الماتىعا تۇسكەن “كەلىن”

وعان ەلشىلەردىڭ جۇبايلارى اۋزىن اشىپ, كوزىن جۇمدى ناۋرىز مەرەكەسى قارساڭىندا الماتىعا “كەلىن” ءتۇستى. قالاداعى  ەڭسەلى “ينتەركون­تينەنتال” قوناقۇيىنىڭ “Bosphor” اتتى مەيرامحاناسىندا وتكەن كەلىن ءتۇسىرۋ, قۇداندالى بولۋ راسىمىنە حالىقارالىق ايەلدەر كلۋبىنىڭ مۇشەلەرى قاتىستى. بۇل كلۋبتىڭ مۇشەلەرى – ەلىمىزدەگى  ەلشىلەردىڭ, ديپلو­مات­تاردىڭ جۇبايلارى, قازاقستاندا جۇمىس ىستەپ جاتقان  ايگىلى كوم­پانيا جەتەكشىلەرىنىڭ ايەلدەرى. ۇلتىمىزدىڭ سالت-ءداس­تۇرىمەن تانىستىرۋعا ار­نالعان مەرەكەلىك شارانى ۇيىمداستىرۋ ءۇشىن اتال­مىش كلۋب مۇشەلەرى ت.ءجۇر­گەنوۆ اتىنداعى  قا­زاق ۇلتتىق ونەر اكادەميا­سى مەن ج.ەلە­بەكوۆ اتىن­داعى ەسترادا جانە تسيرك كوللەدجىنە ءوتىنىش ءبىلدىر­گەن ەكەن. ءدال وسىنداي تاماشا ۇسىنىسقا ونەر اكادەمياسىنىڭ ء“Englىsh club of KZ Art” كلۋبى دا قۋانا-قۋانا كەلىسىپ, حال­قىمىزدىڭ ەڭ سالتاناتتى دا ماعىنالى داستۇرلەرىنىڭ ءبىرى – “كەلىن ءتۇسىرۋ” ءرا­سىمىن ايتا-ايتا جۇرەر­لىك­تەي ۇيىمداستىرىپ بەردى. حالىقارالىق ايەلدەر كلۋبى وسىلايشا ويىن ويناپ, توي تويلاپ جۇرە بەرمەيدى. ونىڭ باستى بورىشى – مۇقتاج جاندارعا كومەك بەرۋ, قايىرىمدىلىق شارالارىن وتكىزۋ. بۇل كلۋبقا قازاقستانداعى ەلشى­لەردىڭ, ديپ­لوماتتاردىڭ جۇبايلارى عانا ەمەس, اپا-قارىنداستارى دا مۇشە بولىپ,  قايى­رىمدىلىق اكتسيالارىنا قوسىلىپ جاتادى. وسى وقيعانىڭ باسى-قاسىندا جۇرگەن ونەر اكادەمياسىنىڭ رەكتورى ارىستان مۇحامەدي ۇلى: – ەلشىلەردىڭ وتباسى مۇشەلەرى قازاقتىڭ سالت-داستۇرىنە قىزىعۋشىلىق تانىتىپ, ءتول مەرەكەمىز  ناۋرىزعا ەرەكشە كوڭىل ءبولىپ وتىر­عانى  ءبىز ءۇشىن ۇلكەن مارتەبە. ناۋ­رىزدى يۋنەسكو اۋقىمىندا اتاپ وتۋگە قول جەتكىزگەنىمىز – قازاقستاننىڭ وزگە ەلدەرمەن ديپلوماتيالىق قارىم-قاتىناسى بيىك دەڭگەيدە ەكەندىگىنىڭ ايعاعى. ءبىر كەزدەرى ۇمىت بولعان ۇلتتىق مەرەكەمىز قايتا جاڭعىرىپ, جاندانعانىنا 20 جىل وتسە دە, ادامزاتتىڭ قادىر-قاسيەتكە تولى ۇلىستىڭ ۇلى كۇنىنىڭ ءمان-ماعىناسىن بيىل ءبىرىنشى رەت الەم جۇرتشىلىعى مويىنداپ, بۇۇ تاراپىنان قولداۋ تاپتى. بۇل – ۇلكەن قۋانىش, – دەيدى. سونىمەن بەكزات جيىننىڭ باستى وقي­عاسى باستالار ءسات تە جاقىندادى. كەلىستى قىز-كەلىنشەكتەر, سالتاناتتى ورتانىڭ ءساندى تىنىشتىعىن “سۇيىنشىلەگەن” قۋانىشتى داۋىس ءبوزدى.  سويتسەك “قۇدالار” كەلە جاتىر ەكەن. اكادەميا مەن كوللەدجدىڭ تالانتتى جاستارى تەاترلاندى­رىلعان كورىنىستەرمەن “تويدى” باستاپ كەپ جىبەردى. وسىناۋ كورىنىستەرگە ستۋدەنتتەر سالت-داستۇرلەرىمىزدى كەڭىنەن سيعىزىپ, سالتاناتتى بار ماعىناسىن قوسا ورۋگە قول جەتكىزدى.  وڭايلىقپەن ەشنارسەگە ەلەڭدەي قويمايتىن ەلشىلەردىڭ ايەلدەرى عاجايىپ ساتتەرگە ءتانتى بولىپ, تاكاپ­پارلىق تۋرالى ۇمىتىپ, سۋرەت­كە دە ءتۇسىرىپ الىپ جاتتى.   حانىمدار مەن بيكەشتەر اراسىنان بەتاشار كەزىندە وزدە­رىنىڭ اتى اتالىپ, كەلىن سالەم بەرگەندە  ءوزىمىزدىڭ كادەمەن ورتاعا شىعىپ, ورامالعا اقشا تاستاعاندار دا تابىلدى. قازاقتىڭ ساۋكەلەلى, كوركەم كەلىنى  يبالىلىقپەن ءيىلىپ سالەم بەرگەنى دە قانداي جاراسىمدى ەكەنىن سىرتتاعى سىنشى كوزبەن قاراعاندا انىق ۇعادى ەكەنسىڭ. ايناش ەسالي, الماتى.