وتىرىستى اشقان سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى مەديتسينالىق سالاعا بولىنەتىن قوماقتى قاراجاتقا قاراماستان, وسى سالاداعى ماسەلەلەر ازايماي تۇرعانىن اتاپ ءوتتى. سونىڭ ءبىرى – بىلىكتى كادرلاردى دايارلاۋ ماسەلەسى. مۇنىڭ ءبىر ايعاعى – سەنات دەپۋتاتتارىنىڭ سىنىنا قاراماستان, اقمولا جانە سولتۇستىك قازاقستان وبلىستارىندا مەديتسينالىق سالاعا قاتىسى جوق جوعارى وقۋ ورىندارى جانىنان مەديتسينالىق فاكۋلتەتتەر اشىلعان.
بۇعان قوسا سەنات كوميتەتىنىڭ توراعاسى دارىگەرلىك قاتەلىكتەردەن تۋىنداعان جاعدايلار ءتيىستى تۇردە رەتتەلمەيتىنىن, بۇل مينيسترلىكتىڭ باستى مىندەتتەرىنىڭ ءبىرى بولۋى كەرەك ەكەنىن ايتتى.
اتالعان ماسەلەلەر بويىنشا اتقارىلىپ جاتقان ءىس-شارالاردى, جالپى دەنساۋلىق ساقتاۋ سالاسىنداعى قولعا الىنعان جۇمىستاردىڭ بارىسىن دەنساۋلىق ساقتاۋ ءمينيسترى ەلجان ءبىرتانوۆ بايانداپ بەردى. ونىڭ ايتۋىنشا, قارقىندى جۇمىس پەن كەشەندى تاسىلدەردىڭ ارقاسىندا سوڭعى بەس جىل ىشىندە انا ءولىمىنىڭ, تۋبەركۋلەزدەن, قان اينالىم جۇيەسى اۋرۋىنان, ونكولوگيا جانە جاراقاتتان كەلەتىن ءولىمنىڭ تومەندەگەنى بايقالادى. الايدا وسى جىلدىڭ 8 ايىنىڭ دەرەكتەرى بويىنشا جالپى ءولىمنىڭ جانە نارەستە ءولىمىنىڭ وسۋىندە بولماشى اۋىتقۋلار بايقالادى. سونىمەن قاتار تسيفرلاندىرۋ مەن ستاتيستيكالىق دەرەكتەردىڭ ساپاسىن جاقسارتۋ ارقىلى ءولىم سەبەپتەرى بويىنشا جۇيەلى ءىس-شارالار بەلسەندى جۇرگىزىلىپ جاتىر.
– ءبىز اتىراۋ وبلىسىندا شەتىنەگەن جاڭا تۋعان نارەستەلەردىڭ شىنى پرەپاراتتارىنان الىنعان وبەكتيۆتى دەرەكتەر مەن مەديتسينالىق كارتالاردىڭ اۋديتىنەن كەيىن ەل بويىنشا جاپپاي تەكسەرىس جۇرگىزدىك. تالداۋ ناتيجەسىندە ماتەريالداردى ۇسىنباعان ماڭعىستاۋ وبلىسىنان باسقا, ەسەپكە الىنباعان ەرتە نەوناتالدىق ءولىم-ءجىتىم بويىنشا 277 نارەستە ءولىمىن جاسىرىپ قالۋ فاكتىسىن انىقتادىق. بۇل – ەسكەرىلمەگەن, رەسپۋبليكا بويىنشا ءتىرى تۋعاندار. ناتيجەسىندە 2018 جىلى نارەستە ءولىمى كورسەتكىشىنە تۇزەتۋ جۇرگىزىلدى. ءولىم-ءجىتىم كورسەتكىشى 8,03-تەن 8,7-گە وزگەردى, – دەدى مينيستر.
سونىمەن قاتار ۆەدومستۆو باسشىسى 2019-2020 جىلدارعا ارنالعان العاشقى مەديتسينالىق-سانيتارلىق كومەكتى دامىتۋ جوسپارى ىسكە اسىرىلىپ جاتقانىن اتاپ ءوتتى. وسى جىلى 1 300 دارىگەرلىك بولىمشە اشىلدى جانە ءار بولىمشە جۇكتەمەسى 1 658 ادامدى قۇرادى. الايدا كادرلاردىڭ جۇمىستى قوسا اتقارۋى مەن تاپشىلىعىنا بايلانىستى 1 دارىگەرگە ءىس جۇزىندە بەكىتىلگەن حالىق سانى 1 900 ادامدى قۇرايدى. جوعارى وقۋ ورىندارىنىڭ تۇلەكتەرىن جۇمىسقا تارتۋدىڭ ارقاسىندا وسى جىلى العاشقى مەديتسينالىق كومەك دارىگەرلەرىنىڭ تاپشىلىعى 900 ادامعا تومەندەدى. بۇعان قوسا تسيفرلاندىرۋ ەمحانالارداعى كەزەكتەردى 30%-عا تومەندەتۋگە مۇمكىندىك بەردى. شۇعىل ەمەس شاقىرۋلاردى جەدەل جاردەمنەن بولىمشە دارىگەرلەرىنە بەرگەننەن كەيىن جىل ىشىندە جەدەل جاردەم شاقىرۋلارى 25%-عا تومەندەدى.
– ەلباسىنىڭ «الەۋمەتتىك قامقورلىق» شارالارىن ىسكە اسىرۋ شەڭبەرىندە بيىل 1 ماۋسىمنان باستاپ مەديتسينا قىزمەتكەرلەرىنىڭ جالاقىسى 30%-عا دەيىن ءوستى. جاڭا باعدارلامانىڭ شەڭبەرىندە 2025 جىلعا دەيىن مەديتسينالىق قىزمەتتەردىڭ تاريفتەرىن ءوسىرۋ جانە مەديتسينا قىزمەتكەرلەرىنىڭ جالاقىسىن ەكونوميكاداعى ورتاشا جالاقىدان 2,5 ەسە جوعارى ەتۋ كوزدەلگەن. 2020 جىلدىڭ 1 قاڭتارىنان باستاپ دارىگەرلەردىڭ جالاقىسىن 30%-عا, مەيىرگەرلەردىڭ جالاقىسىن 20%-عا ۇلعايتۋ ۇسىنىستارى قولداۋ تاپتى, – دەدى ەلجان ءبىرتانوۆ.
ءمينيستردىڭ مالىمەتىنە سايكەس ءبىلىم بەرۋ ساپاسىن جاقسارتۋ ماقساتىندا شەتەلدىك ۋنيۆەرسيتەتتەرمەن ستراتەگيالىق ارىپتەستىك قولعا الىنىپ, 5 مەديتسينا ۋنيۆەرسيتەتىندە ءبىرىنشى پرورەكتورلار لاۋازىمىنا شەتەلدىك ارىپتەس-ۋنيۆەرسيتەتتىڭ توپ-مەنەدجەرلەرى تاعايىندالعان. ءاربىر مەديتسينالىق ۋنيۆەرسيتەتتە ۋنيۆەرسيتەتتىك كلينيكانىڭ نەمەسە اكادەميالىق مەديتسينالىق ورتالىقتىڭ بولۋى تۋرالى تالاپتار زاڭنامامەن بەكىتىلگەن. بۇگىنگى تاڭدا عىلىمي-زەرتتەۋ ينستيتۋتتارى جانە عىلىمي ورتالىقتار جوعارى وقۋ ورىندارىمەن بىرىكتىرىلدى. دارىگەرلەردى دايارلاۋداعى باكالاۆرياتتىڭ بەس جىلدىق باعدارلاماسى حالىقارالىق ستاندارتتارعا سايكەس 6 جىلدىق وقۋعا اۋىستىرىلىپ, جاڭا باعدارلاما بويىنشا وقىتۋ باستالدى.
– دەنساۋلىق ساقتاۋ جۇيەسىن قارقىندى جاقسارتۋ ءۇشىن 2025 جىلعا دەيىنگى دەنساۋلىق ساقتاۋ سالاسىن دامىتۋدىڭ مەملەكەتتىك باعدارلاماسى ازىرلەندى. نەگىزگى نىسانالى ينديكاتورلار قازاقستاندىقتاردىڭ ءومىر ءسۇرۋ ۇزاقتىعىن 75 جاسقا دەيىن جەتكىزۋگە جانە ينفەكتسيالىق ەمەس اۋرۋلاردان بولاتىن مەزگىلسىز قايتىس بولۋ جاعدايلارىن تومەندەتۋگە باعىتتالادى. 2025 جىلعا قاراي العاشقى مەديتسينالىق-سانيتارلىق كومەك پەن قوعامدىق دەنساۋلىققا جۇمسالاتىن شىعىستاردىڭ ۇلەسى ەلباسىنىڭ تاپسىرماسىنا سايكەس 60%-عا دەيىن جەتكىزىلەدى, – دەدى مينيستر.
بۇدان كەيىن الەۋمەتتىك-مادەني دامۋ جانە عىلىم كوميتەتىنىڭ حاتشىسى سەرىك بەكتۇرعانوۆ وتاندىق دەنساۋلىق ساقتاۋدىڭ جاي-كۇيى مەن پروبلەمالارىنا جان-جاقتى تالداۋ جاسادى. ول مەديتسينا قىزمەتكەرلەرىن قىزمەتتىك مىندەتتەرىن ورىنداۋ كەزىندە اگرەسسيا مەن شابۋىلدان قورعاۋ شارالارىن قابىلداۋ قاجەت ەكەنىن ايتىپ, مەملەكەت تاراپىنان مەديتسينالىق قىزمەتكەرلەردىڭ جۇمىسى ءۇشىن قاۋىپسىز جاعدايلاردى قامتاماسىز ەتۋدىڭ ماڭىزىنا توقتالدى.
وسى تۇستا سەناتور دارىگەرلىك قاتەلىكتەردى قىلمىسقا بالاۋ بەلەڭ العانىن, بۇل ءبىراز كەلەڭسىز جايتتىڭ بەلگىسىز قالۋىنا اكەپ سوقتىرعانىن اتاپ ءوتتى. سەرىك بەكتۇرعانوۆ دەنساۋلىق ساقتاۋ مينيسترلىگىنە دارىگەرلىك قاتەلىكتەر ماسەلەسىن جان-جاقتى تالقىلاۋدى ۇسىندى.
ۇكىمەت ساعاتى بارىسىندا قاراعاندى, تۇركىستان وبلىستارى اكىمدەرىنىڭ ورىنباسارلارى ءسوز سويلەدى.
سەناتورلار دەنساۋلىق ساقتاۋ جۇيەسىن جەتىلدىرۋ, تسيفرلاندىرۋدى ەنگىزۋ, ونكولوگيالىق ناۋقاستاردى ەمدەۋ جانە باسقا دا ماسەلەلەر بويىنشا ءوز ەسكەرتۋلەرى مەن ۇسىنىستارىن ايتتى.
