ۆيرتۋالدى ساياحات بارىسىندا « ۇلى دالانىڭ جەتى قىرى» ماقالاسىنا نازار اۋدارىلىپ, قاتىسۋشىلار جىلقىنىڭ ۇلتتىق رۋحانياتقا, قازاقى جادىعا, حالىقتىق ساناعا اينالىپ كەتكەنى جونىندە كەڭىنەن اقپارات الدى.
مادەني شاراعا قازاقستان حالىق اعارتۋ ءىسىنىڭ ۇزدىگى, قازاقستان جۋرناليستەر وداعىنىڭ مۇشەسى, تاريحشى, ەتنوگراف مۇحامەتقازى مۇحامادي ۇلى, اباي اۋدانىنىڭ تۇرعىنى, جىلقى شارۋاشىلىعىندا 40 جىل ەڭبەك ەتكەن زەينەتكەر شىڭعىس سەرىكباي, اقىن قۋاندىق كەنجەبەك ۇلى جانە ءبىرجان سەرىكباي ۇلى قاتىستى.
شارا قوناقتارى تاريحشى, ەتنوگراف مۇحامەتقازى مۇحامادي ۇلى جىلقى شارۋاشىلىعى مەن قولعا ۇيرەتۋ تاريحىنىڭ باستاۋى قازاقستان اۋماعىندا مادەنيەت رەتىندە قالاي پايدا بولعانى تۋرالى ايتىپ بەردى, ال شىڭعىس سەرىكباي اتقا ءمىنۋ مادەنيەتى تۋرالى ايتىپ, جىلقى شارۋاشىلىعى تاجىريبەسىمەن ءبولىستى. شارا سلايد-تۇساۋكەسەرمەن جانە بەينەروليكتەرمەن سۇيەمەلدەنىپ, جاس اقىندار ولەڭدەرىن وقىدى.
سوڭىندا قاتىسۋشىلار ءوز ۇرپاعىنىڭ لايىقتى وكىلى بولۋ كەرەك ەكەنىن, ءوز حالقىنىڭ, جالپى ادامزاتتىڭ وتكەنى مەن بۇگىنگى تاريحىن ساقتاپ قالۋ تۋرالى ويلارىمەن ءبولىسىپ, تىلەكتەرىن جەتكىزىپ, «ەر قاناتى - ات» اتتى كىتاپ كورمەسىن تاماشالادى.
