قوعام • 21 قازان، 2019

تامساندىرار تابيعات تاماشاسى

60 رەتكورسەتىلدى

تابيعات اياسىنىڭ تۇنىق سازى راۋانداپ اتقان تاڭ شاپاعىنىڭ تىنىشتىعىمەن استاسقان. جازدىڭ ارايلى كەشتەرى مەن سامال ءتۇنى تولىققاندى مازمۇنىمەن باۋراپ السا، كۇزدى كۇنگى ساۋلاي توگىلگەن سۇلۋلىقتىڭ الدىنا ءبىر ءسات ايالداعاندا تاڭعاجايىپ كۇيدى ناق ءبىر العاش رەت باستان كەشىرگەندەي تامساناسىڭ. بەلگىلى سۋرەتشى، كوركەمدەۋشى يگور باگراموۆتىڭ قولىنان شىققان دالا شىندىعى وسىنداي وزگەشە قانىق كورىنىستەرمەن دارالانادى.

تاۋەلسىزدىك سارايىندا وت­كەن «قۇرمەتپەن، قاراعان­دى­دان» اتتى كورمەدە سۋرەتشىنىڭ ءتۇر­لى تاقىرىپتاعى 100-گە تارتا جۇمىسى نازارعا ۇسىنىلدى. تابيعات اياسىنا شىعۋدى كوڭىلى سۇيەتىن باگراموۆتىڭ پلەنەر جۇمىستارىنداعى قۇلشىنىسى كورەرمەنمەن ءوزارا ديالوگ تۋدىرادى. «الاتاۋدىڭ كوڭىلدى كەشى» جانە «ايلى ءتۇن» ات­تى جۇمىستارىندا جارىق پەن كولەڭكەنىڭ قوزعالىسى، كەڭىستىك اياسىنداعى شاشىراي توگىلگەن تۇستەر گامماسى سان قۇبىلىپ، تامىلجىعان اۋەن باياۋ تارالىپ، بەينەبىر اۋاعا ءسىڭىپ كەتكەندەي. تولىسقان اي­دىڭ كول بەتىندەگى ساۋلەلى عۇمىرى، جاعالاي بىتكەن قالىڭ ورماننىڭ قۇشاعى، سۋ بەتىنەن كوتەرىلگەن تۇماننىڭ سيقىرلى ەلەسى – العاشقى تاڭىرقاۋدىڭ، تامسانۋدىڭ شىعارماشىلىق دابىلى ىسپەتتى.

–بالا كەزىمنەن سۋرەتكە اۋەس ەدىم. قاراعاندىدا تۋىپ-ءوستىم. عۇمىر بويى سۋرەت­شىلىكپەن اينالىسىپ كەلەمىن. كۇنى بۇگىنگە دەيىن سۋرەت سالۋ، تۋدىرۋ، جاڭاشىلدىق، ەكسپەريمەنت جاساۋدان جالىققان ەمەسپىن، – دەگەن سۋرەتشى كوم­پوزيتسيا مەن تۇستەردىڭ وزگە­رىپ وتىرۋىن رەاليستىك بەي­نەلەۋ زاڭدىلىقتارىنا نەگىز­دەلگەنىن ايتادى.

يگور باگراموۆتىڭ شىعار­ما­شىلىعىندا ءوزى تۋىپ-وسكەن، ورنىققان كەنشىلەر قالاسى مەن دالاسىنىڭ ورنى ەرەك. كومىر ونەركاسىبىمەن قاتار وزگە دە ءوندىرىستىڭ دامۋىنا باستاۋ بولعان قالا تاريحى سۋرەتشىنى بەيجاي قالدىرعان جوق. ودان بولەك ەكىنشى دۇنيە­جۇزىلىك سوعىس تاقىرىبى مەن جاۋىنگەرلەردىڭ بەينەسىن، وتپەلى كەزەڭدەردەگى قوعام مەن مادەنيەتتىڭ دامۋ كەزەڭدەرىن كەسكىندەي وتىرىپ، ءباتالدى جانرعا باتىل كىرىستى. ۇوس باتىرلارى  مانشۇك مامەتوۆا مەن ءاليا مولداعۇلوۆا جانە نۇر­كەن ءابدىروۆ ءتريپتيحى  حا­لىق ءومىرى مەن مايدان كو­رىنىس­تەرىنەن سىر شەرتەدى.

–سوعىسقا اتتانعانداردىڭ دەنى جاستار ەدى. ءتىپتى بالا دەۋگە بولادى، ولاردىڭ كوبى قىرشىن كەتتى. مىسالى، نۇر­كەن ءابدىروۆ نەبارى 23 جاستا عانا بولدى. كارتينادا بەينەلەنگەن ءاليا مولداعۇلوۆا مايدان دالاسىندا حات وقىپ وتىر. ال ونىڭ ارتىندا قا­زاق ەلىنىڭ اسپانى تۇر. پۋلە­مەت قاسىنداعى مانشۇك ما­مە­توۆا دا سولاي. ولاردىڭ ار­قايسىسىنىڭ ارتىندا ەلى مەن جۇرتى، وتانى، قازاق دالاسى جاتىر، – دەيدى ول.

قاشاندا جاڭاشىلدىقتى جانى سۇيەتىن باگراموۆتىڭ «وتان» اتتى موزايكالىق كەس­كىن­دەمەسى – ورىندالۋ تەحني­كا­سىنىڭ قيىندىعىمەن، قايتا­لانباس ەرەكشەلىگىمەن ءبىر توبە. اۆتور التىن بەسىك – تۋعان جەرگە دەگەن ساعىنىشى مەن قۇرمەتىن وسىلاي بىلدىرسە كەرەك، بار تىرشىلىكتىڭ باستاۋىنداي بىردەن كوزگە شالىناتىن جاپاندا قاراۋىتقان جالعىز ءۇي بۇيىعى قالپىندا ءتۇن قۇشاعىنا ورانا تۇسكەن. سۇتتەي جارىق ايدىڭ توگىلگەن نۇرى «جازاتايىم اداس­قان بولساڭ، مەن بارمىن، جولاۋ­شىم. ماعان قاراپ با­عىتىڭدى بەتكە الارسىڭ» دەگەن­دەي جۇل­دىزدارمەن يەك قاعا جىمىڭ­دايدى.

سوڭعى جاڭالىقتار

كۇلكى كەرۋەنى № 16

رۋحانيات • كەشە

اقىنعا ارنالعان كۇن

رۋحانيات • كەشە

باسپانامەن قامتيتىن باستى قۇجات

باعدارلامالار • كەشە

بولمىسى ءبۇتىن باعاەۆ

رۋحانيات • كەشە

ۇقساس جاڭالىقتار