اۋىلدا ءتۇتىن تۇتەتىپ قالعان جاس تولقىننىڭ باسىم بولىگى بۇگىنگە دەيىن بەلگىلى ءبىر كاسىپتىڭ تۇتقاسىن ۇستاۋعا قاۋقارى جەتپەي كەلدى. تىلدەسىپ پىكىر الماسقاندا ايتار ءۋاجى – باستاپقى قارجىنىڭ بولماۋى. ەگەر ءسال عانا دەمەۋ بولسا, كەز كەلگەن پايدالى ءىستى دوڭگەلەتىپ اكەتپەك.
– بيىل جاستار جىلى بولعاندىقتان, كەلەشەگىمىزدىڭ كوسەگەسىن كوگەرتۋ جايىن كوبىرەك ويلاۋ كەرەك, – دەيدى ەل اعاسى بەرىك سۇلەيمەنوۆ. ءبىزدىڭ وسى ەسىل اۋدانىندا ستاتيستيكالىق دەرەكتەرگە قاراعاندا, ءۇش مىڭنان استام جاس بار ەكەن. قانشاما قايرات, جىگەر جۇمسالار جەرىن تاپپاي, بوسقا جاتىر. ەڭ الدىمەن بۇل جاستار الدىڭعى تولقىننىڭ ەڭبەككە دەگەن ۇمتىلىسى مەن قۇلشىنىسىن كورمەي ءوستى. ءبىر كەزدە ەڭبەك ادامىن دارىپتەۋ, مىسال ەتۋ تۋرالى جاپ-جاقسى ايتىلىپ ەدى. كەيىن سۇيىلىپ كەتكەن ءتارىزدى. قاراپايىم ەڭبەك ادامدارىنىڭ قارەكەتىن كورسەتسەك, ۇلگى-ونەگە بولار ەدى.
اۋدانداعى اقساقال ايتقان ءۇش مىڭنان استام جاستىڭ ۇستىمىزدەگى جىلى 61-ءى عانا «جاس كاسىپكەر» جوباسى بويىنشا وقۋعا جىبەرىلىپتى. ال قالعانى شە؟ ولار ءالى مەملەكەت تاراپىنان كورسەتىلىپ جاتقان قانشاما قامقورلىقتان قاعىس قالىپ جاتىر. وزدەرىنىڭ كەجەگەسى كەيىن تارتىپ تۇرىپ, وزگەنى كۇستانالاۋ وسىندايدان ءوربيدى.
– جوبا بويىنشا وقۋعا جىبەرىلگەندەردىڭ 51-ءى ارنايى كۋرستى ءتامامداسا, 31-ءى جەڭىلدەتىلگەن نەسيەگە يە بولدى, – دەيدى ەسىل اۋدانى اكىمىنىڭ ورىنباسارى ايدار بايمانوۆ.
اينالىسقان ادامعا كاسىپ ءتۇرى دە از ەمەس. ماسەلەن, زەرەندى اۋدانىنا قاراستى قاناي بي اۋىلىندا سەگىز جاس جەڭىلدەتىلگەن نەسيە الىپ, جاڭا كاسىپتەرىن دوڭگەلەتىپ وتىر. ءتىپتى اۋىلدا بۇرىن-سوڭدى بولا قويماعان شاشتاراز دا بار. ال داۋلەت قاسىموۆ ەسىمدى ازامات بال اراسىن باعىپ, تابىس تابۋدا.
– قازىر اۋىل جاستارى نەسيە الىپ, نەسىبەسىن ارتتىرىپ جاتقاندارعا قىزىعا قاراپ وتىر, – دەيدى قاناي بي اۋىلدىق وكرۋگىنىڭ اكىمى نۇرجان جەتەنوۆ. ءبىرىنىڭ جەتىستىگىن ءبىرى كورىپ, تىربانىپ تىرشىلىك ەتسە, جالعىز اۋىلدىڭ عانا ەمەس, تۇتاس ەلىمىزدىڭ دە الەۋەتى ارتا تۇسپەي مە؟!
بىزدىڭشە, مەملەكەت تاراپىنان كورسەتىلىپ جاتقان قولداۋ تۇرلەرىن جەرگىلىكتى اكىمدىكتەر حالىققا ءتۇسىندىرىپ ايتۋ جاعىن ءالى دە شيراتا ءتۇسۋى قاجەت. اۋىل جاستارىمەن سويلەسكەنىمىزدە, شاراپاتى مول جوبا جايلى ەستىپ بىلمەيتىندەرى دە كوپ كەزدەستى. ەل گازەتى ارقىلى ەل قۇلاقتانسىن دەپ ءبىز دە ءبىر اۋىز ءسوز ارناعاندى ءجون كوردىك.
اقمولا وبلىسى
