القالى جيىنعا اقپارات جانە قوعامدىق دامۋ ءمينيسترى داۋرەن اباەۆ, قوعامدىق كەڭەس توراعاسى تولەۋتاي سۇلەيمەنوۆ جانە كەڭەسكە مۇشە ۇكىمەتتىك ەمەس ۇيىمداردىڭ وكىلدەرى مەن ساراپشىلار قاتىستى.
كەڭەس جۇمىسىنىڭ كۇن تارتىبىندە الدىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. بۇل قۇجاتتىڭ جاي-جاپسارىمەن باق سالاسىنداعى مەملەكەتتىك ساياسات دەپارتامەنتىنىڭ ديرەكتورى باحنياز قاراشينا تانىستىردى. ونىڭ ايتۋىنشا, اتالعان زاڭ جوباسى اياسىندا 5 نەگىزگى نورمانى ەنگىزۋ كوزدەلىپ وتىر. ولار – وتاندىق اقپاراتتىق باسىلىمدار ءۇشىن سالىقتىق جەڭىلدىكتەر, مەملەكەتتىك اقپاراتتىق ساياساتتىڭ بىرىڭعاي جۇيەسىن قۇرۋ, وتاندىق باق-تا سىرا مەن شاراپتىڭ ساۋدا بەلگىسىنە نەمەسە اتاۋىنا جارناما جاساۋعا تىيىمدى الۋ تاستاۋ, مەملەكەتتىك قاتىسى بار تەلەراديوارنالار ءۇشىن حابار تاراتۋ ءتىلىن انىقتاۋدا وكىلەتتى ورگاننىڭ قۇزىرەتىن بەكىتۋ جانە اقپاراتقا قولجەتىمدىلىك تۋرالى زاڭنامانى جەتىلدىرۋ.
گازەت پەن جۋرنالدار ءۇشىن 2021 جىلدان باستاپ 10 جىل مەرزىمگە نولدىك مولشەرلەمەمەن قوسىلعان قۇن سالىعىن ەنگىزۋ كوزدەلەدى. سالىقتىق جەڭىلدىك 2911 باق سۋبەكتىسىن قامتيدى. ونىڭ 1837-ءسى – گازەت, 1074-ءى – جۋرنال. مۇنداي جەڭىلدىك باسىلىمنىڭ مىندەتتى تۇردە ونلاين-نۇسقاسى بولعان كەزدە عانا ۇسىنىلادى.
سونىمەن قاتار زاڭ جوباسىندا قازاقستان اۋماعىندا شىعارىلعان سىرا مەن شاراپتىڭ تاۋارلىق بەلگىسى مەن اتاۋىنا جارناما جاساۋعا تىيىمدى الىپ تاستاۋ ۇسىنىلادى. باحنياز قاراشينا مۇنداي جارنامالار ينتەرنەت جەلىسى مەن شەتەلدىك كابەلدىك تەلەارنالاردا كورىنىس تابا بەرەتىنىن, ال قازاقستاندىق باق بۇل كىرىس كوزىنەن ايرىلىپ وتىرعانىن ايتىپ, وزگەرىستىڭ سەبەبىن ءتۇسىندىردى. بۇل سۋسىنداردىڭ جارناماسى گازەتتەردىڭ ءبىرىنشى جانە سوڭعى بەتتەرىنە, جۋرنالداردىڭ مۇقاباسىنا جاريالانباۋى ءتيىس. تەلەارنالار ءۇشىن مۇنداي جارناما ساعات 22-00-دەن 06-00-گە دەيىن عانا رۇقسات ەتىلمەك. الكوگول ونىمدەرى جارنامالانعاندا شامادان تىس ءىشۋدىڭ زيانى تۋرالى مىندەتتى تۇردە ەسكەرتىلەدى. بۇعان قوسا سىرا مەن شاراپ جارناماسىنان كەيىن ىلە-شالا سالاماتتى ءومىر سالتىن ناسيحاتتايتان روليكتەر كورسەتىلەدى.
وسى تۇستا اقپارات جانە قوعامدىق دامۋ ءمينيسترى داۋرەن اباەۆ زاڭ جوباسىنىڭ ىشىمدىك جارناماسىنا قاتىستى بولىگىن ىشكى ىستەر مينيسترلىگىمەن بىرگە زەرتتەگەندەرىن, قىلمىستىڭ وسۋىنە مۇنداي جارنامالاردىڭ كورسەتىلۋى اسەر ەتپەيتىنىن, سونداي-اق بۇدان تۇسكەن قارجىنىڭ ەسەبىنەن الەۋمەتتىك جارنامالاردىڭ سانى ارتاتىنىن ايتتى.
كەلەلى كەڭەستە كوپشىلىكتىڭ نازارىنا ۆولونتەر جىلىن وتكىزۋ تۋرالى جوسپار ۇسىنىلدى. بۇل تۋرالى ازاماتتىق قوعام ىستەرى كوميتەتىنىڭ توراعاسى ءاليا عالىموۆا جان-جاقتى بايانداپ بەردى. ونىڭ ايتۋىنشا, جوسپاردا قازاقستاندا ۆولونتەرلىكتى دامىتۋدى 7 باعىت بويىنشا جۇزەگە اسىرۋ كوزدەلگەن. ءبىرىنشىسى – ۆولونتەرلىك قىزمەت ءۇشىن قولايلى ورتانى دامىتۋ. وسى باعىت شەڭبەرىندە ۆولونتەرلىك قىزمەت ماسەلەلەرى بويىنشا زاڭ جوباسى ازىرلەنبەك. كوللەدجدەر مەن جوعارى وقۋ ورىندارىنا ءتۇسۋ كەزىندە ۆولونتەرلىك قىزمەتتى ەسەپكە الۋ بويىنشا نورمالار ۇسىنىلادى, سونداي-اق ەرىكتىلەردىڭ جۇمىس تاجىريبەسىن ەڭبەك وتىلىنە ەنگىزۋ بويىنشا نورمالار قاراستىرىلادى. بۇعان قوسا ستاتيستيكالىق ەسەپكە ەنگىزۋ ءۇشىن ەلدىڭ الەۋمەتتىك-ەكونوميكالىق دامۋىنا ۆولونتەرلىك قىزمەتتىڭ قوسقان ۇلەسىن باعالاۋ جونىندەگى ادىستەمە دايىندالادى.
اتالعان جوسپاردا ۆولونتەرلىك قىزمەتتىڭ ينفراقۇرىلىمىن دامىتۋ جانە وعان قاتىسۋشىلاردىڭ الەۋەتىن ارتتىرۋ, ۆولونتەرلىك قىزمەتكە ازاماتتاردى كوپتەپ تارتۋ, كورپوراتيۆتىك ۆولونتەرلىك جوبالاردى ىسكە اسىرۋ, ۆولونتەرلىك سالادا حالىقارالىق ىنتىماقتاستىقتى دامىتۋ سياقتى باعىتتار قاراستىرىلعان.
وتىرىستا رەپاتريانتتارعا ء«بىر تەرەزە» قاعيداتى بويىنشا مەملەكەتتىك قىزمەت كورسەتۋ كەزىندە بيزنەس-پروتسەستەردى وڭتايلاندىرۋ تۋرالى ەتنوستىق قاتىناستاردى دامىتۋ دەپارتامەنتى ديرەكتورىنىڭ ورىنباسارى ەركىن ۇيسىمباەۆ ايتىپ بەردى. بۇل سالاداعى جۇمىستار شەتەلدەن ورالعان قانداستاردىڭ قۇجاتتارىن راسىمدەۋدى جەدەلدەتۋگە سەپتىگىن تيگىزبەك.
قانداستار ماسەلەسى قوزعالعاندا قوعامدىق كەڭەس مۇشەسى كەڭشىلىك تىشحان قوعامدا تىلدىك, رۋلىق, ناسىلدىك كەمسىتۋشىلىكتەرگە قوسا تاريحي وتانىنا قونىس اۋدارعانداردى ورالمان دەپ شەتتەتەتىن جاعدايلاردىڭ ءجيى كەزدەسەتىنىن ايتتى. سونداي-اق ول جۇمىسقا ورنالاسقان سايىن تالاپ ەتىلەتىن سوتتالماعانى تۋرالى قاعازدى قانداستار وزدەرى تۋعان شەت مەملەكەتتەن الدىرۋعا تۋرا كەلەتىنىن, بۇل قۇجات جيناۋ پروتسەسىن ايتارلىقتاي قيىنداتاتىن جەتكىزدى.
سونىمەن قاتار جيىندا وتباسىلىق سوتتاردىڭ جانىنداعى وتباسىن قولداۋ «باقىتتى وتباسى» رەسۋرستىق ورتالىعىنىڭ قىزمەتى دە كەڭىنەن تالقىلاندى.
