ونىڭ ايتۋىنشا, بايلانىس ساپاسىنىڭ تومەن بولۋى ءاردايىم ءموبيلدى جەلى بايلانىسى وپەراتورلارىنىڭ جۇمىسىنا بايلانىستى بولا بەرمەيدى, قاجەتتى ينفراقۇرىلىمنىڭ بولماۋى دا ۇيالى بايلانىس جۇمىسىنا كەدەرگى بولۋى مۇمكىن.
«ششۋچينسك-بۋراباي ايماعىندا اقمولا وبلىسى اكىمدىگىنىڭ قولداۋىمەن ءبىز ءتيىستى بازلاقى ستانتسيالاردى ورناتۋعا مۇمكىندىك بەرگەن جۇمىستاردى جۇرگىزدىك. سونىڭ ناتيجەسىندە بۇل ايماقتا ۇيالى بايلانىس ساپاسى ءبىرشاما جاقساردى. قازىر ءبىز وسىنداي جۇمىستى نۇر-سۇلتان قالاسىنىڭ اكىمدىگىمەن جۇرگىزىپ جاتىرمىز - قالا بويىنشا 50 ماچتالىق قۇرىلعى ورناتىلىپ, كوپتەگەن پروبلەمالار شەشىمىن تابادى. ودان سوڭ ءبىز پاۆلودار جانە الماتىمەن جۇمىس ىستەۋدى كوزدەپ وتىرمىز», — دەدى ا. جۇماعاليەۆ.
مينيستر اتاپ وتكەندەي, 5G ەنگىزۋ مۇنداي ماسەلەلەردىڭ قالالاردا دا, اۋىلدىق ەلدى مەكەندەردە دە شەشىلۋىنە ىقپالىن تيگىزەتىن بولادى. بۇل تەحنولوگيا ەل ەكونوميكاسىن تسيفرلاندىرۋ ءۇشىن اسا ماڭىزدى.
«5G ەنگىزۋ كوپتەگەن ماسەلەلەردى شەشىمىن تابۋعا كومەكتەسەدى, ونىڭ ىشىندە «اقىلدى قالالار» كىرىكتىرىلگەن تەحنولوگياسىن ەنگىزۋ, كولىك جۇيەسىن تسيفرلاندىرۋ, سونداي-اق قاۋىپسىزدىكپەن بايلانىستى بارلىق ماسەلەلەر بار», — دەدى ا. جۇماعاليەۆ.
ا. جۇماعاليەۆ 5G جەلىسىنە اۋىسقان جاعدايدا ينتەرنەت تاريفتەرىنىڭ قۇنى كوتەرىلمەيتىنىن ايتتى. سونىمەن قاتار مەملەكەت تاراپىنان بيۋدجەت قاراجاتى بولىنبەيدى.
«بىرىنشىدەن, 5G ەنگىزۋ ءۇشىن مەملەكەت تاراپىنان ەشقانداي قاراجات بولىنبەيدى. وتيكەنى بۇل جەكە وپەراتوردىڭ جۇمىسى. ەكىنشىدەن, 5G تەحنولوگياسى قىمبات تۇراتىندىقتان, ءبىز الدىمەن ونى قالالاردا ەنگىزەتىن بولامىز. بۇگىنگى تاڭدا بۇكىل الەمدە 5G تەك قالالاردا ەنگىزىلەدى. بولاشاقتا ەگەر مۇمكىندىك بولسا, جەتكىزۋشى كومپانيالارمەن بىرلەسىپ ءبىز 5G-ءدى اۋىلدىق جەرلەردە دە ەنگىزۋدى قاراستىرامىز. 3G-دەن 4G تەحنولوگياسىنا اۋىسقانداعى تاريفتەر تۋرالى ايتاتىن بولساق, ءبىز ەشقانداي ءتاريفتى اۋىستىرعان جوقپىز. بولاشاقتا دا جۇمىس وسىلاي جۇرگىزىلەدى. 5G-گە اۋىسقان كەزدە ءبىز تاريفتەر قۇنىن كوتەرمەيمىز», — دەدى ا. جۇماعاليەۆ.
بۇگىنگى تاڭدا «قازاقتەلەكوم» اق قازاقستاندا 5G -ءدى 6 تەستىلەۋدەن وتكىزدى, ونىڭ ىشىندە نۇر-سۇلتان, الماتى قالالارىندا جانە الماتى وبلىسىندا. 5G جەلىلەرىندە دەرەكتەردى بەرۋ جىلدامدىعى بويىنشا الىنعان ناتيجەلەر 4G كورسەتكىشتەرىنەن 10-100 ەسە ارتىق.
ايتا كەتەيىك, قازىرگى تاڭدا بارلىق قالالاردا كەڭجولاقتى ينتەرنەت قول جەتىمدى. 3324 اۋىلدىق ەلدى مەكەن ينتەرنەت جەلىسىمەن قامتىلعان. 2020 جىلدىڭ سوڭىنا دەيىن كەڭجولاقتى ينتەرنەت جەلىسىمەن تاعى 880 اۋىلدىق ەلدى مەكەن قامتىلاتىن بولادى. تۇرعىندار سانى از (50 جانە ودان اساتىن) اۋىلدار ءۇشىن جەرسەرىكتىك بايلانىس تەحنولوگياسىن پايدالانۋمەن ينتەرنەتپەن قامتاماسىز ەتۋدىڭ تەحنيكالىق مۇمكىندىگى قاراستىرىلاتىن بولادى.
