ارقايسىسى 500 بەتتەن تۇراتىن كىتاپقا 60 قازاق اۆتورىنىڭ تاڭدامالى شىعارمالارى ەنگەن. انتولوگيانى اعىلشىن تىلىنە اۋدارىپ, باسپادان شىعارۋدا جوباعا ساراپشىلىق قولداۋ كورسەتكەن بريتانيا كەڭەسى بولسا, ال ەڭ باستى سەرىكتەس – كەمبريدج ۋنيۆەرسيتەتىنىڭ باسپاسى (سambridge University Press) ۇلتتىق اۋدارما بيۋروسىمەن بىرگە جولما-جول اۋدارمانى ادەبي وڭدەۋ, باسپاعا دايىنداۋ, سونداي-اق باسىلىمداردى شەتەلدەردە ناسيحاتتاۋ جۇمىستارىن اتقارعان.
انتولوگيانىڭ العىسوزىن بريتانيانىڭ اكادەميالىق قوعامداستىعىنىڭ بەلدى وكىلدەرى جازدى. مىسالى, زاماناۋي قازاق پروزاسىنىڭ انتولوگياسىنا بريتانيا كەڭەسىنىڭ باس ديرەكتورى, سەر كيارەن دەۆەين ءسوز ارناسا, قازىرگى قازاق پوەزياسى جيناعىنىڭ العىسوز اۆتورى – ادەبيەتتانۋشى-پروفەسسور دجەيسون حاردينگ.
الەمنىڭ ءىرى كىتاپحاناسىندا تانىستىرىلعان اعىلشىن تىلىندەگى انتولوگيا ۇلىبريتانيا, اقش, كانادا, اۋستراليا, جاڭا زەلانديا سىندى ونداعان ەلدىڭ 8 مىڭنان اسا كىتاپحاناسىنا, ۋنيۆەرسيتەتتەرى مەن عىلىمي ورتالىقتارىنا جەتكىزىلمەك.
تۇساۋكەسەرگە بريتانيا كەڭەسىنىڭ, كەمبريدج ۋنيۆەرسيتەتى باسپاسى, بريتانيا كىتاپحاناسىنىڭ باسشىلارى, سونداي-اق اۋدارماشىلار, ادەبي رەداكتورلار مەن سىنشىلار, قازاقستان تاراپىنان قازاقستان پرەزيدەنتىنىڭ كومەكشىسى, «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيا حاتشىسى ايدا بالاەۆا, قازاقستاننىڭ ۇلىبريتانياداعى توتەنشە جانە وكىلەتتى ەلشىسى ەرلان ىدىرىسوۆ, ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى, قازاقستان جازۋشىلار وداعى توراعاسىنىڭ ورىنباسارى اقبەرەن ەلگەزەك قاتىستى.
شارا بارىسىندا ءسوز سويلەگەن ايدا بالاەۆا: «بۇگىنگى تۇساۋكەسەر «جاھانداعى زاماناۋي قازاقستاندىق مادەنيەت» جوباسى اياسىنداعى جۇمىستىڭ جەمىسى. ول قازاقستاندىق ادەبيەت, مۋزىكا, بەينەلەۋ ونەرى, تەاتر جانە كينو تۋىندىلارىن الەمگە تانىستىرۋعا باعىتتالعان. بۇگىنگى جوبامىز جۇيەلى تۇردە جالعاسىن تاۋىپ, مادەنيەتارالىق قارىم-قاتىناستىڭ ۇلعايۋىنا نەگىز بولادى دەگەن سەنىمدەمىن. «رۋحاني جاڭعىرۋ» باعدارلاماسى اياسىندا 60 قازاقستاندىق اۆتوردىڭ تاڭدامالى شىعارمالارى تۇڭعىش رەت الەمنىڭ نەگىزگى التى تىلىنە اۋدارىلىپ وتىر. جوبانى جۇزەگە اسىرۋعا ۇلىبريتانيا, فرانتسيا, يسپانيا, مىسىر, قىتاي جانە رەسەيدىڭ جەتەكشى باسپا ۇيىمدارى اتسالىستى. انتولوگيا الەمنىڭ 90-نان اسا ەلىنە, بەس قۇرلىققا تارايدى. ياعني, بۇرىن-سوڭدى دۇنيە ءجۇزى وقىرماندارىنىڭ قولىنا تۇسپەگەن قازاق ادەبيەتىنىڭ ۇزدىك ۇلگىلەرىمەن 2,6 ملرد ادام تانىسۋعا مۇمكىندىك الادى», دەدى.
