الدىن الا كورسەتىلىم بارىسىندا: «بەكزات ساتتارحانوۆ دەسە, دەگبىرىمىز تاۋسىلعانشا ايتۋعا بارمىز. سەبەبى ۇلت ۇلىلىعىن ۇلىقتاعان, جەر جاھانعا 20 جاسىندا ءوز ەلىنىڭ اتىن تانىتىپ كەتكەن باتىر بەكزات بارلىق يگى ىلتيپاتقا قاشان دا لايىق. جاسىنداي جارق ەتكەن جاس عۇمىردىڭ ەرتە ۇزىلگەنى قاي-قايسىمىزدىڭ دا قابىرعامىزدى قايىستىردى. بەكزاتتاي باتىردىڭ بولمىسىن بۇگىنگى ۇرپاقتىڭ جادىنا جەتكىزۋ, بۇگىنگى ۇرپاق ساناسىنا ءسىڭىرۋ – بارشامىزدىڭ پارىزىمىز. سوندىقتان دا «حابار» اگەنتتىگى سيدنەي وليمپياداسىنىڭ چەمپيونى, مارقۇم بەلگىلى بوكسشى - بەكزات ساتتارحانوۆ تۋرالى تۇڭعىش اۆتوبيوگرافيالىق «بەكزات» دراماسىن تاسپالاۋدى ۇيعاردى. ماقساتىمىز - ەرتە سونگەن جۇلدىزدىڭ ساناۋلى عۇمىرىنداعى جىگەرلى جەتىستىكتەرىن, قايتپاس قايسارلىعىن, ۇلجاندىلىعى مەن نامىسقويلىعىن كورسەتۋ ارقىلى بۇگىنگى جاس ۇرپاقتى رۋحتاندىرۋ, جاس سپورتشىلارىمىزعا بۇقارالىق سالاماتتى ءومىر سالتىن ناسيحاتتاۋ», - دەدى «حابار» اگەنتتىگى اق باسقارما توراعاسىنىڭ ءبىرىنشى ورىنباسارى رينات كەرتاەۆ.
بەكزات ساتتارحانوۆتىڭ اتا-اناسى ءىس-شارانىڭ قۇرمەتتى قوناعى بولدى.
«20 جاس عۇمىرىندا قولىنان كەلگەنشە ەلىنە بارلىق كۇش-جىگەرىن بەرىپ كەتتى. بەكزاتقا قانداي ماراپات, قانداي كينو شىعارسا دا ارتىق بولماس. بەكزاتتى جاستاردىڭ الدىنا ۇلگى ەتىپ قويسا... ونىڭ يماندىلىعى, ۇلكەندى سىيلاۋى, قازاقىلىعى, بىربەتتىلىگى, العا قويعان ماقساتىن ورىندايتىن مىنەزى قازىرگى قازاق جاستارىنا كەرەك» - دەيدى بەكزات ساتتارحانوۆتىڭ اكەسى سەيىلحان ساتتارحانوۆ.
ءفيلمنىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. بالالىق شاعى, بوز بالا كەزەڭى جانە ءومىرىنىڭ سوڭعى ءساتى. 90-جىلداردىڭ باسىنداعى قيىن-قىستاۋ زامانعا تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى, نامىسقوي ءبىتىمى ءاربىر ساتتە سىنالىپ وتىرادى.
بىردە اتا-اناسى بەكزاتتى كۇرەسكە قاتىسسىن دەپ باپكەرگە اپارادى. وندا بەكزات ءوزىنىڭ سەرگەكتىگىمەن كوزگە تۇسەدى. دەگەنمەن كۇرەسكە قاتىسقان بالانىڭ بويى وسپەي قالادى دەگەن تۇسىنىكپەن ونى بوكسقا اۋىستىرادى. باپكەرىمەن تانىسقان كۇننەن باستاپ, بۇل سپورت تۇرىنە ەرەكشە ماحابباتى اشىلادى. كۇن سايىن ەرىنبەي جاتتىعىپ, العاش رەت تۇركىستاندا وتكەن سايىستا جارقىراپ كورىنەدى. بوزبالا شاعىندا گەرمانيادا وتكەن تۋرنيردە توپ جارىپ, باپكەرلەر وليمپياداعا دايارلاۋ جاتتىعۋلارىنا قابىلدايدى. 1999 جىلى تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە يە بولىپ, وليمپيادا ويىندارىنا جولداما الادى. وسىلايشا, 2000 جىلى سيدنەيدە تارتىستى ويىندار وتكىزىپ, التىن مەدالعا يە بولادى.
كارتينانىڭ رەجيسسەرى - مۇرات بيدوسوۆ, ستسەناريىن سەرجان زاكەر ۇلى جازعان.
ءفيلمنىڭ ءتۇسىرىلىم جۇمىستارى تۇركىستان, الماتى جانە ىستامبۇل قالالارىندا وتكەن. باستى ءرولدى جاس اكتەر سامات ازىمقۇلوۆ وينايدى. ول 2006-2007 جىلدارى كيكبوكستان جاستار اراسىندا ەكى رەت قازاقستان چەمپيونى بولعان.
