1 قازان – قارتتار كۇنىنە وراي اقتاۋ قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ وقۋشىلارى «ۇلكەنگە بىزدە ىزەت بار» اتتى قۇرمەت كۇنىن وتكىزدى. ءبىلىم ورداسىنىڭ وقۋشىلارى اتا-اجەلەرىن مەكتەپكە شاقىرىپ, ولاردىڭ ءومىر تۋرالى تەرەڭ ويلارىن تىڭدادى.
«دارا جول» باعدارلاماسى فورماتىندا ۇيىمداستىرىلعان جۇزدەسۋدە نەمەرەلەرىنە ەرىپ مەكتەپكە كەلگەن قارتتار – ورازعالي وتەۋليەۆ, كۇرەڭتاي ىزبەرگەنوۆ, سايلاۋ قاليەۆ پەن جۇمانۇر بالحاەۆ بوزبالالىق شاقتارى, ارماندارى, ەڭبەك جولدارى, ءومىر جانە وتباسىلىق قۇندىلىقتارى تۋرالى ايتىپ, جينالعان وقۋشىلاردى اڭگىمەگە ۇيىتتى. ءوز كەزەگىندە زياتكەرلەر اتالارىنا ارناپ, كورىنىس قويىپ, قازاقتىڭ كيەلى دومبىراسىنان كۇي كۇمبىرلەتتى.
– مەكتەبىمىزگە كەلگەن اتالارىمىز كوپتى كورگەن, ونەگەلىك جولى بار, تەرەڭ ويلى اقساقالدار ەكەن. قازاقتىڭ قۇندىلىقتارىن بويلارىنا ءسىڭىرىپ, ەندى سول ىزگى قاسيەتتى ۇرپاق بويىنان كورسەك دەپ ارماندايتىن قاريالار كوپتەگەن تۇششىمدى ويلارىن ايتىپ, وقۋشىلاردى عانا ەمەس, ۇستازداردى دا رۋحاني بايىتىپ, ۇلكەن تاربيەلىك ساعاتىن وتكىزدى. كەش سوڭىندا بالالار كەزدەسۋدەن كەتكىسى كەلمەدى, – دەيدى مەكتەپ ديرەكتورىنىڭ ورىنباسارى التىنزەر يحسانوۆا.
سونداي-اق زياتكەرلەر ورداسىندا قاريالارعا ىزەت كورسەتۋ ماقساتىندا «ۇرپاقتار ساباقتاستىعى» فوتوكورمەسى ۇيىمداستىرىلدى. وقۋ عيماراتىنىڭ باس دالىزىندە بالالاردىڭ اتا-اجەلەرىمەن تۇسكەن سۋرەتتەرى قاز-قاتار ءىلىنىپ, ىستىق لەبىز ءبىلدىرۋ تاقتايشاسى ورناتىلدى.
قارتتارعا قۇرمەت بۇل شارامەن اياقتالمايدى دەيدى وقۋ ورنىنىڭ ۇستازدارى. ەندى «مەيىرىم وسكىنى» اتتى وقۋشىلاردىڭ قايىرىمدىلىق توبى ماڭعىستاۋ وبلىستىق قارتتار ءۇيىنىڭ اقساقالدارىنا «Bookcrossing» جوباسى اياسىندا كىتاپتار مەن وسى كۇنگە دەيىن بىرلەسە وتكىزگەن كەزدەسۋلەردەن ەستەلىك البوم سىيلاماق, سونداي-اق قاريالارمەن كاسپي جاعاسىنا جانە قالا ىشىنە ەكسكۋرسيا جوسپارلانعان.
قاريا – كوش باسىنداعى اداستىرماس باعدار. بابا جولىنان جاڭىلمايمىن دەگەن جاس قارتتارعا قامقورلىق تانىتا ءجۇرىپ, ولاردىڭ ءتالىمى مەن ۇلاعاتىن بويىنا سىڭىرە قالىپتاساتىنى انىق. اقتاۋداعى مەكتەپتە وتكەن شاعىن شارا ءارى قىزىقتى, ءارى تارتىمدى, ەڭ باستى قۇندىلىعى – قارتتار مەن جاستاردىڭ پىكىرلەسۋ الاڭىن قۇرا العان جاڭاشىلدىعىندا.
ماڭعىستاۋ وبلىسى
