– ەكسپوزيتسيادا ەتيۋدتەر كوپ. كولەمدى تۋىندىلاردىڭ ورنىنا ءدال وسى جانرداعى كارتينالاردى ۇسىنۋدى ءجون دەپ تاپتىم. جۇمىستاردىڭ كوبى ءوزىمىزدىڭ سۇيىكتى قالامىز قاراعاندى تۋرالى. دەگەنمەن, جانرلىق سۋرەتتەر دە جەتەرلىك, – دەيدى مەرەيتوي يەسى.
جالپى, ولەگ دروزدوۆتىڭ ەسىمى ەلىمىزدەگى بەينەلەۋ ونەرى سالاسىندا وتە تانىمال. سۋرەتشىنىڭ ۆەنەتسيا, سانكت-پەتەربۋرگ, پسكوۆ, استانا قالالارىن تاقىرىپ ەتكەن سەريالىق تۋىندىلارى سىنشىلار تاراپىنان جوعارى باعا العان. دەگەنمەن, ول ءوزىنىڭ تۋعان قالاسى قاراعاندىنى شىعارماشىلىق شابىتىنىڭ قاينار كوزى سانايدى.
بۇل جايىندا بەلگىلى ونەرتانۋشى ناتاليا يۆانينا بىلاي دەيدى:
– ەگەر ون جىل بۇرىن دروزدوۆتىڭ كارتينالارىندا قاراعاندى بىزگە جاستاۋ, شاتتىققا تولى, بىراق ءبىرتۇرلى بولەكتەۋ كەيىپتە كورىنسە, ونىڭ كەيىنگى تۋىندىلارىندا قالانىڭ بولمىسى قاراپايىم تارتقانىمەن ادامعا جاقىنداي تۇسكەندەي اسەر بەرەدى... ول گيتارادا تاماشا وينايدى. سودان دا بولار, ونىڭ ەڭبەكتەرىندە مۋزىكا مەن كوركەم سۋرەت بىتە قايناسىپ, وبرازداردارعا جان ءبىتىرىپ تۇرادى.
«قاراعاندىنى شىعارماشىلىعىنا ارقاۋ ەتەتىن سۋرەتشىلەر كوپ. الايدا ولاردىڭ ءبارى دە كەنشىلەر استاناسىنىڭ پورترەتىن ءدال دروزدوۆتاي جان-جاقتى اشىپ كورسەتە المايدى». بۇل – مايتالمان ماماندار تاراپىنان دارا تالانت يەسى ولەگ دروزدوۆتىڭ شىعارماشىلىعىنا بەرىلگەن جوعارى باعا.
قاراعاندىنى قىلقالامنىڭ قۇدىرەتىمەن توتىداي تۇرلەنتكەن سۋرەتشىنىڭ كورمەسى قازان ايىنىڭ 22-سىنە دەيىن جالعاسادى.
