تۇركى كەڭەسى ءسامميتىنىڭ كۇن ءتارتىبى پىسىقتالدى

الەم • 14 قازان، 2019

تۇركى كەڭەسى ءسامميتىنىڭ كۇن ءتارتىبى پىسىقتالدى

باكۋ قالاسىندا تۇركى تىلدەس مەملەكەتتەردىڭ ىنتىماقتاستىق كەڭەسىنىڭ ءVIى ءسامميتى قارساڭىندا سىرتقى ىستەر مينيسترلەرى كەڭەسىنىڭ وتىرىسى ءوتتى.

ورىنبەك وتەمۇرات

بۇل ءىس-شاراعا قازاقستاننىڭ سىرتقى ىستەر ءمينيسترى مۇحتار تىلەۋبەردى قاتىستى. مينيسترلەر كەزدەسۋى ءداستۇرلى تۇردە تۇركى كەڭەسى مەملەكەتتەرى باسشىلارىنىڭ كەزدەسۋلەرىن ۇيىمداستىرۋ جانە شەشىمدەرىن ازىرلەۋ بارىسىن، ءسامميتتىڭ مازمۇنىن تالقىلاۋ ماقساتىندا ءوتتى. وسى جولعى وتىرىستا مينيسترلەر كۇن ءتارتىبىن جانە مەملەكەت باسشىلارى كەڭەسىندە قول قويىلاتىن قورىتىندى قۇجاتتاردىڭ جوبالارىن كەلىستى.

باسقوسۋدىڭ باسىندا قىرعىزستاننىڭ سىرتقى ىستەر ءمينيسترى شىڭعىس ايداربەكوۆ ءسوز الىپ، كەزەكتى ءسامميتتى جوعارى دەڭگەيدە ۇيىمداستىرىپ جاتقان ازەربايجان تاراپىنا مەيماندوستىعى ءۇشىن العىسىن ءبىلدىردى. ول تۇركى كەڭەسىنە قىرعىزستاننىڭ توراعالىق ەتكەن كەزەڭىندە وزبەكستاننىڭ ۇيىمعا تولىققاندى مۇشە اتانعانىنا قۋانىشتى ەكەنىن ايتىپ، وزبەكستاننىڭ سىرتقى ىستەر ءمينيسترى ابدۋلازيز كاميلوۆتى قۇتتىقتادى. سونداي-اق قىرعىزستان ءمينيسترى بۇل جاڭالىقتىڭ ورتاق ماقسات اياسىندا جۇمىلعان جۇمىستاردى ىلگەرىلەتۋگە سەپتىگىن تيگىزەتىنىنە سەنىم ءبىلدىرىپ، الداعى ۋاقىتتا تۇركىمەنستان دا وزبەكستاننىڭ ىزىمەن تۇركى كەڭەسىنىڭ اياسىن كەڭەيتەدى دەپ ءۇمىت ارتتى.

بۇعان قوسا شىڭعىس ايداربەكوۆ ەندىگى جىلى ازەربايجاننىڭ تۇركى كەڭەسىنە ابىرويمەن توراعالىق ەتۋىنە تىلەۋلەس ەكەنىن ايتتى.

وتىرىستا كەزەكتى سامميتكە ارقاۋ بولىپ وتىرعان شاعىن جانە ورتا بيزنەستى دامىتۋ تاقىرىبى جان-جاقتى تالقىلاندى. سوڭىندا مينيسترلەر 2019 جىلعى 19 قىركۇيەكتە ۆەنگريانىڭ بۋداپەشت قالاسىندا اشىلعان تۇركى كەڭەسى وكىلدىگىنىڭ قىزمەتىن رەتتەيتىن بىرقاتار قۇجاتقا قول قويدى. اتالعان قۇجاتتار جاڭا تۇركى ۇيىمدارىنىڭ ۇيىمداستىرۋشىلىق جانە قارجىلىق قىزمەتىن ۇيلەستىرەدى. بۇل تۇركى الەمى مەملەكەتتەرى مەن حالىقتارىنىڭ يگىلىگى ءۇشىن ودان ءارى جەمىستى جۇمىس جۇرگىزۋگە ىقپال ەتەدى.

سونداي-اق مينيسترلەردىڭ شەشىمىمەن ۆەنگرياعا تۇركى مادەنيەتى مەن مۇراسى قورى جانىنداعى باقىلاۋشى مارتەبەسى بەرىلدى.

2009 جىلى ازەربايجاننىڭ ناحچىۆان قالاسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن تۇركى تىلدەس مەملەكەتتەردىڭ ىنتىماقتاستىق كەڭەسى قۇرىلدى. تۇركى كەڭەسىنىڭ حاتشىلىعى تۇركيانىڭ ىستامبۇل قالاسىندا ورنالاسقان. كەڭەسكە مۇشە ازەربايجان، قازاقستان، قىرعىزستان، تۇركيا مەملەكەتتەرىنىڭ قاتارى وسى جولى وزبەكستانمەن تولىعىپ جاتىر.