ابونەنتكە تىركەلگەن نومىرلەر سانىن ءبىلۋ ءۇشىن ازاماتتىڭ جسن-ءىن ەنگىزۋ جەتكىلىكتى. جۇيە تىركەلگەن نومىرلەردىڭ سانىن جانە قانداي ۇيالى وپەراتوردى دا كورسەتىپ بەرەدى.
ەگەر ابونەنت ءوزىنىڭ جەكە سايكەستەندىرۋ نومىرىنە بەلگىسىز تەلەفون نومىرلەرىنىڭ تىركەلگەنىن انىقتاعان جاعدايدا تەلەكوممۋنيكاتسيالار كوميتەتى بەلگىسىز ءنومىردى جاپتىرۋدى ۇسىنادى.
«بىزگە ازاماتتار ءوز اتتارىنا بەلگىسىز تەلەفون نومىرلەرىنىڭ تىركەلگەنى تۋرالى ءجيى شاعىمدانادى. سوندىقتان دا ءبىز قازاقستاندىقتارعا ءوز اتىنا تىركەلگەن نومىرلەردىڭ سانىن تەكسەرۋدى ۇسىنامىز, سەبەبى ءسىز سول ءنومىردى پايدالانۋ ءۇشىن جەكە جاۋاپكەرشىلىك الاسىز», - دەيدى قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيالار كوميتەتىنىڭ توراعاسى ۆيتالي ياروشەنكو.
ەستەرىڭىزگە سالا كەتەيىك, 2019 جىلعى 1 قاڭتاردا قازاقستاندا ابونەنتتىك قۇرىلعىلاردى تىركەۋ اياقتالدى. قازىرگى ۋاقىتتا بارلىق ءموبيلدى تەلەفوندار SIM-كارتا يەلەرىنىڭ جسن-نا بايلانعان. 2018 جىلدىڭ ىشىندە ءوز جسن-ىن SMS ارقىلى تىركەمەگەن ابونەنتتەردىڭ تەلەفوندارى اۆتوماتتى تۇردە تىركەلىپ (2019 جىلدىڭ 1 قاڭتارىنا), پايدالانىلاتىن SIM-كارتالارعا بايلانعان.
