قونىس اۋدارۋ جونىندەگى مەملەكەتتىك باعدارلامانى ازىرلەۋ, شەتەلدەگى وتانداستاردى مەملەكەتتىك قولداۋ تۋرالى زاڭ جوباسىن ازىرلەۋ, وتانداستاردى اقپاراتتىق قولداۋ ورتالىعىنىڭ جۇمىسىن ۇيلەستىرۋ, ديالوگ الاڭدارىنىڭ قىزمەتىن ۇيلەستىرۋ, شەتەلدە قازاق ءتىلىن وقىتۋ بويىنشا ءبىلىم بەرۋ ينفراقۇرىلىمىن قۇرۋ. قازىرگى كۇنى قانداستاردى قولداۋ جانە ولاردى تاريحي وتانىنا قايتارۋ بويىنشا شەت- ەلدەردىڭ تاجىريبەسى زەردەلەنىپ, ارنايى ساراپتامالىق زەرتتەۋلەر جۇرگىزىلۋدە, – دەدى م.سارباسوۆ.
بۇدان كەيىن پرەزيدەنت جانىنداعى ادام قۇقىقتارى جونىندەگى كوميسسياسىنىڭ توراعاسى قۋانىش سۇلتانوۆ ءسوز الىپ, اتالعان سالاداعى حالىقارالىق بىرلەسكەن ءىس-شارالارعا توقتالدى.
– بۇگىنگى كۇن تارتىبىندەگى تاقىرىپ قاشاندا نازاردان تۇسكەن ەمەس. ادام قۇقىقتارىنىڭ جالپىعا بىردەي دەكلاراتسياسىنىڭ قابىلدانعان كۇنىن جىلدا 10 جەلتوقساندا اتاپ وتەمىز. سول كەزدە تۇراقتى تۇردە بارلىق حالىقارالىق ۇيىمدار مەن ەلشىلىكتەر وكىلدەرىن شاقىرىپ, جان-جاقتى پىكىر الماسامىز. ادام قۇقىعى – مەملەكەتتىك ساياساتتىڭ باسىم باعىتى, ەڭ جوعارى قۇندىلىعى. ۇلى دالا ەلى ەجەلدەن قاراپايىم حالىقتىڭ قۇقىقتارى مەن بوستاندىقتارىن جوعارى قۇرمەتتەپ, بۇل ەل باسقارۋداعى ۇردىستەردە, ىشكى جانە سىرتقى ساياساتتا ەرەكشە ەسكەرىلگەن. قازاقستان ادام قۇقىعى جونىندە 100-دەن اسا كوپجاقتى حالىقارالىق كەلىسىم جاساعان. ونىڭ ىشىندە بۇۇ-نىڭ قۇقىق قورعاۋ تۋرالى كونۆەنتسيالارى بار. ءبىزدىڭ ەلدە ادام قۇقىقتارىن قورعاۋدىڭ ۇلتتىق جۇيەسى جولعا قويىلعان. ونىڭ ماڭىزدى ءبىر قۇرالى رەتىندە پرەزيدەنت جانىنداعى ادام قۇقىقتارى جونىندەگى كوميسسياسىن اتاۋعا بولادى. كوميسسيا قازاقستان ازاماتتارىنىڭ, شەتەلدiك ازاماتتاردىڭ, ازاماتتىعى جوق ادامداردىڭ, سونداي-اق ۇيىمداردىڭ ازاماتتىڭ قۇقىقتارى مەن بوستاندىقتارىنىڭ بۇزىلۋ فاكتiلەرi تۋرالى وتiنiشتەرiن قارايدى. مەملەكەت باسشىسىنىڭ اتىنا ادام قۇقىقتارىنىڭ ساقتالۋى تۋرالى جىل سايىن ارناۋلى باياندامالار ازiرلەيدi. كوميسسيانىڭ نەگىزگى مىندەتىنىڭ ءبىرى – ادام قۇقىقتارى مەن بوستاندىقتارىن قامتاماسىز ەتۋ مەن قورعاۋ سالاسىنداعى حالىقارالىق ىنتىماقتاستىقتى نىعايتۋعا جاردەمدەسۋ, – دەدى ق.سۇلتانوۆ
سونىمەن قاتار باسقوسۋدا اقپارات جانە قوعامدىق دامۋ مينيسترلىگىنىڭ ەتنوسارالىق قاتىناستاردى دامىتۋ دەپارتامەنتى ديرەكتورى عالىم شويكين سويلەپ, ەتنوسارالىق جانە كونفەسسياارالىق كەلىسىمدى ساقتاۋ ەلىمىز ءۇشىن ارقاشان باسىم باعىت بولىپ قالا بەرەتىنىن ايتتى. ول مينيسترلىك ەتنوستىق بۇقارالىق اقپارات قۇرالدارىن بەلسەندى قولدايتىنىن, قازاقستاندا 12 تىلدە تاراتىلاتىن 52 ەتنوستىق باق جۇمىس ىستەيتىنىن اتاپ ءوتتى.
جيىن سوڭىندا شەتەلدە تۇراتىن ەتنوستىق قازاقتاردىڭ قۇقىقتارىن قورعاۋ ماقساتىندا حالىقارالىق دەڭگەيدە حالىقارالىق ۇكىمەتتىك جانە ۇكىمەتتىك ەمەس ۇيىمدارمەن ءوزارا ءىس-قيمىل ماسەلەلەرى بويىنشا ۇسىنىمدار قابىلداندى.
