ايماقتار • 20 قىركۇيەك، 2019

رەسەي تۋريستىك اقپاراتتىق ۇيىمدارىنىڭ سەزىنە ورالدىقتار قاتىسۋدا

160 رەتكورسەتىلدى

رەسەي فەدەراتسياسىنىڭ ۆورونەج قالاسىندا تۋريستىك اقپاراتتىق ۇيىمداردىڭ بۇكىلرەسەيلىك ءىى سەزى وتۋدە. «مۇنداي باسقوسۋلاردىڭ جەرگىلىكتى ءتۋريزمدى دامىتۋعا تيگىزەتىن كومەگى وتە زور» دەيدى جيىنعا قازاقستاننان بارىپ قاتىسقان ورالدىق «TourWestKaz» مەكەمەسىنىڭ جەتەكشىسى، بەلگىلى ولكەتانۋشى ايبولات قۇرىمباەۆ.

ءۇش كۇنگە سوزىلاتىن سەزدە رەسەيدىڭ ءار تۇكپىرىندەگى تۋريستىك نىساندار، ولاردى جارنامالاۋدىڭ جاڭا تەحنولوگيالىق ادىستەرى، تاجىريبە الماسۋ، وسى سالانىڭ ءتۇيىندى ماسەلەلەرىن جان-جاقتى تالقىلاۋ ءجۇرىپ جاتىر. جيىندى ۆورونەج وبلىسى گۋبەرناتورى، اقپاراتتىق-تۋريستىك ۇيىمداردىڭ ۇلتتىق قاۋىمداستىعى، ۆورونەج قالاسىنىڭ تۋريستىك-اقپاراتتىق ورتالىعى جانە تۋريزم جونىندەگى فەدەرالدىق اگەنتتىك ۇيىمداستىرعان ەكەن.

- تۋريستىك اقپارات بەرۋ ورتالىعى – وسى وڭىرگە كەلگەن تۋريستەردىڭ بارلىق ساۋالىنا جاۋاپ تاۋىپ، اقىل-كەڭەس بەرەتىن مەكەمە. مۇنداي ۇيىمدار ءبىزدىڭ قازاقستاندا نۇر-سۇلتان، الماتى، شىمكەنت قالالارىندا عانا بار. رەسەيدەگى وسىنداي ورتالىقتاردىڭ قاۋىمداستىعىن باسقاراتىن ميحايل ۋشاكوۆتىڭ ايتۋىنشا، تۋريستىك اقپارات بەرۋ ورتالىعى بولماسا، ىشكى ءتۋريزمنىڭ دامۋى مۇمكىن ەمەس. شىن مانىندە وسى جيىننان ۇيرەنگەنىم كوپ. ۆورونەجگە رەسەيدىڭ 70-تەن اسا وڭىرىنەن 200-دەن اسا قاتىسۋشى كەلگەن. ءىرى-ءىرى، تانىمال سپيكەرلەردىڭ سەمينارىنا قاتىستىق. تۋريزم سالاسىنا ماماندانعان تراۆەل-بلوگەرلەر الەمدەگى جاڭالىقتارمەن ءبولىسىپ جاتىر. مىسالى، قاي ەلدىڭ ازاماتتارى ساياحاتقا ءجيى شىعادى، ولاردىڭ ورتاشا چەگى، ياعني جۇمسايتىن قاراجاتى قانشا، «كەربەز تۋريستەرگە» ارنالعان ليۋكس لاگەرلەردى قالاي جاساۋ كەرەك، ونداي لاگەر قايدا بار، ت.ب. كوپتەگەن تاقىرىپتار توڭىرەگىندە ناقتى كەڭەستەر الدىق، - دەيدى ورالدىق ولكەتانۋشى، جەرگىلىكتى ءتۋريزمدى دامىتۋعا ۇلەس قوسىپ جۇرگەن ايبولات شامۇرات ۇلى.

رەسەي فەدەراتسياسىندا 300-دەن اسا تۋريستىك اقپارات بەرۋ ورتالىعى بار ەكەن. ول جەردەن تۋريست سول ءوڭىردىڭ تۋريستىك كارتاسىن تەگىن الادى، قوناق ءۇي، قىزىقتى مارشرۋتتار، كوركەم مۇيىستەر مەن تاريحي ورىندار تۋرالى اقپاراتقا قانىعادى. رەسەيدە وسىنداي ورتالىقتار ءبىر جىل ىشىندە تۋريستەرگە 1،8 ملن اقىل-كەڭەس بەرىپتى.

ۆورونەجدەگى سەزگە ساراپشى سپيكەر رەتىندە شەتەلدىك تانىمال ماماندار شاقىرىلعان. ولاردىڭ قاتارىندا فرانتسيالىق France Meeting ۇيىمىنىڭ ديرەكتورى اندرە پولي ءوز ەلىندەگى تۋريستىك-اقپاراتتىق ورتالىقتاردىڭ جۇمىسىمەن تانىستىرىپ، فرانتسۋز تۋروپەراتورلارىنىڭ كەيبىر قۇپيالارىمەن بولىسسە، يسپانيالىق Visit Russia فيرماسىنىڭ جەتەكشىسى مارلەن رودريگەس يسپان تۋريزم نارىعىنا شىعۋدىڭ ستراتەگياسىن تۇسىندىرگەن. لوندونداعى Expedia Group Media Solutions وكىلى اننا بۋكوۆسكايا زاماناۋي ساياحاتشىلاردىڭ تالاپ-تىلەگى تۋرالى زەرتتەۋ ناتيجەلەرىن جاريا ەتكەن. مۇنىڭ ءبارى ەلدىڭ ىشكى-سىرتقى تۋريزم سالاسىن دامىتۋعا ۇلكەن سەرپىلىس بەرەرى ءسوزسىز.

«قازاقستاننىڭ ۇزدىك ولكەتانۋشىسى»، تاريح ماگيسترى، «عىلىمي باستامالاردى قولداۋ قورىنىڭ» توراعاسى ايبولات قۇرىمباەۆ سوڭعى جىلدارى «TourWestKaz» مەكەمەسىن قۇرىپ، باتىس قازاقستان وڭىرىندە ىشكى ءتۋريزمدى دامىتۋعا اتسالىسىپ جۇرگەن ازامات. ايبولات شامۇرات ۇلى ۇيىمداستىراتىن «بوكەي ورداسىنا ساياحات»، «قازاقستانداعى ەڭ كىشكەنتاي سارقىراماعا ساياحات»، «باتىس قازاقستاننىڭ قاسيەتتى نىساندارى» اتتى تۋرلار ءوز ەلىمىز عانا ەمەس، رەسەيدىڭ كورشىلەس ايماقتارىنا دا جاقسى تانىمال. تۋريستىك اقپاراتتىق ۇيىمداردىڭ بۇكىلرەسەيلىك ءىى سەزىنە شاقىرتۋ العان ايبولات قۇرىمباەۆ كەشە ارنايى ديپلومعا يە بولدى.

سوڭعى جاڭالىقتار

اۋىز سۋ ساپاسى قالىپقا كەلتىرىلدى

قازاقستان • بۇگىن، 18:04

انا ءتىلى – ارىڭ بۇل...

رۋحانيات • بۇگىن، 13:10

كۇرەس: العاشقى كۇنى ءۇش قولا

كۇرەس • بۇگىن، 09:00

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار