«#ەكەۋمىزدىڭ قانىمىز ءبىر» الەۋمەتتىك دراماسىنىڭ پرەمەرالىق كورسەتىلىمىنىڭ شىمىلدىعى اعىمداعى جىلى كەشە ەلورداداعى «جاستار» تەاترىندا اشىلدى. قويىلىممەن جۇمىستى ەرەكشە قاجەتتىلىككە يە شىعارماشىلىق جاستاردان تۇراتىن تەاتر ترۋپپاسى مەن رەجيسسەرلىك-قويىلىمدىق ترۋپپا ءۇش اي بۇرىن باستاعان. بۇگىندە قازاقستانداعى ەرەكشە اكتەرلەردەن تۇراتىن العاشقى تەاتردىڭ قورجىنىندا بۇكىل قازاقستاندى ارالايتىن گاسترولدىك تۋرىندا كورسەتەتىن ەكى سپەكتاكل (دراما مەن پانتوميما) بار.
«#ەكەۋمىزدىڭ قانىمىز ءبىر» قويىلىمى د.ر.كيپلينگتىڭ اڭىزعا اينالعان الەمدىك پوۆەسى «دجۋنگليلەر كىتابىنا» نەگىزدەلگەن. قويىلىم كورەرمەندەرگە كەرەڭ-مىلقاۋ بالا مەن سوتسيۋم اراسىنداعى شيەلەنىستى سۋرەتتەپ, قازاقستانداعى زاماناۋي شىندىقتى سەزىنۋگە مۇمكىندىك بەرەدى. ىشكى بەرىكتىگى مەن جۇرەگىندەگى باتىلدىق وعان قيىندىقتارعا توتەپ بەرىپ, مەيىرىمدىلىك پەن ەركىندىكتى سەزىنۋدىڭ قۇندىلىعىن اسپەتتەۋگە شاقىرادى. بالانىڭ اينالاسىنداعىلار ونىڭ كوز الدىندا ءوزىنىڭ سۇيىكتى كىتابىنداعى كەيىپكەر: ايلاكەر قارا قابىلان باگيرا, دانىشپان پيتون كاا, ىزاقور جولبارىس شەر حانمەن گيپەربولالانادى. ول – ماۋگلي كۇشتى, ز ۇلىم كۇشتەردەن قورىقپايتىن ەرجۇرەك, بىراق مەيىرىمدى دە باۋىرمال جۇرەكتى بولىپ وسەدى. وسىلايشا, قويىلىم ابىروي, ەرلىك, داستۇرگە ادالدىق پەن شىنشىلدىق سىندى يگى قاسيەتتەردىڭ قۇندىلىعى ماسەلەسىن كوتەرەدى.
بۇگىنگى تاڭدا ترۋپپادا مۇمكىندىگى شەكتەۋلى 14-پەن 28 جاس ارالىعىنداعى 50-دەن استام اكتەر بار. كۇن سايىن قۇرام اكتەرلىك شەبەرلىگىن, حورەوگرافيا, ساحنالىق بەينە, ىم-يشارا ءتىلىنىڭ شەبەرلىگى جانە ت.ب. قىرىنان جەتىلدىرىلدى.
«مەن وسى ۇجىمعا كەلگەن كەزىمدە ىم-يشارا ءتىلىن, ونىڭ تەحنيكاسىن بىلگەن جوقپىن. ەرەكشە اكتەرلەر تەاترى – باسقا الەم بولاتىن. بۇل الەم مەنى وزىنە باۋراپ الدى. بۇل جەردە ولار سپەكتاكلدە وينامايدى, ولار سول جەردە ءومىر سۇرەدى. بارلىعى تەڭ بولىپ تابىلاتىن شىعارماشىلىق الەمىندە قازاقستانداعى بارشا ەرەكشە بالالاردىڭ بولعانىن قالايمىن», دەدى قويۋشى حورەوگراف داۋلەت مۇراتبەكوۆ.
«ماعان ەرەكشە تەاتردىڭ اكتەرلەرمەن جۇمىس ىستەۋ وتە وڭاي بولدى. الدىمەن يدەيالارىن تىڭداعاسىن ولاردىڭ جانارىنداعى ۇشقىندى بايقادىم. ولاردىڭ بولاشاقتا ايگىلى اكتەر بولاتىنىنا سەنىمىم مول», دەدى سانگەر, كوستيۋم بويىنشا سۋرەتشى قايروللا ابىشەۆ.
«تەاترىمىزدىڭ ارتىستەرى وتە كوپ جۇمىس ىستەدى. اكتەرلىك شەبەرلىك, حورەوگرافيا جاعىنان دا كۇن سايىن ساباق الدى. بۇگىن سول ءۇش اي بويى دايىندالعان ەڭبەكتىڭ ناتيجەسىن كورىپ وتىرمىز. ارقايسىسى ءوز كەيىپكەرىنىڭ بەينەسىنە ەنىپ, ونى اشا ءبىلدى», دەدى ەرەكشە تەاتردىڭ كوركەمدىك جەتەكشىسى ولگا روستوۆششيكوۆا.
ۇلتتىق دەلفي كوميتەتىنىڭ ديرەكتورى, جوبا اۆتورى قۇرالاي تۇسپەكوۆا ء«ۇش جىل بويى ۇلتتىق دەلفي كوميتەتى بۇكىل ترۋپپا ەرەكشە قاجەتتىلىككە يە شىعارماشىل جاستاردان تۇراتىن ەرەكشە اكتەرلەردىڭ بىرەگەي تەاترىن قۇرۋ يدەياسىن جەتىلدىردى. بۇگىن مىنە, ول يدەيا دا كەمەلىنە كەلدى. اعىمداعى جىلى گرانتتىڭ ارقاسىندا يدەيامىزعا ءىس جۇزىندە جۇزەگە اسىرىلىپ وتىر. ءۇش اي بويى پەداگوگتەردىڭ اكتەرلىك شەبەرلىك, حورەوگرافيا, ساحنالىق بەينە, ىم-يشارا ءتىلى بويىنشا جۇمىستارى, پسيحولوگتاردىڭ, ۇدو قازىلار مۇشەلەرى, بالالار مەن ولاردىڭ اتا-انالارىنىڭ كۇنى-ءتۇنى توككەن ماڭداي تەرىمەن بۇگىن العاشقى جۇمىسىمىزدى نازارلارىڭىزعا ۇسىنىپ وتىرمىز! جىل سوڭىنا دەيىن بۇكىل قازاقستاندى ارالاۋدى جوسپارلاپ وتىرمىز. ءار كورسەتىلىمنەن سوڭ كورەرمەندەرگە «ەركىن» ميكروفون ۇسىنىلىپ, ولار زال بولىپ قويىلىمنان العان اسەرلەرىمەن بولىسە الادى. بۇل پراكتيكا بىزگە كورەرمەندەردەن فيدبەك الۋعا, ناقتى ۋاقىتتا كورگەنىنەن ونى تۇسىنۋىنە جول اشادى جانە كەرەمەت ەموتسيالارىمىزبەن بولىسەتىنىمىزگە سەنىمدىمىن. ەرەكشە اكتەرلەرىمىزدىڭ بۇگىن وزدەرىن ناعىز ءارتىس رەتىندە سەزىنۋىنە مۇمكىندىك تۋعانىنا قۋانىشتىمىن», دەپ اتاپ ءوتتى.
40 قويىلىممەن ەلىمىزدىڭ 17 ايماعىن ارالاۋدى جوسپارلاپ وتىرعان گاسترولدىك تۋردا ۇلتتىق دەلفي قازىلار القاسى مۇشەلەرىنىڭ اراسىنداعى مادەنيەت قايراتكەرلەرىنىڭ شەبەرلىك ساعاتتارىن وتكىزۋ دە جوسپارلانىپ وتىر. ودان باسقا, ۇيىمداستىرۋشىلار ايماقتارداعى مۇمكىندىگى شەكتەۋلى دارىنداردىڭ قويىلىمعا قاتىسۋىن قامتۋعا دا نيەتتى.
