قازمەديا ورتالىعىندا وتكەن ءباسپاسوز ءماسليحاتىندا اقپارات جانە قوعامدىق دامۋ ءمينيسترى داۋرەن اباەۆ «100 جاڭا ەسىم» جوباسىنىڭ ءۇشىنشى كەزەڭى باستالعانىن حابارلادى.
– بۇگىن ۇلكەن جوبانى باستاعالى جاتىرمىز. وسىدان ەكى جىل بۇرىن ەلباسىنىڭ باستاماسىمەن «رۋحاني جاڭعىرۋ» باعدارلاماسى جاريالاندى. سونىڭ اياسىندا «100 جاڭا ەسىم» جوباسىنىڭ ءۇشىنشى كەزەڭىن وتكىزۋدى قولعا الدىق. بۇل جوبا قوعامنىڭ دامۋىنا ءوزىنىڭ ۇلكەن ىقپالىن تيگىزىپ كەلەدى. سوندىقتان ونى جالعاستىرۋعا بەل بۋدىق. اتالعان باستاما تاۋەلسىزدىك جىلدارىندا ەلىمىزدىڭ ىرگەسىن بەكىتۋگە ۇلەس قوسقان ازاماتتاردى تانىستىرۋدى, ولاردىڭ ەڭبەگىن ناسيحاتتاۋدى كوزدەيدى. بۇعان ەكى جىلدىڭ ىشىندە 5 مىڭعا جۋىق ادام قاتىستى. ۇزدىكتەردى انىقتاۋ ءۇشىن ەكى ميلليونعا جۋىق قازاقستاندىق داۋىس بەردى, – دەدى مينيستر.
ودان كەيىن «رۋحاني جاڭعىرۋ» قازاقستاندىق الەۋمەتتىك دامۋ ينستيتۋتىنىڭ توراعاسى كەمەلبەك ويشىباەۆ «100 جاڭا ەسىم» جوباسى تۋرالى جان-جاقتى ماعلۇمات بەرىپ, داۋىس بەرۋ پروتسەسىن ءتۇسىندىردى. ونىڭ ايتۋىنشا, وتىنىمدەردى قابىلداۋ 20 قازانعا دەيىن جالعاسادى. جاستار جىلىنا ارنالعان جوباعا قاتىسۋعا نيەت تانىتقانداردىڭ جاسى 39-دان اسپاۋى كەرەك. ۇمىتكەرلەر 100janaesim.ruh.kz سايتىندا ساۋالدامانى تولتىرۋى قاجەت. قاتىسۋشىعا سەنىمدى ءارى ناقتى اقپارات بەرۋ مىندەتتەلەدى. بارلىق وتىنىمدەر مودەراتسيادان ءوتىپ, كەيىن سايتتا جاريالانىپ, جەلىدە داۋىس بەرۋگە رۇقسات الادى. سونىمەن قاتار بەلگىلى قوعام جانە مادەنيەت قايراتكەرلەرى, سپورت جانە بيزنەس وكىلدەرىنەن تۇراتىن قازىلار القاسىنىڭ قاراۋىنا ۇسىنىلادى.
ال ۇمىتكەرلەرگە داۋىس بەرۋ ءۇشىن جوبانىڭ رەسمي سايتىنا تىركەلۋ كەرەك. داۋىس بەرۋشىلەر ءار سالادان تەك ءبىر ۇمىتكەردەن تاڭداي الادى. كونكۋرستىڭ ناتيجەلەرى بيىل جەلتوقسان ايىندا ەلباسىنىڭ قاتىسۋىمەن وتەتىن تانىستىرىلىمدا جاريالانادى.
سونىمەن قاتار اتالعان جوبانىڭ وتكەن جىلدارداعى ەڭ بەلسەندى جەڭىمپازدارىنان «بيۋرو 100» كومانداسى قۇرىلدى. ولار بايقاۋعا ەڭ لايىقتى ۇمىتكەرلەردى ىزدەستىرۋ ءۇشىن قازاقستاننىڭ بارلىق ايماقتارىن ارالايدى. كوماندا الەۋمەتتىك جەلىلەردە جوبا قاتىسۋشىلارىن ىزدەۋدىڭ بارلىق كەزەڭدەرىن كورسەتەدى. سولاردىڭ ءبىرى, «100 جاڭا ەسىم» جوباسىنىڭ جەڭىمپازى اسان جولداسوۆ بۇل باستامانىڭ جاقسى قىرلارىن, ءبىلىم سالاسىنداعى جاستاردىڭ ەڭبەگىن كورسەتۋگە سەپتىگىن تيگىزەتىنىن جانە جاستار جىلىندا جاس مۇعالىمدەرگە ەرەكشە نازار اۋدارىلىپ جاتقانىن اتاپ ءوتتى. ول – ماتەماتيك, باعدارلاماشى جانە وقىتۋشى. 2018 جىلى «قوعام» باعىتىندا 15 757 داۋىسپەن جەڭىمپاز اتانعان ا.جولداسوۆ وقۋشى كەزىنەن-اق ماتەماتيكادان رەسپۋبليكالىق, حالىقارالىق وليمپيادالارعا قاتىسقان جانە 19 جاسىندا ءوز مەكتەبىن اشقان. وقىتۋدىڭ ارنايى ادىستەمەسىن جاساپ, «پيفاگور» مەكتەبىن ۇلكەن كومپانياعا اينالدىرعان. وسىلايشا 10 جىلدا 10 مىڭنان اسا بالانىڭ ماتەماتيكاعا قىزىعۋشىلىعىن وياتقان.
