2022 جىلدان باستاپ جۇمىس بەرۋشى قىزمەتكەرلەرىنىڭ تابىسىنىڭ 2% ۇستاپ, مەديتسينالىق ساقتاندىرۋ قورىنا اۋداراتىن بولادى. بۇعان قوسا, جۇمىس بەرۋشى جالدامالى قىزمەتكەرلەرى ءۇشىن 2020-2021 جىلدارى 2%, ال 2022 جىلى 3% اۋداراتىن بولادى. بۇل تولەمدەر تەگىن كورسەتىلەتىن قىزمەتكە قاراعاندا كەڭ اۋقىمداعى مەديتسينالىق ساقتاندىرۋ پاكەتىنە يە بولۋعا مۇمكىندىك بەرەدى.
ال قورعا تولەم اۋدارماعاندار مەديتسينالىق قىزمەتسىز قالمايدى, ولار ۋچاسكەلىك تەراپەۆتكە بارىپ, تەگىن قان تالداماسىن جاساي جانە بىرقاتار اۋرۋلاردى ەمدەي الادى. سونداي-اق جەدەل مەديتسينالىق كومەك تە تەگىن بولىپ قالادى.
ساقتاندىرىلعان ادامدار تولىق بىرقاتار تەكسەرىلۋدەن ءوتىپ, وڭالتۋ قىزمەتتەرىن الا الادى. زاڭ بويىنشا ەلدەگى جۇمىس ىستەيتىن بارلىق ادامداردان مىندەتتى الەۋمەتتىك مەديتسينالىق ساقتاندىرۋ قورىنا تولەم الىنۋى كەرەك. بيىل تەك جۇمىس بەرۋشىلەر عانا تولەيدى, قىزمەتكەرلەرىنىڭ جالاقىسىنان 1,5% اۋدارادى. الايدا, تولەمدەر بارلىق ۇيىمدار ءۇشىن مىندەتتى: مەملەكەتتىك جانە جەكەمەنشىك مەكەمەلەر ءوز ەسەپتەرىنەن اۋدارۋى كەرەك.
جۇمىس بەرۋشىلەردىڭ, جك, جەكە تاجىريبەمەن جۇمىس ىستەيتىن تۇلعالاردىڭ مەديتسينالىق ساقتاندىرۋ مىندەتتەمەسىن ورىنداۋمەن مەملەكەتتىك كىرىستەر دەپارتامەنتى سالىق مىندەتتەمەسىنىڭ ءپرينتسيپى بويىنشا قاداعالايتىن بولادى. كەشىكتىرىلگەن مەرزىم ءۇشىن ءوسىمپۇل قوسىلىپ, ونى تولەمەگەن جاعدايدا ەسەپ-شوت بۇعاتتالادى. جەكە كاسىپكەرلەر, شارۋا قوجالىقتارىنىڭ يەلەرى جانە جەكە تاجىريبەمەن اينالىساتىن تۇلعالار (قورعاۋشى, سوت ورىنداۋشىلارى جانە ت.ب.) 2020 جىلدان باستاپ اي سايىن ءمامس-كە 1,4 ەڭ تومەنگى جالاقىسىنان 5% ستاۆكاسى بويىنشا تولەم اۋدارىپ وتىرادى. بارلىق قالعان تۇرعىندار (وزدىگىنەن تولەيتىن) مەدساقتاندىرۋعا ەڭ تومەنگى جالاقىسىنىڭ 5% تولەي الادى.
ەگەر تۇراقتى كىرىسى مەن رەسمي جۇمىسى بولماسا دا مەديتسينالىق ساقتاندىرۋعا قاتىسا الادى. مۇنداي مۇمكىندىك ءوزىن-ءوزى جۇمىسپەن قامتىپ وتىرعان قازاقستاندىقتارعا ۇسىنىلىپ وتىر. ولار بىرىڭعاي جيىنتىق تولەمىن تولەي الادى.
ەڭ تومەنگى تولەم ءۇشىن (0,5 — 1 ااك) ازامات ءۇش بىردەي جۇيەنىڭ قاتىسۋشىسى بولا الادى: زەينەتكەرلىك (ونىڭ ەڭبەك ءوتىلى جۇرەدى), الەۋمەتتىك جانە مەديتسينالىق ساقتاندىرۋ.
