ءۇش قاباتتى ەڭسەلى ءۇيدىڭ الدىندا تۇرىپ العاش بولىپ ءسوز العان زاڭعار جازۋشىنىڭ رۋحاني اعاسى, قازاق ادەبيەتىنىڭ كلاسسيگى ءابدىجامىل نۇرپەيىسوۆ تەبىرەنتەرلىك ەستەلىك ايتتى. «بۇگىن ءبىز قازاق حالقىنىڭ تەڭدەسى جوق سۇيىكتى ۇلى ءابىش كەكىلباي ۇلى تۇرعان ءۇيدىڭ الدىندا باس قوسىپ تۇرمىز. بۇل ءۇي بارشا حالقىمىز ءۇشىن ورنى بولەك تاريحي ءۇي. بۇل – ءابىشتىڭ شاڭىراق كوتەرىپ, ۇرپاعى ءوسىپ, ءورىسى كەڭىگەن ءۇيى. ول كەزدە ءابىش جاس, اناسى اي-اپا تىڭ, وسىندا قان مايداندا قازا تاپقان كەكىلبايدىڭ ۇرپاعى بىرىنەن كەيىن ءبىرى دۇنيەگە كەلدى. ءابىشتىڭ العاشقى ولەڭدەر جيناعى دا, تۇڭعىش پروزالىق تۋىندىلارى توپتاسقان ء«بىر شوكىم بۇلت» تا, «شىڭىراۋ», «اڭىزدىڭ اقىرى» دا وسى ۇيدە دۇنيەگە كەلدى. تانىمى تەرەڭ, زەردەسى بيىك جاس ءابىشتىڭ قازاق ادەبيەتىندەگى قۇبىلىس بولىپ قالىپتاسۋىنا دا, ۇلى جازۋشى بولىپ تانىلۋىنا دا وسى ءۇي كۋا», دەدى قارت قالامگەر ءا.نۇرپەيىسوۆ تولقىپ تۇرىپ.
ەسكەرتكىش تاقتانىڭ بەتىن بۇركەگەن اق شىمىلدىقتى ءا.نۇرپەيىسوۆ, جارى كلارا جۇماباەۆا, قالامداس دوستارى تولەك ابدىك, قاجىعالي مۇحامەتقالي ءتۇسىردى. ىزدەپ كەلگەن جولداستارىنا, قۇرمەتتەپ شاقىرعان اعالارىنا, ىزىنەن ەرگەن ىنىلەرىنە قوناقجاي ءۇي يەسى رەتىندە ەسىگىن ءوزى اشىپ, قۇشاعىن جايا قارسى الىپ, كىشىپەيىل مىنەز بەن كىسىلىكتىڭ ۇلگىسىن كورسەتكەن تاۋ تۇلعانىڭ ەسىمى ەشقاشان كومەسكىلەنبەيدى. تالانتقا تاعزىم ەتكەن زامانداستارى بولىسكەن ەستەلىكتەر وسىلاي تۇيىندەلدى.
