«جازدىم تەربەپ ەلىم مەن ەلباسىمدى» اتتى كەزدەسۋدى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى, ساياسي عىلىمداردىڭ دوكتورى, پروفەسسور ءامىرحان راحىمجانوۆ اشتى:
– قالامگەرلىك – قيىندىعى مەن قىزىعى مول, جان-جاقتى ءبىلىمدى تالاپ ەتەتىن جاۋاپتى سالا. ەل يگىلىگى ءۇشىن قىزمەت ەتەتىن بۇل سالانىڭ ماماندارى شىعارماشىلىعى ارقىلى ادامزات ساناسىنا وڭ ىقپالىن تيگىزىپ قانا قويماي, جاڭالىقتىڭ جاقتاۋشىسى, جاڭانىڭ قولداۋشىسى رەتىندە قوعام ومىرىنەن ەرەكشە ورىن الادى. حالىقتىڭ مادەنيەتى مەن رۋحانياتىن تەرەڭ قاستەرلەگەن سونداي جاناشىرلاردىڭ ءبىرى – ايتباي ساۋلەبەك. ول كىسىنىڭ قالامىنان تامعان «ەلباسىنىڭ التىن بەسىگى», «قۇرىش تۇلعا» ىسپەتتى قوس ءتىلدى تۋىندىلاردىڭ بىرقاتارى تۇساۋى كەسىلگەن ساتتەن-اق كىتاپحانا قورىنا قابىلدانىپ, ءالى كۇنگە دەيىن ءىس-شارالار اياسىندا كەڭىنەن قولدانىلىپ كەلەدى. بۇل تۋىندىلار 2017 جىلى ىسكە قوسىلعان «ن.نازارباەۆ: ءداۋىر, تۇلعا, قوعام» كوشپەلى كورمە جوبامىزدىڭ اياسىندا الماتى, تۇركىستان, اتىراۋ, اقتوبە, قىزىلوردا, جامبىل وبلىستارىنىڭ تۇرعىندارىنا جول تارتىپ ۇلگەردى, - دەدى ءامىرحان مۇراتبەك ۇلى.
الەمدى مويىنداتقان ەلىمىزدىڭ تابىستارى ەلباسىمەن تىعىز بايلانىستى بولسا, تۇڭعىش پرەزيدەنتتىڭ قايراتكەر بولىپ قالىپتاسۋى قاراعاندى وڭىرىمەن بايلانىستى. ەلباسىنىڭ قىزمەتى مەن ومىرىنە قىزىعاتىن قازاقستاندىقتار بەلگىلى جازۋشى ايتباي ساۋلەبەكتىڭ تۋىندىلارىمەن دە تانىس.
– ەلباسى ءوز ەستەلىكتەرىندە, بەرگەن سۇحباتتارىندا دوس-جولداستارى تۋرالى كوپ ايتادى. مەن سول ادامداردىڭ بىرقاتارىمەن كەزدەسىپ, وتكەن كۇنگە شولۋ جاساۋدى كوزدەدىم. ىزدەستىرۋ جۇمىستارى بارىسىندا كوپتەگەن سۋرەت تابىلىپ, ءبىراز دەرەكت انىقتالدى. جازبالارىمنىڭ نەگىزىنە الىنعان اڭگىمەلەر وقىرماندى قۋانتىپ, جۇرەكتى دە ەلجىرەتەدى. ولاردىڭ بارىندە ونەگە بار. عيبراتتى اڭگىمەلەرمەن تانىسۋ مۇمكىندىگى بۇگىن سىزدەرگە دە بەرىلىپ وتىر. بۇل باستامانىڭ جۇزەگە اسىرىلعانى ءۇشىن ەلباسى كىتاپحاناسىنىڭ باسشىلىعىنا العىسىمدى ايتقىم كەلەدى, - دەدى ايتباي ساۋلەبەك.
جازۋشىنىڭ ەستەلىكتەرىن قاراعاندى پوليتەحنيكا ينستيتۋتىندا ەلباسىمەن بىرگە ءبىلىم الىپ, كەيىن قاراعاندى مەتاللۋرگيا كومبيناتىندا ارىپتەس بولعان قۋانىش وماشەۆ, تولەۋتاي سۇلەيمەنوۆ, توقتارحان ىسقاقوۆتىڭ, قوعام قايراتكەرى سەرىك تىلەۋباەۆ پەن قر ۇعا اكادەميگى ارىستان عازاليەۆتىڭ, جازۋشىنىڭ ۇستازى, كوپ جىلدار بويى اكادەميك ش.ەسەنوۆ اتىنداعى مەكتەپ-گيمنازيانىڭ ديرەكتورى بولعان پەرنەبەك احمەتوۆتىڭ سوزدەرى دالەلدەدى. سىيلى ازاماتتار تىڭداۋشىلارمەن وي ءبولىسىپ, وتكەن كۇننىڭ ايتىلماعان وقيعالارىن جىميا ەسكە الدى.
ولاردى ۇيىپ تىڭداعان م.ح.دۋلاتي اتىنداعى تاراز مەملەكەتتىك ۋنيۆەرسيتەتى مەن جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ ستۋدەنتتەرى ريزاشىلىعىنىڭ بەلگىسى رەتىندە ولەڭ جولدارىن وقىپ, ءان-بيلەرىمەن ونەرلەرىن پاش ەتتى. تارازدىق ستۋدەنت بەيبىت ساتوۆ جاستاردىڭ مازمۇندى ءىس-شارالارعا ءزارۋ ەكەنىن العا تارتىپ, ەلباسى ساياساتىنىڭ ارقاسىندا بۇل ماسەلەنىڭ قولعا مىقتاپ الىنعانىن ءسوز ەتتى:
– حالقىمىزعا زور ەڭبەگى سىڭگەن, ەلىمىزدى الەمگە تانىتقان تۇڭعىش پرەزيدەنتىمىزدىڭ ەسىمى مەملەكەت اتاۋىمەن ۇشتاسىپ, برەندكە اينالعانى كوپكە ءمالىم. سەمينار-ترەنينگتىڭ ارقاسىندا ول كىسىنىڭ ەسىمىمەن اتالعان كىتاپحانانىڭ تورىندە ەكى كۇن بويى ماڭىزدى ماسەلەلەردى تالقىلاپ, وي تۇيدىك. ەلباسىنىڭ قازىرگى قىزمەت ورنىندا ءبىلىم الۋ – مەن ءۇشىن ءارى مارتەبە, ءارى ابىروي. ويى ۇشقىر, جان-جاقتى بەلسەندى جاستاردىڭ مۇنداي جوبالاردى كوپتەپ قالايتىنى انىق. سەمينار-ترەنينگتىڭ مازمۇنى مەن ساپاسىنا ءبىزدىڭ ريزاشىلىعىمىز مول. قاناتتانىپ, جاڭا بەلەستەردى باعىندىرۋعا شابىتتاندىق. دارىسكەرلەرمەن جۇمىس ىستەپ, قاسيەتتەرىمىزدى دامىتتىق. بەدەلدى ازاماتتارمەن كەزدەسىپ, سۇحباتتاسىق. سول سەبەپتى دە ەلباسى كىتاپحاناسىنا ءبىزدىڭ العىسىمىز زور, - دەدى.
جاستار ەكى كۇندىك سەميناردىڭ تامامداعانىن راستايتىن سەرتيفيكاتتار مەن ەستەلىك سىيلىقتارمەن ماراپاتتالدى. كەزدەسۋ قوناعىنىڭ كوزىنە تۇسكەن العىر جاستارعا جازۋشىنىڭ «ماحاببات جالعىز» كىتابى تارتۋ ەتىلدى.
ءىس-شارا قاتىسۋشىلارى ا.ساۋلەبەكتىڭ تاريحي, دەرەكتى كىتاپتارى مەن وزەكتى تۋىندىلارى ۇسىنىلعان كورمەنى تاماشالاپ, نازارباەۆ ورتالىعىندا ورنالاسقان ەكسپوزيتسيالار مەن جادىگەرلەرمەن تانىستى.
