«ماكس» جاۋاپكەرشىلىگى شەكتەۋلى سەرىكتەستىگىنىڭ ديرەكتورى, وبلىستاعى 82 جاستاعى ەڭ قارت كاسىپكەر ماكسيم ارتەمۋكتىڭ ۇستىنەن قىلمىستىق ءىس قوزعالعان بولاتىن. قارت كاسىپكەر ءوزى تۇراتىن قاراسۋ اۋداندىق كىرىس ءبولىمىنىڭ ءتۇسىندىرۋى بويىنشا سالىعىن تولەپ وتىرعان, ال وبلىستىق كىرىس باسقارماسى ونى 212 ميلليون تەڭگە تولەمەگەن دەپ سانايدى.
ماكسيم ارتەمۋك وبلىستاعى بەلگىلى مەتسەنات, ونىڭ كاسىپورنى قۇرىلعان كەزىنەن باستاپ قايىرىمدىلىق شارالارىمەن اينالىسادى. ونىڭ سىرتىندا اۋىلداعى مەكتەپكە, اۋرۋحاناعا, الەۋمەتتىك از قورعالعان وتباسىلارىمەن بيۋدجەت قىزمەتكەرلەرىنە كومەك بەرۋدى كاسىپرورىن ءوز موينىنا العان. 2018 جىلدىڭ قورىتىندىسى بويىنشا ول وبلىستاعى «جىل مەتسەناتى» اتانىپ, «جومارت جۇرەك» سىيلىعىمەن ماراپاتتالدى.
ال بيىل ماكسيم ارتەمۋكتىڭ وزىنە كومەك كەرەك بولدى. ول جيىن-تەرىن ناۋقانىنا كىرىسۋ ءۇشىن الدىمەن ەكونوميكالىق تەرگەۋ دەپارتامەنتىنە ءوزىنىڭ كىناسىز ەكەنىن دالەلدەپ الۋ كەرەك بولدى. ول ءوزىن قورعاۋ ءۇشىن كاسىپكەرلەردىڭ وبلىستىق پالاتاسىنا جۇگىندى.
«تاجىريبە كورسەتىپ جۇرگەندەي, وبلىستىق ەكونوميكالىق تەرگەۋ دەپارتامەنتى تىركەگەن بيزنەس نىساندارىنا قاتىستى قىلمىستىق ىستەردىڭ تورتتەن ءبىرى قىلمىسىنىڭ جوقتىعىنا بايلانىستى قىسقارتىلادى. ارتەمۋكتىڭ ۇستىنەن قوزعالعان ىستە ءدال سولاي بولىپ وتىر. قازاقستان رەسپۋبليكاسىنىڭ قك 245-بابى بۇل قىلمىستىڭ ءۇش ءتۇرلى تاسىلمەن ورىن العانىن قارايدى, ولار: دەكلاراتسياسىن كورسەتپەگەنى, دەكلاراتسياداعى مالىمەتتەردىڭ بۇرمالانىپ كورسەتىلۋى جانە سالىق سالىناتىن ءوز نىساندارىن قىسقارتىپ كورسەتۋ. مىنا ىستە كاسىپكەر ولاردىڭ بىرەۋىن دە جاساماعان, تازا. ونىڭ تازا ەكەنىن سالىق ورگاندارىنىڭ اكتىلەرىمەن دالەلدەنەدى»,- دەدى كاسىپكەرلەر قۇقىن قورعاۋ كەڭەسىنىڭ كەزەكتى وتىرىسىندا وبلىستىق كاسىپكەرلەردىڭ وڭىرلىك پالاتاسى ديرەكتورىنىڭ ورىنباسارى سامات سادۋاقاسوۆ.
كاسىپكەرلەر پالاتاسى كاسىپكەر ارتەمۋكتىڭ اۋداندىق سالىق ءبولىمىنىڭ ءتۇسىندىرۋ جۇمىستارى شەڭبەرىندە ارەكەت ەتكەنىن ايتىپ, ەكونوميكالىق تەرگەۋ دەپارتامەنتىنە قىلمىستىق ءىستى قىسقارتۋ تۋرالى حات جازعان بولاتىن. وعان ەشقانداي جاۋاپ بولماعان سوڭ, كاسىپكەرلەر پالاتاسىنىڭ زاڭگەرلەرى وبلىستىق پروكۋراتۋراعا شاعىمداندى. پروكۋراتۋرا ءىستى باستان اياق تەسەرىپ, كاسىپكەردىڭ ەشقانداي سالىق زاڭنامالارىن بۇرمالاماعانىن انىقتاپ, ۇزاققا سوزىلعان قىلمىستىق ءىستى قىسقارتۋعا نۇسقاۋ بەردى.
وبلىستا تەك 2018 جىلى عانا سالىعىن جاسىرعانى جونىندە ەكونوميكالىق تەرگەۋ دەپارتامەنتى تىركەگەن 18 ءىستىڭ 10-ى اقتالىپ, قىسقارتىلعان.
