پرەزيدەنت شەشىمىمەن كەلىسپەگەن پارلامەنت مۇشەلەرى مارتين ۆيسكارانىڭ وكىلەتتىگىن 12 ايعا توقتاتۋدى ۇيعارىپ, ونىڭ ورنىنا ۆيتسە-پرەزيدەنت مەرسەدەس اراوستى تاعايىندادى. دەگەنمەن مەرسەدەس اراوس وتستاۆكاعا كەتەتىنىن مالىمدەپ, كەزەكتەن تىس سايلاۋ وتكىزۋدى ۇسىندى. ول Twitter جەلىسىندەگى پاراقشاسىنا «مەملەكەتتىڭ كونستيتۋتسيالىق ءتارتىبى بۇزىلدى. مەن ۆيتسە-پرەزيدەنت مىندەتىنەن دە باس تارتامىن» دەپ جازدى. پارلامەنت مۇشەلەرى بۇۇ-عا مەملەكەت دەموكراتياسىنا نۇقسان كەلدى دەگەن حات جولداپ, ورىندارىنان كەتۋدەن باس تارتتى. ۆيسكارا پارلامەنت جۇمىسىن توقتاتۋ شەشىمىنەن كەيىن مينيسترلەر كەڭەسىنە جاڭا باسشى تاعايىندادى. كەڭەس باسشىسى سالۆادورا دە سولارانىڭ ورنىنا ادىلەت ءمينيسترى ۆيسەنتە سەبالوس كەلدى.
پرەزيدەنتتىڭ بۇل ارەكەتىن مەملەكەتتىك قىزمەتكەرلەردىڭ كوبى جانە ەلدەگى وپپوزيتسيالىق توپتار توڭكەرىس دەپ تانىپ, مارتين ۆيسكاراعا ديكتاتور دەگەن ايىپ تاقتى. ال ۆيسكارا ءوز كەزەگىندە كونگرەسس تاراتىلعاندىقتان, دەپۋتاتتاردىڭ شەشىمىنىڭ زاڭدى كۇشى جوق ەكەندىگىن ايتادى. اقپارات قۇرالدارىنا سۇيەنسەك, مەملەكەت پوليتسياسى مەن اسكەرى مارتين ۆيسكارانىڭ جاعىندا. پرەزيدەنتتىڭ ءباسپاسوز قىزمەتى ونىڭ مەملەكەتتىڭ قارۋلى كۇشتەرى, اسكەرى, پوليتسيا باسشىلارىمەن كەزدەسكەنىن مالىمدەدى. باسقوسۋ ليماداعى پرەزيدەنت سارايىندا وتكەن.
پەرۋدىڭ بۇرىنعى سىرتقى ىستەر ءمينيسترى فەرناندو روسپيلوسي مەملەكەت كونگرەسىنىڭ كونستيتۋتسيالىق سوتقا ارالاسۋعا تولىقتاي قۇقىلى ەكەنىن ايتتى. «سوت وكىلدەرىن تاعايىنداۋ پروتسەسىنىڭ سوزىلعانىنا ون اي بولدى, ال مەملەكەت باسشىسى ماڭىزدى شەشىم قابىلداناتىن سوڭعى كۇنى دەپۋتاتتارعا جاڭا مۇشەلەر تاڭداۋعا مۇمكىندىك بەرمەدى. پرەزيدەنتتىڭ پارلامەنتتى تاراتۋ شەشىمى – زاڭسىز. بۇل – سوڭعى 35 جىلدا لاتىن امەريكاسىندا ورىن العان توڭكەرىستەردىڭ ءبىرى», دەدى ف.روسپيلوسي. سونىمەن بىرگە ەكس-مينيستر پرەزيدەنتتىڭ بيلىكتە ۇزاق قالاتىنىنا كۇمان كەلتىرەتىنىن دە جەتكىزدى. «قازىر, البەتتە, ونىڭ ءسوزى ءوتىمدى, بىراق بۇل ۇزاققا بارماس, جاقسىلىققا دا الىپ كەلمەسى انىق», دەدى ول.
ال كونگرەستىڭ بۇرىنعى مۇشەسى, «جاڭا پەرۋ» پارتياسىنىڭ وكىلى تانيا پاريونا مەملەكەتتەگى جاعداي قالىپتى ەكەنىن, ەشقانداي توڭكەرىستىڭ بولماعانىن ايتتى. «مەملەكەتىمىزدە ەشقانداي توڭكەرىس بولماعانىن, ديكتاتۋرانىڭ دا جوعىن جەتكىزگىم كەلەدى. كونگرەستىڭ تاراتىلۋى كونستيتۋتسيالىق تۇرعىدان ورىندى, زاڭدى», دەدى ءوز سۇحباتىندا. The New York Times گازەتى مەملەكەتتەگى ساياسي داعدارىستىڭ نەگىزگى سەبەبىن ەلدەگى بەلەڭ العان سىبايلاس جەمقورلىقپەن بايلانىستىرادى. بۇل بولجامدى تانيا پاريونانىڭ «پارلامەنتتەگى «حالىق كۇشى», «پەرۋدىڭ اپريستا پارتياسى» سىندى پارتيالار ۇزاق جىلدار بويى جەمقورلاردى جاسىرىپ كەلدى. ولار سىبايلاس جەمقورلىق ارەكەتتەرى ارقىلى پارلامەنتتەگى ورىندارىن ساقتاپ قالماق» دەگەنى راستاي تۇسكەندەي.
بۇگىنگى تاڭدا اتالعان قوس پارتياعا قاتىستى ءىس جۇرگىزىلۋدە. بۇل تەرگەۋلەر Lava Jato وپەراتسياسىنىڭ نەگىزىندە ءجۇرىپ جاتىر. سونىمەن بىرگە ەكس-كونگرەسمەن پارلامەنتتى تاراتۋ ارەكەتى مەملەكەتتەگى سىبايلاس جەمقورلىق ماسەلەسىن شەشۋگە كومەكتەسپەيتىن جەتكىزدى.
ال پەرۋ حالقى بولسا مارتين ۆيسكارانى قولداپ وتىر. سوڭعى وقيعالارعا بايلانىستى مەملەكەت استاناسى ليمادا حالىق بوي كوتەرىپ, نارازىلىق تانىتتى. ال دەپۋتاتتار شەشىمىمەن كەلىسپەگەن ۆيسكارا جازدا پارلامەنت سايلاۋىن وتكىزۋدى ۇسىنىپ وتىر. الايدا نەگىزىنەن وپپوزيتسيالىق پارتيالاردان تۇراتىن كونگرەستىڭ بۇل شەشىمدى قابىلداۋى ەكىتالاي.
مارتين ۆيسكارا مەملەكەت باسىنا 2018 جىلى ناۋرىزدا كەلگەن ەدى. ونىڭ الدىنداعى پرەزيدەنت پابلو پەدرو دەپۋتاتتاردى ساتىپ الماق بولدى دەپ ايىپتالىپ, قىزمەتىنەن كەتكەن بولاتىن. پەرۋ پارلامەنتىنىڭ تاراتىلۋى ءبىرىنشى رەت ەمەس. تاريحقا كوز جۇگىرتسەك, 1992 جىلى مەملەكەت باسشىسى البەرتو فۋدجيموري رەفورمالار مەن جاڭارتۋلار ەنگىزۋ ءۇشىن دەپۋتاتتاردى وتستاۆكاعا جىبەرگەن ەدى. دەگەنمەن ونىڭ نەگىزگى جوسپارى ىسكە اسپاي, مەملەكەتتىڭ دەموكراتيا جۇيەسىن قۇلدىراتتى. مارتين ۆيسكارانىڭ شەشىمى مەملەكەتتەگى باستى پروبلەماعا اينالعان سىبايلاس جەمقورلىقتى توقتاتارى, نە 1992 جىلعى جاعدايدى قايتا تۋعىزارى بەلگىسىز. ونى ۋاقىت كورسەتەدى. مارتين ۆيسكارانىڭ پارلامەنت مۇشەلەرىنىڭ شەشىمىن قابىلداۋدان باس تارتقانىن ەسكەرسەك, جاعدايدىڭ ودان ءارى ۋشىعا ءتۇسۋى عاجاپ ەمەس.
