جاڭا روماننىڭ جەلىسى سوتسياليستىك رەجىم قۇرباندارىنا اينالعان سەمەي ءوڭىرى حالقىنىڭ قاسىرەتىنە قۇرىلعان. وندا شىعارمانىڭ باس كەيىپكەرى اياۋلىمنىڭ باسىنان وتكەن قيىن تاعدىرى باياندالادى. ول اتوم بومباسى سىناعىنان جارى مەن پەرزەنتىنەن, اتا-اناسىنان ايىرىلىپ, قايعىلى دا قاسىرەتتى كۇندەردى باستان كەشەدى.
تۇساۋكەسەر بارىسىندا التىنشاش جاعانوۆا, ءشاربانۋ بەيسەنوۆا, ورازكۇل اسانعازى, شەرۋباي قۇرمانباي ۇلى, كوپەن امىربەك سىندى زيالى قاۋىم وكىلدەرى ءسوز الىپ, اۆتوردىڭ شىعارماشىلىعىنا توقتالدى.
«ساۋلە بالا كۇنىنەن اۋىلدىڭ قىزىعى مەن قيىندىعىن كورىپ ءوستى. مەكتەپ قابىرعاسىنان گازەتكە ماقالا جازىپ, قالامىن ۇشتادى. كوپ قالامگەر الدىمەن جۋرناليستيكاعا كەلىپ, كەيىن جازۋشىلىققا بەت بۇردى. ساۋلە قارىنداسىم دا وسى جولدان ءوتتى. ولەڭگە عاشىق بولىپ, بىرقاتار جىر جيناعى جارىق كوردى. ودان كەيىن اقىرىن پروزاعا ويىستى. «ۇلكەن ۇيدەگى ۇرەي», «جاتقا تۋعان بالا», «وگەي جۇرەك» دەگەن كىتاپتارى وقىرماننىڭ كوڭىلىنەن شىقتى. جانە وسى پروزالىق جيناقتارى قازاقتىڭ كەڭ دالاسىنان قانات قاعىپ, ەۋروپاعا جول تارتتى. شۆەتسيا مەن گەرمانيادا ءتارجىمالاندى. قازاق جازۋشىلارى اراسىنان ادەبي اگەنتىن قالىپتاستىرعان بىردەن-ءبىر قالامگەر. بۇگىنگى جاڭا رومانى دا وقىعان جاندى تەرەڭ ويعا جەتەلەيدى», دەدى كەشتىڭ ءسوز تىزگىنىن ۇستاعان فيلولوگيا عىلىمدارىنىڭ دوكتورى ءۋاليحان قاليجان.
كەش سوڭىندا قالامگەر ساۋلە دوسجان روماننىڭ جازىلۋ وقيعاسىن بايانداپ, وعان ەكى جىل ۋاقىت جۇمساعانىن ايتتى.
