سايىسكەرلەر باسكەتبول, ۆولەيبول, ۇستەل تەننيسى, شاحمات, شاعىن فۋتبول, بادمينتون, ارمرەسلينگ, جەڭىل اتلەتيكا جانە بيليارد سىندى توعىز سپورت ءتۇرى بويىنشا باقتارىن سىنادى. بۇل جارىسقا ماڭعىستاۋداعى «ماەك-قازاتومونەركاسىپ» جشس كومانداسى دا قاتىسقان بولاتىن.
ءبىر اپتاعا سوزىلعان ءحىح سپارتاكيادانىڭ قورىتىندىسى بويىنشا ء«ۇلبى مەتاللۋرگيالىق زاۋىتى» اق سپورتشىلارى ءبىرىنشى ورىندى, ماەك كومانداسى ەكىنشى ورىندى يەلەندى. ءۇشىنشى ورىن «يۋگحك» جشس كومانداسىنا بۇيىردى. ماڭعىستاۋلىق كومبينات سپورتشىلارى بارلىعى 21 مەدال الدى (4 التىن, 5 كۇمىس, 12 قولا). شىمكەنتتىڭ ورتالىق ستاديونىندا وتكىزىلگەن سپارتاكيادانىڭ سالتاناتتى جابىلۋ راسىمىندە جۇلدەگەرلەرمەن قاتار جارىستىڭ ۇزدىك ويىنشىلارى دا ماراپاتتالدى.
ولاردىڭ قاتارىندا شاعىن فۋتبولدان ءتۋرنيردىڭ «ۇزدىك ءبومبارديرى» اتانعان كومبيناتتىڭ فۋتبول كومانداسىنىڭ شابۋىلشىسى مەيرام ەشجانوۆ, باسكەتبول بويىنشا ماەك كومانداسىنىڭ ويىنشىسى سەرگەي سەرگەەنكو بار.
- ماەك كومانداسىنىڭ سپورتشىلارى بۇل سپارتاكيادادا قۋانىشتى دا كوڭىلسىز ساتتەردى باستان وتكىزدى. جاراقات العاندار دا جوق ەمەس. باسكەتبول كومانداسىنىڭ كاپيتانى ۆاليد سۇلتانوۆ جانە فۋتبول قاقپاشىسى ەۆگەني مەدوۆسكوي ويىن كەزىندە جاراقات الىپ, ودان ارعى ويىندارعا قاتىسا المادى.
دەگەنمەن ەنەرگوكومبيناتتىڭ وكىلدەرى باسقا دا سپورت تۇرلەرىندە لايىقتى ويىندارىمەن كوزگە ءتۇسىپ, كورەرمەندەردىڭ ريزالىعىنا بولەندى.
كومبينات ۇجىمى جۇلدەگەرلەردى اقتاۋ اۋەجايىنا ارنايى بارىپ قۇتتىقتاپ, ءان-جىرمەن قارسى الدى دەلىنگەن ءباسپاسوز حابارلاماسىندا.
ماڭعىستاۋ وبلىسى
