ايماقتار • 22 قىركۇيەك، 2019

مادەنيەت قىزمەتكەرلەرى مۇقتاج وتباسىلارعا باسپانا سىيلادى

47 رەتكورسەتىلدى

تالدىقورعانداعى بيكەن ريموۆا اتىنداعى دراما تەاترىندا جەتىسۋداعى مادەنيەت ماۋسىمىنىڭ اشىلۋ سالتاناتى ءوتتى. وسى شارا بارىسىندا الماتى وبلىسىنىڭ مادەنيەت سالاسىنىڭ قىزمەتكەرلەرى، جۋرناليستەر مەن اقىن-جازۋشىلار اۋدانداردا تۇراتىن كوپبالالى انالارعا تۇرعىن ءۇي كىلتىن تابىس ەتتى.

مادەني شارادا كەربۇلاق، قاراتال، اقسۋ اۋداندارى مەن تەكەلى قالاسىندا تۇراتىن 4 كوپ بالالى وتباسى ساحناعا شاقىرىلىپ، ولارعا وزدەرى تۇراتىن وڭىردەن باسپانا كىلتتەرى سىيعا تارتىلدى.ماسەلەن، كەربۇلاق اۋدانىنىڭ تۇرعىنى 5 بالانىڭ اناسى جۇلدىز سۇلتانباەۆاعا قازاقستاننىڭ حالىق ءارتىسى الماحان كەنجەبەكوۆا مەن قازاقستاننىڭ ەڭبەك سىڭىرگەن قايراتكەرى ءالي الپىسباەۆ، قاراتال اۋدانىنان كەلگەن 4 بالانىڭ اناسى اينۇر يساەۆاعا «جەتىسۋ» گازەتىنىڭ باس رەداكتورى امىرە ءارىن مەن جاس جازۋشى ەسبولات ايدابوسىن، اقسۋ اۋدانىنان كەلگەن كوپبالالى انا تولقىن جاتقانباەۆاعا اسابالار ەرداۋلەت كەنجەقۇلوۆ جانە قايرات قازكەن ۇلى، تەكەلى قالاسىنان كەلگەن 6 بالانىڭ اناسى ماقاي قاليمانعا «تالدىقورعان» گازەتىنىڭ باس رەداكتورى دانيار سەيسەنباەۆ پەن «جەتىسۋ شۇعىلاسى» گازەتىنىڭ باس رەداكتورى جاناحمەت يسابەكوۆ پاتەر كىلتتەرىن سالتاناتتى تۇردە تابىستادى. سونداي-اق قونىستوي يەلەرىنە وبلىس اكىمىنىڭ سىيلىقتارى دا تارتۋ ەتىلدى.

- جەتىسۋلىق مادەنيەت قىزمەتكەرلەرىنىڭ جاڭا ماۋسىمىن بيىل ەرەكشە شارا قىلىپ وتكىزۋدى ويلادىق. بۇل – ونەر ۇجىمدارىنىڭ الداعى ماۋسىمدا اتقاراتىن ىستەرىنىڭ بەتاشارى ىسپەتتى، كورەرمەنگە، تىڭدارمانعا، وقىرمانعا تىڭ تۋىندى، اسەرلى ونەر ۇلگىسىن ۇسىنۋعا دايىنبىز. ونىڭ ۇستىنە وبلىس اكىمى اماندىق باتالوۆتىڭ باستاماسىمەن ايماقتا مۇقتاج وتباسىلاردى باسپانامەن قامتۋ ىسىنە ۇلەس قوسۋدى ۇيعاردىق. بۇعان ونەر ادامدارى، اقىن-جازۋشىلار، جۋرناليستەر ءبىر كىسىدەي ۇلەس قوستى، - دەيدى الماتى وبلىستىق مادەنيەت باسقارماسىنىڭ باسشىسى مارلەن كولباەۆ.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار