داريعا نازارباەۆا ەلىمىزدىڭ جاقىن دوسى – كورول ابداللا II-ءنىڭ كورولدىكتىڭ قوعامدىق-ساياسي ءومىرىن رەفورمالاۋ جونىندەگى قىزمەتى, سونداي-اق حالىقارالىق وزەكتى ماسەلەلەردەگى سىندارلى ۇستانىمى قازاقستاندا جوعارى باعالاناتىنىن اتاپ ءوتتى. «كورول ابداللا II جەتى رەت رەسمي جانە جەكە ساپارلارمەن قازاقستاندا جەتى رەت بولىپ, الەمدىك جانە ءداستۇرلى دىندەر ليدەرلەرىنىڭ بەسىنشى سەزىنە قاتىستى. يوردانيانى دامىتۋ, ءبىلىم بەرۋ, دەنساۋلىق سالالارىن جاڭعىرتۋ جولىندا وراسان زور قىزمەت اتقاردى. ونى تاياۋ شىعىستاعى ەڭ وزىق ساياساتكەر دەپ بىلەمىن», - دەدى سەنات باسشىسى.
يوردانيا سەناتىنىڭ توراعاسى كورولدىكتەگى جانە ايماقتاعى سىرتقى ساياسي جاعدايلار, اتاپ ايتقاندا تاياۋ شىعىستا بولىپ جاتقان كۇردەلى احۋال تۋرالى جان-جاقتى حاباردار ەتتى. ف.ءال-فايەز يوردانيا ەكونوميكاسىنا «اراب كوكتەمىنىڭ» تيگىزگەن تەرىس اسەرى تۋرالى ايتتى. سيرياداعى سوعىس سالدارىنان ەلدە 1 ميلليون 300 مىڭ بوسقىن ءجۇر, يوردانيا ولارعا 1,3 ملرد دوللار جۇمساپ كەلەدى, ال حالىقارالىق قوعامداستىق كورسەتىپ وتىرعان قولداۋ بارلىق شىعىنداردىڭ ۇشتەن بىرىنە عانا جەتەدى.
«اراب كوكتەمىنىڭ زاردابى بارىمىزگە كەرى اسەر ەتتى. بولاشاقتا مۇنداي جاعدايلارعا جول بەرمەۋ كەرەك», - دەدى د.نازارباەۆا جانە اراب ەلدەرىنىڭ باسشىلارىن ماسەلەلەردى بىرلەسە وتىرىپ شەشۋگە شاقىردى.
داريعا نازارباەۆا تاياۋ شىعىستاعى جاعدايدى ەۋرازيا مەديا فورۋمىنىڭ الاڭىندا, سونداي-اق الەمدىك جانە ءداستۇرلى دىندەر ليدەرلەرى سەزىنىڭ اياسىندا تالقىلاۋدى ۇسىندى.
ساۋدا-ەكونوميكالىق ىنتىماقتاستىقتى دامىتۋ تۋرالى ايتا كەلىپ, يوردانيا سەناتىنىڭ توراعاسى قازاقستاندىق سەنات باسشىسىنا قازاقستان مەن يوردانيانىڭ 2007 جىلدان بەرى جۇمىس ىستەپ كەلە جاتقان ىسكەرلىك كەڭەسىنىڭ قىزمەتى ءالسىز ەكەنىن جانە ماردىمدى ناتيجە بەرمەي وتىرعانى تۋرالى حابارلادى.
كەزدەسۋ اياسىندا سونداي-اق ۆيزالىق ءتارتىپتى ليبەرالداۋ جانە ەكى ەل اراسىنداعى تىكەلەي اۋە باعىتىن اشۋ قازاقستان مەن يوردانيا اراسىنداعى ءتۋريزمدى دامىتۋعا ىقپال ەتەتىنى تالقىلاندى.
