بەرىك كاماليەۆتىڭ ايتۋىنشا, 2009 جىلى جولاۋشىلار ۆاگوندارىنىڭ توزۋى – 90%, 2014 جىلى – 60% قۇرادى. قازىرگى ساتتە جولاۋشىلار ۆاگوندارىنىڭ پاركى 2146 بىرلىكتى قۇرايدى.
«بۇگىندە پاركتىڭ توزۋىن ءبىز 65%-دان 42%-عا دەيىن تومەندەتتىك, 2025 جىلدىڭ سوڭىنا دەيىن 30%-عا جەتكىزۋدى كوزدەپ وتىرمىز. بيىل 63 ۆاگون ساتىپ الدىق, جىل سوڭىنا دەيىن تاعى 43 ۆاگون الامىز. ءاربىر 5 جىل سايىن 100 ۆاگوننان ساتىپ الامىز. ءبىز «ترانسماشحولدينگ» اق-مەن اۋقىمدى كەلىسىمشارت جاساسقانبىز, ۆاگونداردىڭ قازاقستاندا جەرگىلىكتەندىرىلۋىن قالايمىز», دەدى ب.كاماليەۆ.
سونىمەن قاتار ۆيتسە-مينيستر الەۋمەتتىك ماڭىزى بار باعىتتاردى سۋبسيديالاۋ ءىسى جالعاساتىنىن ايتتى.
«بىزدە سۋبسيديا بولىنەتىن الەۋمەتتىك باعىتتار بار. ءبىز قازىر تەمىر جول كولىگى تۋرالى زاڭ ازىرلەپ جاتىرمىز, وندا ءبىرىنشى ماسەلە جولاۋشىلار تاسىمالىن سۋبسيديالاۋ بولادى. قتج-دا جولاۋشىلار لوكوموتيۆتەرىنىڭ جاڭا قۇرىلىمى قۇرىلادى», دەدى ۆيتسە-مينيستر.
«نۇرلى جول» باعدارلاماسىنىڭ ەكىنشى كەزەڭى اياسىندا 600 جولاۋشىلار ۆاگونى مەن 144-كە جۋىق وتاندىق لوكوموتيۆ ساتىپ الۋعا 657 ملرد تەڭگەگە جۋىق قاراجات ءبولۋ جوسپارلانعان. بۇل شارا جولاۋشىلار پاركىنىڭ توزۋ دەڭگەيىن ءبىرشاما تومەندەتۋگە – 40%-عا دەيىن (2020 ج. دەڭگەيگە -5%), تارتقىش جىلجىمالى قۇرامنىڭ توزۋىن 58%-عا دەيىن (2020 ج. دەڭگەيگە -9%) جانە ماگيسترالدى تەمىرجول جەلىسىنىڭ توزۋىن 49%-عا دەيىن (2020 ج. دەڭگەيگە -5%) تومەندەتۋگە مۇمكىندىك بەرەدى.
ءوز كەزەگىندە, يندۋستريا جانە ينفراقۇرىلىمدىق دامۋ مينيسترلىگىنىڭ كولىك كوميتەتى توراعاسىنىڭ ورىنباسارى قايريدەن نۇركەنوۆ جولاۋشىلار ۆاگوندارى پاركىن جاڭارتۋ جۇمىستارى جۇيەلى تۇردە جۇرگىزىلىپ جاتقانىن ايتتى. وسى جىلدىڭ وزىندە 60-تان استام جولاۋشىلار ۆاگونى ساتىپ الىندى, ولار «الماتى – ماڭعىستاۋ», «نۇر-سۇلتان – اتىراۋ» جانە «نۇر-سۇلتان – سارىاعاش» باعىتتارىندا جۇرەدى.
سونىمەن بىرگە, ق. نۇركەنوۆ اۆتوكولىك قۇرالدارىن دامىتۋ اياسىندا جولاۋشىلار اۆتوبۋستارى پاركىن جاڭارتۋدىڭ كەشەندى جوسپارى قابىلدانعانىن اتاپ ءوتتى.
«نۇرلى جول» باعدارلاماسىن ىسكە اسىرۋ جالپى توزۋدى 65%-دان 42%-عا دەيىن تومەندەتۋگە مۇمكىندىك بەردى. بۇگىنگى تاڭدا تۇراقتى مارشرۋتتاردا 12 مىڭعا جۋىق اۆتوبۋس جۇمىس ىستەيدى جانە, سايكەسىنشە, اۆتوبۋستاردىڭ جارتىسىنان كوبى 7 جىلدان استام ۋاقىت جۇمىس ىستەپ كەلەدى. بۇل باعدارلاما جاڭارتۋدى قاراستىرادى», دەدى ق. نۇركەنوۆ.
ونىڭ ايتۋىنشا, 2 جىل ىشىندە تۇراقتى جولاۋشىلار مارشرۋتتارىندا جۇمىس ىستەيتىن شامامەن 615 اۆتوبۋس ساتىپ الىندى, ونىڭ 45-ءى – 2018 جىلى, بيىل 570 ساتىپ الىندى.
2022 جىلعا دەيىن ەل وڭىرلەرىنىڭ اۆتوبۋس پاركىن جاڭارتۋدى قامتاماسىز ەتۋ ماقساتىندا رەسپۋبليكالىق بيۋدجەتتەن 128,5 ملرد تەڭگە كولەمىندە قاراجات ءبولۋ جوسپارلانعان. قاراجاتتار تاسىمالداۋشىلارعا «قازاقستاننىڭ دامۋ بانكى (قدب) ليزينگ» اق ارقىلى جەڭىلدەتىلگەن نەسيە باعدارلاماسى اياسىندا 15% باستاپقى جارنامەن, 7% پايىزدىق مولشەرلەمەمەن 7 جىلعا بەرىلەدى.
اتالعان شارا 2025 جىلعا دەيىن قالالىق اۆتوبۋس پاركىن 5000 بىرلىككە جاڭارتۋعا, توزۋ دەڭگەيىن 44%-تەن 28%-عا دەيىن تومەندەتۋگە, سونداي-اق, وتاندىق شىعارۋشى زاۋىتتاردىڭ وندىرىستىك الەۋەتىن بارىنشا كوبىرەك پايدالانۋعا جول اشادى.
