بۇعان دەيىن الەمگە ايگىلى كومپانيا تمد ەلدەرىنىڭ ىشىندە العاش رەت الماتىدا وكىلدىگىن اشىپ, جۇمىسىن باستاعان. ەندى اتىراۋدان كەڭسە اشىپ, جاڭا جوبالارعا قاتىسۋعا ىقىلاس ءبىلدىرىپ وتىر.
Tokyo Rope International كومپانياسىنىڭ پرەزيدەنتى ساتو كادزۋنوري: «اتىراۋ وبلىسىنىڭ ەكونوميكالىق الەۋەتىن سارالاپ قارادىق. قارقىندى دامىپ كەلە جاتقان ايماققا ءوزىمىزدىڭ جوعارى تەحنولوگيالارىمىزدى تارتىپ, بىرنەشە جوبالاردى ىسكە اسىرۋعا نيەتتىمىز. جاعالاۋدى بەكىتۋ جۇمىستارىن جۇرگىزۋ, قاتەرلى دەرتپەن اۋىراتىندارعا ارنالعان مەديتسينالىق ورتالىق اشۋ جوسپاردا بار»,-دەيدى.
كومپانيا وكىلدىگى كەڭسەسىنىڭ اشىلۋ سالتاناتىندا وبلىس اكىمى نۇرلان نوعاەۆ Tokyo Rope باسشىلىعىنا سەرىكتەستىكتەرى ءۇشىن ريزاشىلىعىن ايتىپ: «عاسىرلىق تاريحى بار كومپانيا الدىڭعى قاتارلى تەحنولوگيالارىمەن دۇنيە جۇزىنە بەلگىلى. قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ جاپونياعا جۇمىس ساپارى كەزىندە Tokyo Rope كومپانياسىنىڭ باسشىلىعىمەن كەزدەسىپ, جاپون بيزنەسىنىڭ ءبىزدىڭ ەلىمىزگە كەلۋىنە باستاماشى بولعان ەدى. جاقىن بولاشاقتا ءوڭىرىمىز ءۇشىن اسا ماڭىزدى جوبالاردى بىرگە باستاۋدى جوسپارلاپ وتىرمىز. جوعارىدا اتالعان جوبالارمەن بىرگە ماشيناجاساۋ سەكتورىندا دا ويعا العان ىستەر بار»,-دەپ اتاپ ءوتتى.
مەملەكەت باسشىسىنىڭ شەتەلدىك ينۆەستيتسيا تارتۋ تۋرالى تاپسىرماسى مۇنايلى وڭىردە جان-جاقتى ورىندالۋدا دەپ سەنىممەن ايتۋعا بولادى. قازىر وبلىستا شەتەلدىك قاتىسى بار ءبىر مىڭنان استام كومپانيا جۇمىس ىستەيدى. ەلىمىزدىڭ ەكونوميكالىق الەۋەتىن كوتەرۋگە مۇمكىندىك بەرەتىن جارقىن جوبالار قاتارى ءالى دە تولىعا تۇسپەك.
