فوتو: ۆيدەوسكرين
36 جاستاعى ازامات تايلاندتا دەمالىپ جۇرگەندە كەنەتتەن جاعدايى كۇرت ناشارلاپ, جەدەل پانكرەاتيت سالدارىنان اسقىنۋ پايدا بولعان. اعزالارى ىستەن شىعا باستاعان سوڭ دارىگەرلەر ونى جاساندى كوماعا ەنگىزگەن. ناۋقاس ەكى اپتا بويى ەس-ءتۇسسىز جاتقان.
جانساقتاۋ بولىمىندەگى ءبىر تاۋلىكتىڭ ءوزى تۋىستارىنا شامامەن 1 ملن تەڭگەگە تۇسكەن. وسى ساتتە كوپتەگەن قازاقستان ازاماتتارى بەيجاي قالماي, كومەك قولىن سوزعان. ناتيجەسىندە اعزاسى سىرقاتپەن كۇرەسىپ, ارادا ءبىر جارىم ايعا جۋىق ۋاقىت وتكەندە الەكسەي العاش رەت جۇرتقا ءۇن قاتتى.
«ورتاق قولداۋدىڭ ارقاسىندا قازىر سىزدەرگە ۆيدەو جولداپ وتىرمىن. ءوزىمدى جاقسى سەزىنەمىن, ەسىم دۇرىس, قايدا ەكەنىمدى, قانداي جاعدايدا ەكەنىمدى تولىق تۇسىنەمىن», دەيدى ول.
دەگەنمەن ەم-دوم ءالى جالعاسىپ جاتىر. ۇزاق ۋاقىت قوزعالىسسىز جاتقاندىقتان, دەنەسىندە جارا پايدا بولىپ, وعان وتا جاسالعان. كەيىن دارىگەرلەر وكپەدەن ترومب انىقتاعان. قازىرگى تاڭدا ناۋقاستىڭ ىشىنە سۇيىقتىقتى شىعاراتىن ارنايى تۇتىكتەر قويىلعان. ول ازىرگە وزدىگىنەن وتىرا دا المايدى.
اعاسى تيحون ۆيۆتونەنكونىڭ ايتۋىنشا, الەكسەيدىڭ دەنەسى ءالى ءالسىز. قوزعالىس قابىلەتى وتە تومەن. قازىرگى جاعدايى قالىپتى ادامنىڭ شامامەن 15-20% دەڭگەيىندە عانا.
تايلاندتاعى پحۋكەت اۋرۋحاناسىندا ەمدەلۋ جانساقتاۋ بولىمىنەن ارزانداۋ بولعانىمەن, شەتەلدىككە كورسەتىلەتىن بارلىق قىزمەت اقىلى نەگىزدە جۇرگىزىلەدى. تۋىستارىنىڭ ايتۋىنشا, ناۋقاستى قازاقستاندا ەمدەۋ قارجىلاي دا, مورالدىق تۇرعىدان دا الدەقايدا جەڭىل بولار ەدى.
وسىعان بايلانىستى ولار بىرنەشە رەت دەنساۋلىق ساقتاۋ مينيسترلىگىنە جۇگىنگەن. العاشقى باس تارتۋ – ناۋقاستىڭ جاعدايى تىم اۋىر بولعاندىقتان بەرىلسە, ەكىنشى جولى – كەرىسىنشە, ونىڭ وزدىگىنەن تىنىس الىپ, ەسى انىق بولعانى ەسەبىنەن كورسەتىلگەن.
بۇل جاعدايعا قاتىستى دەپۋتات مۇرات ابەنوۆ پىكىر ءبىلدىرىپ, ماسەلەنى قاتاڭ باقىلاۋ كەرەگىن ايتتى.
«ەگەر ساراپشىلار ونىڭ جاعدايى اۋىر ەكەنىن راستاسا, ساناۆياتسيا ارقىلى جەتكىزۋ – ادامنىڭ زاڭدى قۇقىعى. قازىر ادامدار سۇرانباۋى كەرەك, تالاپ ەتۋى ءتيىس. قاجەت بولسا, سوتقا جۇگىنۋ كەرەك», دەدى دەپۋتات.
ال مينيسترلىك وكىلدەرىنىڭ ۇستانىمىنشا, قازىرگى جاعداي مەديتسينالىق اۆياتسيامەن تاسىمالداۋعا سايكەس كەلمەيدى.
سونىمەن قاتار, وعان ساناۆياتسيا كومەگى ءۇشىنشى رەت تە بەرىلمەگەنى بەلگىلى بولدى. قازىر ول ەسىن جيعانىمەن, ەكى اپتاعا سوزىلعان مەديكامەنتوزدى كومادان كەيىن اعزاسى ءالى ءالسىز. دارىگەرلەر ونىڭ ۇشۋىنا تەك مەديتسينا قىزمەتكەرىنىڭ باقىلاۋىمەن عانا رۇقسات بەرۋى مۇمكىن ەكەنىن ايتادى.
ء«بىز تەك مەديتسينالىق كورسەتكىشتەرگە سۇيەنەمىز. الەۋمەتتىك فاكتورلار قاراستىرىلماعان. شەتەلدىك ارىپتەستەر دە ناۋقاستى تۇراقتى رەيسپەن تاسىمالداۋعا بولاتىنىن جوققا شىعارمايدى. مۇنداي جاعدايلار بۇرىن دا بولعان», دەيدى ۇلتتىق شۇعىل مەديتسينانى ۇيلەستىرۋ ورتالىعىنىڭ باسشىسى ەرجان ادىلبەكوۆ.
قازىرگى تاڭدا الەكسەيدىڭ جاقىندارى شەتەلدە ەمدى جالعاستىرۋ ءۇشىن قاراجات جيناپ جاتىر. ال ناۋقاستىڭ ەلگە ورالۋ ماسەلەسى ءالى دە اشىق كۇيىندە قالىپ وتىر.
قازاقستان – Amazon Prime مەن Euronews نازارىندا: تۋريستىك تۋرلار سانى 3 ەسە ارتتى
