تۋريزم جانە سپورت مينيسترلىگىنىڭ مالىمەتىنشە, اتالعان ءىس-شارا ناۋرىز مەيرامىن اتاپ ءوتۋ اياسىندا وتكىزىلىپ, قالا تۇرعىندارى مەن قوناقتارىنا ۇلتتىق جانە الەمدىك اسحانانىڭ تاڭداۋلى ۇلگىلەرىن تانىستىرۋعا باعىتتالعان. سونىمەن قاتار بۇل ءىس-شارا ماڭىزدى وقيعالار كۇنتىزبەسىنە ەنگىزىلگەن. فەستيۆالگە قازاقستاننان جانە شەتەلدەن كەلگەن حالىقارالىق دەڭگەيدەگى 10 شەف-اسپاز قاتىسىپ, وزدەرىنىڭ اۆتورلى تاعامدارىن ۇسىنىپ, اسپازدىق شەبەرلىكتەرىن كورسەتەدى.
فەستيۆال اياسىندا ءتۇرلى گاسترونوميا بايقاۋلارى ۇيىمداستىرىلادى.
ءىس-شارا كەڭ اۋقىمدى مادەني-ويىن-ساۋىق باعدارلاماسىمەن قاتار وتەدى. قوناقتاردى street style جانە K-pop باعىتتارىنداعى Dance Battle, دومبىراشىلار ءانسامبلىنىڭ ونەر كورسەتۋى, باتىرلار شوۋى, تسيرك قويىلىمدارى, موتوشەرۋ مەن Moto Show, سپورت اۆتوكولىكتەرى كورمەسى, سونداي-اق قولونەرشىلەر جارمەڭكەسى كۇتەدى.
ءىس-شارا بىرنەشە تاقىرىپتىق ايماققا ءبولىنىپ ۇيىمداستىرىلادى. ەتنوايماقتا گاسترونوميا بايقاۋلارى مەن حالىقارالىق شەف-اسپازداردىڭ شەبەرلىك ساباقتارى وتەدى, ال ەۋروپالىق ايماقتا زاماناۋي شوۋ-باعدارلامالار, بي بايقاۋلارى جانە موتوشوۋ ۇسىنىلادى. سونىمەن قاتار اربات اۋماعىندا كۇنى بويى قولونەرشىلەر كورمەسى جۇمىس ىستەيدى.
فەستيۆالدىڭ رەسمي اشىلۋى سالتاناتتى تۇردە وتەدى, ال كەشكى ۋاقىتتا جەڭىمپازداردى ماراپاتتاۋ ءراسىمى مەن كونتسەرتتىك باعدارلاما ۇيىمداستىرىلادى. باعدارلامادا وتاندىق ارتىستەردىڭ ونەر كورسەتۋى جانە ارنايى شاقىرىلعان حەدلاينەردىڭ كونتسەرتى قاراستىرىلعان.
ايتا كەتەيىك, اتالعان ءىس-شارا 2026 جىلعى 21 ناۋرىز كۇنى ساعات 12:00-دە شىمكەنت قالاسىنداعى ءال-فارابي الاڭىندا وتەدى.
