ەلباسى نۇرسۇلتان نازارباەۆ ەكىجاقتى كەزدەسۋ بارىسىندا تۇركى الەمىنىڭ ىنتىماقتاستىعىن ودان ءارى نىعايتۋدىڭ ماڭىزىنا توقتالدى.
– قازاقستان تۇركى ەلدەرىنىڭ بارلىعىمەن تىعىز قارىم-قاتىناس ورناتقان. بۇگىنگە دەيىن تۇركى ەلدەرى باسشىلارىنىڭ كەزدەسۋلەرىنە تۇگەل قاتىسىپ كەلەمىن. مەن كەڭەستىڭ كوپتەگەن ينستيتۋتىن قۇرۋعا باستاما كوتەردىم. ەڭ ماڭىزدىسى – ەلدەرىمىز اراسىنداعى بەيبىتشىلىك پەن كەلىسىمدى قامتاماسىز ەتۋ, – دەدى ەلباسى.
ال قىرعىزستان پرەزيدەنتى سوورونباي جەەنبەكوۆ ەلباسى قازاق ەلىنە عانا ەمەس, تۇركى ەلدەرىنە دە قۇرمەتتى تۇلعا ەكەنىن اتاپ ءوتتى.
– ورتالىق ازيانىڭ, جالپى تۇركى الەمىنىڭ وركەندەۋى ءۇشىن كوپ جىلدار بويى قىزمەت ەتىپ كەلەسىز. ءتۇبى ءبىر تۋىسقان حالىقتاردىڭ بىرلىگىن نىعايتۋعا قوسقان ۇلەسىڭىز وراسان زور. تۇركىتىلدەس مەملەكەتتەردىڭ ىنتىماقتاستىق كەڭەسىنىڭ قۇرمەتتى توراعاسى بولىپ تورگە شىققانىڭىز قۇتتى بولسىن. مەن سىزبەن ماقتانامىن, – دەدى س.جەەنبەكوۆ.
ورىنبەك وتەمۇرات,
«Egemen Qazaqstan» – باكۋدەن (ازەربايجان)
